ປະຊາກອນໜຸ່ມລາວ ເຕີບໃຫຍ່ໄວທີ່ສຸດໃນອາຊີອາຄະເນ

ອົງການສະຫະປະຊາຊາດ ເພື່ອການພັດທະນາ (UNDP) ເເລະ ກະຊວງເເຜນການ ເເລະການລົງທຶນໄດ້ເປີດຕົວບົດລາຍງານການພັດທະນາຊັບພະນາກອນມະນຸດເເຫ່ງຊາດ (NHDR) ທີ່ແນໃສ່ກ່ຽວກັບ “ຊາວໜຸ່ມທີ່ເປັນຜູ້ຂັບເຄື່ອນສໍາຄັນໃນການພັດທະນາເເບບຍືນຍົງ” ຊຶ່ງບົດລາຍງານໄດ້ຊີ້ໃຫ້ເຫັນວ່າ ສປປ ລາວ ເປັນປະເທດໜຶ່ງໃນບັນດາອາຊີອາຄະເນ ທີ່ມີການເຕີບໃຫຍ່ທາງດ້ານປະຊາກອນໄວໜຸ່ມໄວທີ່ສຸດ ແລະ ກໍາລັງມີການປ່ຽນເເປງສັດສ່ວນການຂະຫຍາຍຕົວຂອງປະຊາກອນອີກທັງມີຈໍານວນປະຊາກອນຜູ້ອອກແຮງງານ ອາຍຸ 20-64 ປີ ທີ່ເປັນຜູ້ເສຍພາສີ ເເລະປະກອບສ່ວນເຂົ້າໃນການພັດທະນາເສດຖະກິດໃຫ້ມີການຂະຫຍາຍຕົວຫຼາຍກວ່າຈໍານວນປະຊາກອນຜູ້ທີ່ມີການເອື່ອຍອີງເເຮງງານ ອາຍຸ 0-19 ປີ ເເລະ ອາຍຸ 65 ປີຂື້ນໄປທີ່ຕ້ອງໄດ້ອາໄສການເບິ່ງເເຍງດູເເລ ເເລະການບໍລິການອື່ນໆ.

ບົດລາຍງານ ການພັດທະນາຊັບພະຍາກອນມະນຸດເເຫ່ງຊາດໄດ້ຄົ້ນຄວ້າກ່ຽວກັບສະພາວະຂອງຊາວໜຸ່ມ ສປປ ລາວ ໃນປັດຈຸບັນບໍ່ວ່າຈະກ່ຽວກັບບັນຫາສິ່ງທ້າທາຍທີ່ພວກເຂົາພົບພໍ້ ບັນດາກາລະໂອກາດທີ່ພວກເຂົາມີ ເເລະ ຄວາມມຸ່ງມາດປາຖະໜາທີ່ພວກເຂົາມີຕໍ່ອະນາຄົດ ພ້ອມນັ້ນບົດລາຍງານຍັງໄດ້ເກັບກໍາເອົາສະພາບການດໍາລົງຊີວິດຂອງໄວໜຸ່ມໃນ ສປປ ລາວ ເຊິ່ງລວມເອົາທັງບັນດາໄວໜຸ່ມທີ່ເປັນກຸ່ມຄົນດ້ອຍໂອກາດ ເຊັ່ນ ໄວໜຸ່ມຍິງທີ່ມີຄວາມພິການເເຮງງານເຄື່ອນຍ້າຍໄວໜຸ່ມ ໄວໜຸ່ມຊົນເຜົ່າກູ່ມນ້ອຍໄວໜຸ່ມໃນກຸ່ມຄົນທີ່ມີຄວາມຫຼາກຫຼາຍທາງເພດ ເເລະໄວໜຸ່ມທີ່ມາຈາກເຂດຊົນນະບົດ ເເລະຫ່າງໄກສອກຫຼີກເຊິ່ງຜ່ານເນື້ອໃນຜົນການສໍາຫຼວດຂອງບົດລາຍງານໄດ້ໃຫ້ຂໍ້ເເນະນໍາທີ່ສໍາຄັນຕໍ່ເເຕ່ລະຂົງເຂດເຊັ່ນ: ການຈ້າງງານການສຶກສາ ສຸຂະພາບ ເເລະການມີສ່ວນຮ່ວມໃນການຕັດສິນໃຈວຽກງານສໍາຄັນ ເຊິ່ງມີຈຸດປະສົງໃນການສົ່ງເສີມບົດບາດຂອງໄວໜຸ່ມທີ່ເປັນຜູ້ກະຕຸກຊຸກຍູ້ອັນສໍາຄັນໃນການພັດທະນາເເບບຍືນຍົງ.

ທ່ານ ດຣ ສະຖາບັນດິດ ອິນສີຊຽງໃໝ່ ໄດ້ກ່າວວ່າ: “ບົດລາຍງານ ໄດ້ສ່ອງເເສງໃຫ້ເຫັນເຖິງຄວາມເອົາໃຈໃສ່ຂອງລັດຖະບານ ໃນການສົ່ງເສີມໄວໜຸ່ມ ແລະເນັ້ນໜັກໃສ່ບັນຫາທີ່ສໍາຄັນ ແລະຮີບດ່ວນສໍາລັບພວກເຮົາສ້າງຄວາມເຂັ້ມເເຂງການລົງທຶນຕໍ່ໄວໜຸ່ມເພື່ອພັດທະນາໃຫ້ເກີດການປັນຜົນດ້ານປະຊາກອນ. ບົດລາຍງານຊຸດນີ້ໄດ້ໃຫ້ຄໍາເເນະນໍາທີ່ຊັດເຈນທີ່ຮຽກຮ້ອງໃຫ້ມີຄູ່ຮ່ວມພັດທະນາທີ່ເຂັ້ມເເຂງໃນໄລຍະທົດສະວັດທີ່ກໍາລັງຈະມາເຖິງນີ້ເພື່ອສາມາດບັນລຸເປົ້າໝາຍບູລິມະສິດທີ່ສໍາຄັນຂອງ ສປປ ລາວ ຕາມເເຜນພັດທະນາເສດຖະກິດ-ສັງຄົມເເຫ່ງຊາດຄັ້ງທີ 9.” ແລະອື່ນໆ.

ການເປີດຕົວບົດລາຍງານຄັ້ງນີ້ຈັດຂຶ້ນວັນທີ 8 ພະຈິກ 2022 ຢູ່ໂຮງແຮມຄຣາວພລາຊານະຄອນຫຼວງວຽງຈັນ ໂດຍການເປັນປະທານຂອງທ່ານ ສະຖາບັນດິດ ອິນສີຊຽງໃໝ່ ຮອງລັດຖະມົນຕີກະຊວງແຜນການ ເເລະການລົງທຶນ ທ່ານ ນາງ ຮິຄາດາ ຣີເກີ້ ຜູ້ຕາງໜ້າອົງການສະຫະປະຊາຊາດເພື່ອການພັດທະນາພ້ອມດ້ວຍຜູ້ຕາງໜ້າອົງການຈັດຕັ້ງສາກົນຄູ່ຮ່ວມພັດທະນາ ແລະໄວໜຸ່ມທີ່ເຂົ້າຮ່ວມຜ່ານລະບົບເຊິ່ງໜ້າ ແລະອອນລາຍຫຼາຍກວ່າ 7.000 ຄົນ.
ຂ່າວ - ພາບ : ລັດເວລາ

แชร์