ສະຫຼຸບການເຄື່ອນໄຫວວຽກງານກວດກາ ຂອງກະຊວງການຕ່າງປະເທດ ປະຈຳປີ 2021, 2022

ໃນວັນທີ 7 ພະຈິກ 2022 ທີ່ກະຊວງການຕ່າງປະເທດໄດ້ຈັດກອງປະຊຸມສະຫຼຸບການເຄື່ອນໄຫວວຽກງານກວດກາຂອງກະຊວງການຕ່າງປະເທດ ປະຈຳປີ 2021, 2022 ແລະທິດທາງແຜນການໃນຕໍ່ໜ້າ, ໂດຍການໃຫ້ກຽດເປັນປະທານຂອງ ສະຫາຍ ສະເຫຼີມໄຊ ກົມມະສິດ ກໍາມະການກົມການເມືອງສູນກາງພັກເລຂາຄະນະບໍລິຫານງານພັກກະຊວງຮອງນາຍົກລັດຖະມົນຕີລັດຖະມົນຕີກະຊວງການຕ່າງປະເທດຊຶ່ງມີຄະນະພັກ-ຄະນະນໍາກະຊວງ, ມີພາກສ່ວນກ່ຽວຂ້ອງເຂົ້າຮ່ວມ.

ໃນກອງປະຊຸມ ສະຫາຍ ບຸນເຫຼືອ ພັນດານຸວົງ ຄະນະປະຈໍາພັກ ປະທານຄະນະກວດກາພັກຮອງລັດຖະມົນຕີກະຊວງການຕ່າງປະເທດໄດ້ໃຫ້ກຽດເຜີຍແຜ່ເນື້ອໃນ 2 ເອກະສານສໍາຄັນ ຄື: ຄໍາສັ່ງແນະນໍາຂອງຄະນະເລຂາທິການສູນກາງພັກກ່ຽວກັບການເພີ່ມທະວີການນໍາພາ-ຊີ້ນໍາຕໍ່ການເຄື່ອນໄຫວວຽກງານກວດກາ ແລະ ແກ້ໄຂຜົນການກວດກາ ແລະບົດສະຫຼຸບຕີລາຄາການເຄື່ອນໄຫວວຽກງານກວດກາ ແຕ່ປີ 2016 ເຖິງປັດຈຸບັນ ແລະບາງເນື້ອໃນຕົ້ນຕໍສຳລັບການເຄື່ອນໄຫວແຕ່ນີ້ເຖິງປີ 2026 ຂອງຄະນະກວດກາສູນກາງພັກ.

