ມວນຊົນແຫ່ຜາສາດເຜິ້ງ ໃນງານບຸນນະມັດສະການພະທາດຫລວງວຽງຈັນ

ພິທີແຫ່ຜາສາດເຜິ້ງ ໃນງານບຸນນະມັດສະການພະທາດຫລວງວຽງຈັນ ໄດ້ດຳເນີນແຕ່ເວລາ 13:30 ນາທີ ໂດຍໄດ້ເຕົ້າໂຮມກັນທີ່ວັດຫນອງບອນ ແລ້ວແຫ່ເຂົ້າມາກົມມະລຽນທາດຫລວງ 3 ຮອບ ເພື່ອເປັນການບູຊາ ຄຸນພະພຸດ ພະທັມ ແລະ ພະສົງ ໂດຍມີຂະບວນພະສົງອອກຫນ້າ ແລະ ການນຳພັກລັດໂດຍການນຳພາຂອງທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີພ້ອມດ້ວຍຂະບວນມວນຊົນຈາກຫລາຍພາກສ່ວນຮ່ວມແຫ່ຢ່າງຟົດຟື້ນມ່ວນຊື່ນເຕັມໄປດ້ວຍຄວາມຮັກແພງສາມັກຄີຂອງປວງຊົນລາວທັງຊາດ ພ້ອມທັງ ຮັກສາໄດ້ດ້ານວັດທະນະທຳ ແລະ ຮີດຄອງປະເພນີຂອງຊາດປະເພນີແຫ່ຜາສາດເຜິ້ງເປັນອີກໜຶ່ງກິດຈະກຳທີ່ໄດ້ສືບທອດ ແລະ ປະຕິບັດໃນງານບຸນນະມັດສະການພະທາດຫຼວງວຽງຈັນມາເປັນເວລາຫຼາຍກວ່າ 4 ສະຕະວັດຜ່ານມາ ຊຶ່ງຂະບວນແຫ່ຜາສາດເຜິ້ງປີນີ້ຈະເລີ່ມໃນຕອນບ່າຍຂອງມື້ຂຶ້ນ 14 ຄໍ່າ ເດືອນ 12 ພ.ສ 2565 ກົງກັບ ວັນທີ 7 ພະຈິກ ທີ່ຜ່ານມາ ຊຶ່ງຈະມີຫຼາຍຊັ້ນຄົນໄດ້ມາເຕົ້າໂຮມຢູ່ວັດສີເມືອງ ສະຖານທີ່ສັກກາລະບູຊາຄູ່ບ້ານຄູ່ເມືອງຂອງຊາວນະຄອນຫຼວງວຽງຈັນ ກໍຄືຊາວລາວທົ່ວປະເທດກ່ອນທີ່ຈະແຫ່ໄປພະທາດຫຼວງ.

