ມວນຊົນທົ່ວປະເທດ ຮ່ວມກັນໃສ່ບາດ ບຸນນະມັດສະການພະທາດຫຼວງວຽງຈັນ

ງານບຸນນະມັດສະການພະທາດຫຼວງວຽງຈັນ ປະຈຳປີ 2022 ໃນປີນີ້ ແມ່ນຈັດຂຶ້ນດ້ວຍຄວາມເບີກບານມ່ວນຊື່ນຊຶ່ງເລີ່ມແຕ່ວັນທີ 4-8 ພະຈິກ 2022 ເປັນງານບຸນປະເພນີປະຈຳຊາດລາວເຮົາທີ່ສືບທອດຊຶ່ງໄດ້ປະຕິບັດກັນມາເປັນປະຈຳຂອງທຸກໆປີ ແລະ ໃນມື້ສຸດທ້າຍຂອງງານນີ້ແມ່ນກົງກັບວັນທີ 8 ພະຈິກ 2022 (ມື້ຂຶ້ນ 15 ຄໍ່າ ເດືອນ 12 ລາວ) ໃນຕອນເຊົ້າໄດ້ມີພິທີໃສ່ບາດຖວາຍສັງຄະທານຕາມຮີດຄອງປະເພນີລາວ ໂດຍມີທ່ານ ທອງລຸນ ສີສຸລິດ ປະທານປະເທດພ້ອມພັນລະຍາ, ທ່ານ ພັນຄຳ ວິພາວັນ ນາຍົກລັດຖະມົນຕີ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ພ້ອມການນຳຂັ້ນສູງພັກ-ລັດ ພໍ່ແມ່ປະຊາຊົນພາຍໃນ ແລະຕ່າງປະເທດເຂົ້າຮ່ວມຢ່າງຟົດຟື້ນ.

ການໃສ່ບາດຖວາຍສັງຄະທານເພື່ອເປັນການຮັກສາ ແລະເສີມຂະຫຍາຍງານບຸນປະເພນີທີ່ເຄີຍສືບທອດກັນມາແຕ່ບູຮານນະການໃຫ້ດຳລົງຄົງຢູ່ນຳຊາວລາວຕະຫຼອດໄປ ທັງເປັນການເຕົ້າໂຮມຄວາມສາມັກຄີໃຫ້ເປັນປຶກແຜ່ນຮັກສາໄດ້ວັດທະນະທໍາຮີດຄອງປະເພນີອັນດີງາມຂອງຊາດລາວທີ່ເຄີຍສືບທອດກັນມາແຕ່ດຶກດໍາບັນໃຫ້ຢູ່ຄຽງຄູ່ກັບຄົນລາວທີ່ເກີດໃໝ່ໃຫຍ່ລຸນໄດ້ສືບທອດ ແລະເສີມຂະຫຍາຍມູນເຊື້ອດັ່ງກ່າວໃຫ້ມີຄວາມຍືນຍົງຕະຫຼອດໄປຊົ່ວເຊັ່ນລູກເຊັ່ນຫຼານ.

แชร์