ພ້ອມກັນນີ້, ກອງປະຊຸມຍັງໄດ້ຜ່ານບົດສະຫຼຸບຕີລາຄາການເຄື່ອນໄຫວວຽກງານກວດກາ ປະຈໍາປີ 2021, 2022 ແລະທິດທາງແຜນການໃນຕໍ່ໜ້າ ຂອງກະຊວງການຕ່າງປະເທດ ສະເໜີໂດຍ ສະຫາຍ ນາງ ໄກມະນີ ອໍລະບູນ ກໍາມະການຄະນະພັກກະຊວງ ຫົວໜ້າກົມກວດກາ ຊຶ່ງໃນໄລຍະ 2 ປີຜ່ານມາ ວຽກງານຕິດຕາມ, ກວດກາແມ່ນໄດ້ຮັບຄວາມເອົາໃຈໃສ່ຈາກຄະນະພັກ-ຄະນະນຳກະຊວງ ໃນການນໍາພາ-ຊີ້ນໍາຢ່າງໃກ້ຊິດ ແລະ ເປັນປົກກະຕິ. ຄະນະກວດກາກະຊວງການຕ່າງປະເທດ ໄດ້ເປັນເຈົ້າການໃນການເຜີຍແຜ່ບັນດາມະຕິ, ຄໍາສັ່ງ,ກົດໝາຍຂອງລັດ ແລະນິຕິກໍາທີ່ກ່ຽວຂ້ອງກັບວຽກງານກວດກາເພື່ອຍົກສູງຄວາມເຂົ້າໃຈຂອງຖັນແຖວສະມາຊິກພັກ, ພະ ນັກງານ-ລັດຖະກອນ ຕໍ່ບົດບາດ ແລະ ຄວາມສໍາຄັນຂອງວຽກງານກວດກາ ແລະໄດ້ມີການປັບປຸງກົງຈັກການຈັດຕັ້ງ ແລະ ຄຸນນະພາບຂອງວຽກງານກວດກາໃຫ້ສູງຂຶ້ນເລື້ອຍໆ. ໃນໄລຍະຜ່ານມາ ຄະນະກວດກາກະຊວງ ໄດ້ດຳເນີນການເຄື່ອນໄຫວວຽກງານກວດກາດ້ວຍຄວາມເອົາໃຈໃສ່, ໄດ້ດໍາເນີນການກວດກາປົກກະຕິວຽກພັກ-ລັດ, ກວດກາຕາມຄໍາສັ່ງ ແລະ ກວດກາສະເພາະກິດ ຕໍ່ບັນດາກົມເປົ້າໝາຍຢູ່ພາຍໃນກະຊວງ ສໍາເລັດຕາມແຜນການທີ່ວາງໄວ້. ພ້ອມດຽວກັນນັ້ນ, ກໍໄດ້ໃຫ້ຄວາມຮ່ວມມື ແລະເຮັດວຽກກັບຄະນະກວດກາຂັ້ນສູນກາງຢ່າງເປັນປົກກະຕິ. ນອກຈາກນັ້ນ, ອັນພົ້ນເດັ່ນ ແມ່ນຂະບວນການການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນເຫັນວ່າມີການເພີ່ມຂຶ້ນຢ່າງຕັ້ງໜ້າເຊິ່ງມາຮອດປັດຈຸບັນຄະນະພັກກະຊວງໄດ້ມີມະຕິຕົກລົງຮັບຮອງເອົາໝ່ວຍພັກປອດໃສ, ເຂັ້ມແຂງ, ໜັກແໜ້ນ 34 ໜ່ວຍພັກ ທັງຢູ່ພາຍໃນ ແລະຕ່າງປະເທດ ຈາກທັງໝົດ 57 ໜ່ວຍພັກ ທີ່ຂຶ້ນກັບອົງຄະນະພັກກະຊວງການຕ່າງປະເທດ.

ຜ່ານການເຄື່ອນໄຫວວຽກງານຕິດຕາມ, ກວດກາເຫັນວ່າ ຄະນະພັກແຕ່ລະຂັ້ນ, ສະມາຊິກພັກ, ພະນັກງານ-ລັດຖະກອນ ມີຄວາມຮັບຮູ້, ເຂົ້າໃຈຢ່າງຖືກຕ້ອງ ຕໍ່ວຽກງານຕິດຕາມ, ກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ, ມີສະຕິຕໍ່ການຈັດຕັ້ງ, ເຄົາລົບກົດລະບຽບຂອງພັກ ແລະ ກົດໝາຍຂອງລັດພ້ອມທັງໃຫ້ການຮ່ວມມືເປັນຢ່າງດີຈາກບັນດາເປົ້າໝາຍຖືກກວດກາ ແລະພາກສ່ວນກ່ຽວຂ້ອງ. ໂດຍລວມແລ້ວສາມາດຕີລາຄາໄດ້ວ່າ ສະພາບການພາຍໃນກະຊວງການຕ່າງປະເທດມີຄວາມສະຫງົບ, ການປະຕິບັດວຽກງານຂອງບັນດາກົງຈັກມີຄວາມໂປ່ງໃສ, ສາມາດສະກັດກັ້ນປະກົດການຫຍໍ້ທໍ້ໄດ້ຢ່າງທັນການ ແລະໄດ້ຮັບຜົນດີ.