ຜາສາດເຜິ້ງທີ່ນຳມາແຫ່ນັ້ນແມ່ນເຮັດມາຈາກຕົ້ນກ້ວຍໄມ້ ແລະອື່ນໆ ພ້ອມປະດັບປະດາດ້ວຍດອກເຜິ້ງ (ຂີ້ເຜິ້ງ), ເຄື່ອງໃຊ້ເຊັ່ນ: ສໍດຳ, ປາກກາ (ບິກຂຽນ), ປຶ້ມຂຽນ ແລະ ເຄື່ອງໃຊ້ທີ່ຈໍາເປັນລວມທັງເງິນທີ່ຖືກຈັດວາງເປັນລະບຽບ ແລະ ດັດແປງເປັນຮູບແບບຕ່າງໆ ຊຶ່ງການຕົບແຕ່ງຜາສາດເຜິ້ງນັ້ນຈະມີຄວາມໝາຍຊຶ່ງສະແດງເຖິງຄວາມອຸດົມຮັ່ງມີຂອງປະຊາຊົນລາວໃນແຕ່ລະໄລຍະ ແລະ ປະເພນີ ແຫ່ຜາສາດເຜິ້ງທີ່ຈະຈັດຂຶ້ນໃນທຸກໆປີແນໃສ່ເພື່ອສືບທອດເອກະລັກ ແລະ ປົກປັກຮັກສາຮີດຄອງປະເພນີອັນດີງາມຂອງລາວໄວ້ໃຫ້ເຖິງເສັ່ນລູກ-ຫຼານ, ໃນການແຫ່ຜາສາດເຜິ້ງຈະມີມວນຊົນຊາວລາວບັນດາເຜົ່າບໍ່ວ່າຈະເປັນຜູ້ເຖົ້າ, ຜູ້ແກ່, ຊາວໜຸ່ມຍິງ-ຊາຍ, ເດັກນ້ອຍກໍໄດ້ເຂົ້າຮ່ວມຢ່າງຟົດຟື້ນມ່ວນຊື່ນ, ຜູ້ຊາຍນຸ່ງຖືສຸພາບ, ສ່ວນແມ່ຍິງເອງກໍນຸ່ງຖືຕາມເອກະລັກຂອງແມ່ຍິງລາວເຊັ່ນ: ນຸ່ງສິ້ນໄໝ, ເສື້ອໄໝ ບ່ຽງແພ ໂດຍຖືຜາສາດເຜິ້ງແຫ່ໄປຕາມຂະບວນ,ການແຫ່ຜາສາດເຜິ້ງແມ່ນປະສົມປະສານດ້ວຍສຽງຄັບ, ສຽງລໍາຈາກທ້ອງຖິ່ນຕ່າງໆທີ່ຟັງແລ້ວເປັນຕາສະອອນໃຈພ້ອມຍັງມີຂະບວນແຫ່ຜາສາດເຜິ້ງຈາກພາກສ່ວນຕ່າງໆທີ່ນຸ່ງຖືຂອງຊົນເຜົ່າຕ່າງໆ ສະແດງໃຫ້ເຫັນເຖິງການເຕົ້າໂຮມຄວາມສາມັກຄີຂອງປວງຊົນລາວບັນດາເຜົ່ານັ້ນເອງ.

ການແຫ່ຜາສາດເຜິ້ງນັ້ນຈະແຫ່ອ້ອມຮອບນອກກົມມະລຽນພະທາດຫຼວງ 3 ຮອບກ່ອນຂະບວນຈະແຫ່ຜ່ານປະຕູເບື້ອງຕາເວັນອອກເພື່ອແຫ່ອ້ອມພະທາດຫຼວງຢູ່ດ້ານໃນກົມມະລຽນ ຊຶ່ງຫຼາຍຊັ້ນຄົນແມ່ນໄດ້ນຳເອົາຜາສາດເຜິ້ງ ແລະດອກໄມ້ທູບທຽນຂອງຕົນນຳໄປວາງໄວ້ອ້ອມຮອບຕີນພະທາດຫຼວງເພື່ອເປັນການບູຊາ, ອາທິຖານຕໍ່ໜ້າພະທາດຫຼວງ ແລະຂໍພອນຕາມຄວາມເຊື່ອຖືຂອງຊາວລາວເຮົາ. ເຮັດໃຫ້ຂະບວນການແຫ່ຜາສາດເຜິ້ງໄດ້ຮັບຄວາມສົນໃຈຈາກບັນດານັກທ່ອງທ່ຽວທັງພາຍໃນ ແລະຕ່າງປະເທດໃນແຕ່ລະປີມີນັກທ່ອງທ່ຽວເຂົ້າມາຮ່ວມ ແລະ ທ່ຽວຊົມຂະບວນການດັ່ງກ່າວເປັນຈຳນວນຫຼາຍ.

ສຳລັບຜາສາດເຜິ້ງປີນີ້ແມ່ນໄດ້ກະກຽມທາງດ້ານສີລະປະການຕົບແຕ່ງຜາສາດເຜິ້ງໃຫ້ໃຫຍ່ສວຍງາມກວ່າທຸກໆປີຜ່ານມາຊຶ່ງເປັນເຜິ້ງສົດມີນໍ້າໜັກ 80 ກິໂລ, ມີຄວາມສູງ 2-3 ແມັດ ແລະຈະໄດ້ນໍາເອົາມາວາງສະແດງເອ້ໃສ່ຕໍ່ໜ້າທາງເຂົ້າພະທາດຫຼວງທັງສອງດ້ານ.
ຂ່າວ: ບຸນນິກ ມະນີ

แชร์