ອະດີດທະຫານອາສາສະໝັກ ແລະຊ່ຽວຊານຫວຽດນາມຢ້ຽມຢາມ ແຂວງຈໍາປາສັກ

ແຫຼ່ງຂ່າວຈາກ ແຂວງຈໍາປສັກ ໃຫ້ຮູ້ວ່າ: ຄະນະປະສານງານທົ່ວປະເທດອະດີດທະຫານອາສາສະໝັກ ແລະຊ່ຽວຊານຫວຽດນາມຊ່ວຍເຫຼືອລາວນໍາໂດຍທ່ານ ພັນເອກ ເລ ກວາງ ຮ່ວນ ຮອງຫົວໜ້າ ຄະນະປະສານງານທົ່ວປະເທດ ອະດີດທະຫານອາສາສະມັກ ແລະ ຊ່ຽວຊານຫວຽດນາມ ໄດ້ມາຢ້ຽມຢາມ ແຂວງຈໍາປາສັກ ໃນວັນທີ 4 ພະຈິກ ຜ່ານມາ ໂດຍການຕ້ອນຮັບຈາກ ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ, ທັງເປັນປະທານສະມາຄົມມິດຕະພາບລາວ-ຫວຽດນາມ ແຂວງຈຳປາສັກ, ມີ ທ່ານ ພັນເອກ ບຸນມາກ ວິລະວົງ ປະທານສະຫະພັນນັກຮົບເກົ່າແຂວງຈຳປາສັກ ພ້ອມຄະນະເຂົ້າຮ່ວມ.

ໂອກາດນີ້, ກໍໄດ້ມີການພົບປະສອງຝ່າຍໂດຍທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກກໍໄດ້ສະແດງການຕ້ອນຮັບ ແລະຕີລາຄາສູງຕໍ່ການມາເຄື່ອນໄຫວຢ້ຽມຢາມດັ່ງກ່າວ, ເຊິ່ງເປັນການເສີມສ້າງສາຍພົວພັນມິດຕະພາບອັນຍິ່ງໃຫຍ່,ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ສອງຊາດ ລາວ-ຫວຽດນາມ ໃຫ້ນັບມື້ພັດທະນາເຂົ້າສູ່ລວງເລິກໂດຍສະເພາະການຮ່ວມມືລະຫວ່າງ ຄະນະປະສານງານທົ່ວປະເທດອະດີດທະຫານອາສາສະໝັກ ແລະຊ່ຽວຊານຫວຽດນາມຊ່ວຍເຫລືອລາວກັບສະຫະພັນນັກຮົບເກົ່າແຂວງຈຳປາສັກໃຫ້ມີຄວາມແໜ້ນແຟ້ນຍິ່ງໆຂື້ນ.

ໂອກາດດຽວກັນນີ້, ທ່ານ ພັນເອກ ເລ ກວາງ ຮ່ວນ ກໍໄດ້ສະແດງຄວາມຂອບໃຈຕໍ່ການຕ້ອນຮັບ ອັນອົບອຸ່ນ ແລະໄດ້ແຈ້ງຈຸດປະສົງຂອງການມາເຄື່ອນໄຫວຢ້ຽມຢາມ ແຂວງຈຳປາສັກ ໂດຍສະເພາະແມ່ນຊົມເຊີຍໃຫ້ແກ່ການສະເຫລີມສະຫລອງ 2 ວັນປະຫວັດສາດ ລາວ-ຫວຽດນາມ,ແລະເປັນການເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະປະຊາຊົນສອງຊາດລາວ-ຫວຽດນາມ, ພ້ອມນັ້ນກໍເພື່ອເປັນການຮັດແໜ່ນການຮ່ວມມື ກັບ ທ້ອງຖິ່ນຂອງລາວ.

ໃນໂອກາດຢ້ຽມຢາມແຂວງຈໍາປສັກຄັ້ງນີ້, ທ່ານ ພັນເອກ ເລກວາງ ຮ່ວນ ພ້ອມຄະນະ ຍັງໄດ້ເຂົ້າວາງພວງມາລາທີ່ອານຸສາວະລີຮ່ວມສຳພັນສູ້ຮົບ ລາວ-ຫວຽດນາມ ຢູ່ເມືອງປາກຊ່ອງ, ຢ້ຽມຢາມກົງສູນໃຫຍ່ ສສ ຫວຽດນາມ ປະຈຳພາກໃຕ້ລາວ, ພົບປະຢ້ຽມຢາມສະມາຄົມຫວຽດນາມ ແລະຢ້ຽມຢາມກອງພົນທະຫານຮາບ ທີ 5 ຕື່ມອີກ.
ຂ່າວ: ທັດຊະນະ

แชร์