ກະຊວງ ຖວທ ຍົກລະດັບວຽກງານຄຸ້ມຄອງວັດທະນະທຳ

ໃນວັນທີ 7 ພະຈິກ 2022, ກະຊວງຖະແຫລງຂ່າວວັທດນະທະທຳ ແລະທ່ອງທ່ຽວ (ຖວທ) ໄດ້ຈັດຊຸດຝຶກອົບຮົມໃຫ້ບຸກຄະລາກອນກ່ຽວກັບວຽກງານຄຸ້ມຄອງວັດທະນະທຳ ໃນໄລຍະໃໝ່, ການຄຸ້ມຄອງສິລະປະການສະແດງ ແລະບໍລິຫານມໍລະດົກວັດທະນະທຳ. ທັງນີ້ເພື່ອສືບຕໍ່ປະຕິບັດແນວທາງປ່ຽນແປງໃໝ່ຮອບດ້ານຢ່າງມີຫລັກການຂອງພັກ ແລະ ຜັນຂະຫຍາຍແຜນພັດທະນາວຽກງານ ຖວທ ທີ່ກະຊວງພວກເຮົາວາງອອກໃຫ້ເຂົ້າສູ່ການປະຕິບັດຕົວຈິງ, ທັງເຮັດໃຫ້ວຽກງານນີ້ໄດ້ຮັບການອະນຸລັກຮັກສາ ແລະພັດທະນາຂຶ້ນຢ່າງບໍ່ຢຸດຢັ້ງ.

ໂອກາດນີ້, ທ່ານ ຄຳຫຼ້າ ຍອຍສາຍຄຳ ຫົວໜ້າສະຖາບັນສື່ມວນຊົນ, ວັດທະນະທຳ ແລະທ່ອງທ່ຽວ ກ່າວວ່າ: ວຽກງານວັດທະນະທໍາຕ້ອງໄດ້ປົກປັກຮັກສາ, ຄົ້ນຄ້ວາ, ເຜີຍແຜ່, ບູລະນະສ້າງເສີມຄຸນຄ່າມູນມໍລະດົກທາງວັດທະນະທໍາ, ຮີດຄອງປະເພນີອັນດີງາມຂອງຊາດ, ການດໍາລົງຊີວິດ, ການທໍາມາຫາກິນຢ່າງມີຫົວຄິດປະດິດສ້າງທີ່ຕິດພັນກັບແບບແຜນການດໍາລົງຊິວິດ, ຄວາມເຊື່ອຖື, ຄ່ານິຍົມລວມທັງ ພາສາວັນນະຄະດີ, ສິລະປະດົນຕີ, ຂັບລໍ, ຮ້ອງ, ຟ້ອນ, ການນຸ່ງຖື ແລະມູນເຊື້ອການອອກແຮງງານທີ່ຕິດພັນກັບພູມປັນຍາທາງດ້ານຮູບປະທໍາ ແລະ ນາມມະທໍາ, ສາມາດນໍາມາຊົມໃຊ້ໃນຊີວິດປະຈໍາວັນລວມທັງການແລກປ່ຽນຊື້-ຂາຍຮຸບ ແບບຜະລິດຕະພັນຕ່າງໆ ທີ່ສາມາດສ້າງລາຍຮັບເພື່ອແກ້ໄຂຊີວິດການເປັນຢູ່ຂອງປະຊາຊົນລາວບັນດາເຜົ່າໃຫ້ລຸດພົ້ນອອກຈາກຄວາມທຸກຍາກ ແລະມີການພັດທະນາໃຫ້ຮັ່ງມີ ແລະອຸດົມສົມບູນຂຶ້ນເລື້ອຍໆ.

ທ່ານ ຄຳຫຼ້າ ຍອຍສາຍຄຳ ກ່າວອີກວ່າ: ວຽກງານຄຸ້ມຄອງ ແລະສົ່ງເສີມວັດທະນະທໍາເປັນວຽກງານໜຶ່ງທີ່ສໍາຄັນທີ່ສຸດຂອງການປະຕິວັດເຮົາໂດຍສະເພາະໃນພາລະກິດສ້າງອະລິຍະທໍາທາງດ້ານຈິດໃຈໃຫ້ແກ້ປະຊາຊົນລາວບັນດາເຜົ່າຢ່າງມີຫລັກການ, ມີວິທະຍາສາດພ້ອມທັງມີການດັດສົມໃຫ້ແທດເຫນາະກັບສະພາບເສດຖະກິດວັດທະນະທໍາ-ສັງຄົມ ໃນໄລຍະໃໝ່ເຊິ່ງມີຄວາມຈໍາເປັນໄດ້ສຶກສາຮຽນຮູ້ ແລະເກັບກໍາຂໍ້ມູນລະອຽດເພື່ອວາງແຜນໃນການຄຸ້ມຄອງລັດ-ຄຸ້ມຄອງສັງຄົມໃຫ້ຮັດກຸມພ້ອມທັງສຸມໃສ່ເປົ້າໝາຍການພັດທະນາໃຫ້ໄປຖືກທິດຕາມແນວທາງຂອງພັກ-ລັດ ຕິດພັນກັບສອງວາລະແຫ່ງຊາດທີ່ລັດຖະບານວາງອອກ, ຕິດພັນກັບແຜນພັດທະນາເສດຖະກິດ-ສັງຄົມແຫ່ງຊາດ.
ຂ່າ ສົມຫວັງ -ພາບ ອ່າຍຄຳ

• 07/11/2022