ໃນກອງປະຊຸມຄັ້ງນີ້, ຍັງໄດ້ຮັບຟັງການໂອ້ລົມຂອງ ສະຫາຍ ສະເຫຼີມໄຊ ກົມມະສິດ ຊຶ່ງສະຫາຍໄດ້ສະແດງຄວາມຊົມເຊີຍຕໍ່ຜົນງານການເຄື່ອນໄຫວວຽກງານກວດກາ ພ້ອມທັງໄດ້ເນັ້ນໜັກໃຫ້ຄະນະພັກ-ຄະນະນໍາ, ຄະນະກວດກາແຕ່ລະຂັ້ນຖືເອົາວຽກງານກວດກາເປັນໜຶ່ງໃນພາລະບົດບາດ ແລະແບບແຜນການນໍາພາທີ່ສຳຄັນຂອງພັກທີ່ຂາດບໍ່ໄດ້ທັງເປັນຄວາມຮັບຜິດຊອບໂດຍກົງຂອງຄະນະພັກ-ຄະນະນໍາ ຕາມທິດນໍາທີ່ວ່າ: “ບໍ່ມີການກວດກາກໍໝາຍວ່າບໍ່ມີການນໍາພາ”, ພ້ອມທັງຄົ້ນຄວ້າປັບປຸງກົນໄກການຕິດຕາມ-ກວດກາ ໃຫ້ຄົບຖ້ວນ ແລະ ຮັດກຸມ, ສ້າງເງື່ອນໄຂ ແລະ ອໍານວຍຄວາມສະດວກໃຫ້ແກ່ການປະຕິບັດໜ້າທີ່ວຽກງານຕິດຕາມ-ກວດກາ, ຕີຖອຍທັດສະນະຖືເບົາຕໍ່ວຽກງານຕິດຕາມ-ກວດກາ. ພ້ອມກັນນັ້ນ, ຍັງໄດ້ຮຽກຮ້ອງໃຫ້ຄະນະພັກທຸກຂັ້ນ ນໍາໄປຄົ້ນຄວ້າຜັນຂະຫຍາຍເນື້ອໃນຈິດໃຈຂອງຄຳສັ່ງແນະນໍາຂອງຄະນະເລຂາທິການສູນກາງພັກ ແລະບົດສະຫຼຸບການເຄື່ອນໄຫວວຽກງານກວດກາຂອງຄະນະກວດກາສູນກາງພັກທີ່ເຊື່ອມຊຶມໄປແລ້ວນັ້ນໃຫ້ເກີດດອກອອກຜົນ ເພື່ອຮັບປະກັນຄວາມຮັບຮູ້ເຂົ້າໃຈຢ່າງເລິກເຊິ່ງ ແລະເຮັດໃຫ້ວຽກງານຕິດຕາມ-ກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ ພາຍໃນກະຊວງການຕ່າງປະເທດໄດ້ຮັບການຈັດຕັ້ງປະຕິບັດຢ່າງເປັນປົກກະຕິ ແລະເຂັ້ມແຂງຕໍ່ເນື່ອງ, ທັງຮັບປະກັນປະສິດທິພາບ, ປະສິດທິຜົນ ແລະຜົນສັກສິດຂອງວຽກງານກວດກາຢ່າງແທ້ຈິງ, ເພື່ອຮັບປະກັນໃນການເປັນເສນາທິການວຽກງານກວດກາໃຫ້ຄະນະພັກ-ຄະນະນໍາ ແລະຕັ້ງໜ້າປະຕິບັດຕາມການຊີ້ນໍາຂອງຄະນະກວດກາສູນກາງພັກ, ອົງການກວດກາລັດຖະບານ ແລະຕາມການແນະນໍາອົງການກວດສອບແຫ່ງລັດ; ເອົາໃຈໃສ່ປະຕິບັດທິດທາງ ແລະ ຈຸດໝາຍສູ້ຊົນທີ່ກອງປະຊຸມວຽກງານກວດກາທົ່ວປະເທດກໍຄືຂອງກະຊວງການຕ່າງປະເທດວາງອອກໃຫ້ໄດ້ຮັບຜົນດີ.
ຂ່າວ: ກະຊວງການຕ່າງປະເທດ

แชร์