ບໍ່ແກ້ວ ຮັບຮອງພະທາດສຸວັນນະຜ້າຄຳ ເປັນມໍລະດົກແຫ່ງຊາດລະດັບທ້ອງຖິ່ນ

ແຂວງບໍ່ແກ້ວ ໄດ້ຈັດພິທີປະກາດຮັບຮອງພະທາດສຸວັນນະຜ້າຄຳ ເປັນມໍລະດົກແຫ່ງຊາດປະເພດວັດຖຸລະດັບທ້ອງຖິ່ນ ຂຶ້ນໃນວັນທີ່ 7 ພະຈິກ ຜ່ານມານີ້ ທີ່ວັດທາດສຸວັນນະຜ້າຄຳ ບ້ານຕີນທາດ ເມືອງຫ້ວຍຊາຍ ແຂວງບໍ່ແກ້ວ ຊຶ່ງມີພະອາຈານໃຫຍ່ອາດຍາທັມ ຄຳເງິນ ຄຳວົງ ປະທານອົງການພຸດທະສາສະໜາສຳພັນລາວ ແຂວງບໍ່ແກ້ວ, ທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວ, ມີທ່ານ ວັນສີ ກົວມົວ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໃນພິທີ ທ່ານ ບົວຄົງ ນາມມະວົງ ໄດ້ຈູດທຽນໄຊບູຊາໄຫວ້ພະຣັດຕະນະໄຕ. ຈາກນັ້ນ, ການນຳພັກ-ລັດຈາກສູນກາງ ແລະ ທ້ອງຖິ່ນກໍໄດ້ຈູດທຽນບູຊາ 9 ດວງ ເພື່ອສະແດງເຖິງໂລກຸດຕະລະທັມສູງສຸດໃນພະພຸດທະສາສະໜາ ພ້ອມດຽວກັນນີ້, ຄະນະກຳມະການມໍລະດົກແຫ່ງຊາດລະດັບທ້ອງຖິ່ນໄດ້ລາຍງານການກະກຽມດ້ານຮູບການ, ການຈັດຕັ້ງປະຕິບັດ, ຂໍ້ສະດວກ ແລະ ຫຍຸ້ງຍາກໃນການກະກຽມຈັດພິທີຮັບຮອງເອົາພະທາດສຸວັນນະຜ້າຄຳ ເປັນມໍລະດົກແຫ່ງຊາດປະເພດວັດຖຸລະດັບທ້ອງຖິ່ນ, ປະຫວັດຄວາມເປັນມາຂອງພະທາດສຸວັນນະຜ້າຄຳ ແລະ ຜ່ານຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຮັບຮອງເອົາພະທາດສຸວັນນະຜ້າຄຳ ເປັນມໍລະດົກແຫ່ງຊາດປະເພດວັດຖຸລະດັບທ້ອງຖິ່ນ; ເປັນກຽດມອບໃບຢັ້ງຢືນຄັ້ງນີ້ໂດຍແມ່ນ ທ່ານ ບົວຄົງ ນາມມະວົງ ແລະ ຕາງໜ້າຮັບໂດຍແມ່ນ ທ່ານ ສົມຄິດ ວົງປັນຍາ ຫົວໜ້າພະແນກ ຖວທ ແຂວງ, ພ້ອມທັງລັ່ນຄ້ອງ 9 ບາດເພື່ອເປັນສິລິມຸງຄຸນໃຫ້ແກ່ພິທີດັ່ງກ່າວ. ໃນພິທີພະອາຈານໃຫຍ່ອາດຍາທັມ ຄຳເງິນ ຄຳວົງ ໄດ້ມອບໃບຢັ້ງຢືນປະກາດຮັບຮອງວັດທາດສຸວັນນະຜ້າຄຳ ເປັນສູນປະຕິບັດທັມປະຈຳແຂວງ, ຕາງໜ້າຮັບໂດຍແມ່ນພະອາຈານ ແຮສະຫວັນ ສີລາຈັນ ເຈົ້າອາທິການວັດທາດສຸວັນນະຜ້າຄຳ.

ໂອກາດນີ້ທ່ານເຈົ້າແຂວງ ໄດ້ເນັ້ນໜັກໃຫ້ເອົາໃຈໃສ່ທາງດ້ານການແບ່ງຂັ້ນຄຸ້ມຄອງໃຫ້ລະອຽດລະຫວ່າງ ອົງການພຸດທະສາສະໜາສຳພັນລາວແຂວງກັບເມືອງ, ບັນດາຂະແໜງການທີ່ກ່ຽວຂ້ອງ, ອົງການປົກຄອງບ້ານ. ພະແນກ ຖວທ ແຂວງ ຕ້ອງໄດ້ເກັບຮັກສາເອກະສານຂຶ້ນທະບຽນກ່ຽວກັບມໍລະດົກແຫ່ງຊາດ ໂດຍເກັບມ້ຽນໃນຖານປຶ້ມຂໍ້ມູນ ຫຼື ຫ້ອງເກັບມ້ຽນສະເພາະບໍ່ໃຫ້ຕົກເຮ່ຍເສຍຫາຍ ພ້ອມທັງສືບຕໍ່ໂຄສະນາເຜີຍແຜ່ໃຫ້ທຸກພາກສ່ວນເຫັນໄດ້ຄວາມໝາຍ ຄວາມສຳຄັນ ແລະ ເຊີນຊວນນັກທ່ອງທ່ຽວພາຍໃນ ແລະ ຕ່າງປະເທດເຂົ້າມາທ່ຽວຊົມໃຫ້ຫຼາຍຂຶ້ນ, ເອົາໃຈໃສ່ອະນຸລັກ, ປົກປັກຮັກສາມໍລະດົກແຫ່ງຊາດລະດັບທ້ອງຖິ່ນທີ່ໄດ້ຮັບຮອງໃນຄັ້ງນີ້ໃຫ້ໝັ້ນຄົງຕະຫຼອດໄປ.

ຂ່າວ: ຄຳໄຊ ລີໄຊມົວຕູ້, ພາບ: ຄຳພັນ ແກ້ວມະນີ

แชร์