ນາຍົກລັດຖະມົນຕີ ຕ້ອນຮັບຄະນະຜູ້ແທນ ສສ ຫວຽດນາມ

ສະຫາຍ ພັນຄໍາ ວິພາວັນ ກຳມະການກົມການເມືອງສູນກາງພັກ ນາຍົກລັດຖະມົນຕີແຫ່ງ ສປປ ລາວ ໄດ້ຕ້ອນຮັບສະຫາຍ ພົວ ຮວິ່ງ ດັກ ເຮືອງ ຫົວໜ້າຄະນະປະສານງານທົ່ວປະເທດອະດີດທະຫານອາສາສະໝັກ ແລະຊ່ຽວຊານການທະຫານຫວຽດນາມ ຊ່ວຍການປະຕິວັດລາວ ພ້ອມດ້ວຍຄະນະ ແລະ ຕ້ອນຮັບ ສະຫາຍ ເຈິ່ນ ສີ ແທ່ງ ກໍາມະການສູນກາງພັກຮອງເລຂາຄະນະພັກປະທານຄະນະກໍາມະການປະຊາຊົນນະຄອນຫຼວງຮ່າໂນ້ຍ ສສ ຫວຽດນາມ ໃນວັນທີ 4 ພະຈິກນີ້ ທີ່ສໍານັກງານນາຍົກລັດຖະມົນຕີ.

ໂອກາດນີ້, ສະຫາຍ ນາຍົກລັດຖມົນຕີໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງຕໍ່ ຄະນະຜູ້ແທນ ສສ ຫວຽດນາມ ທັງ 2 ຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້ ຊຶ່ງຢູ່ໃນບັນຍາກາດທີ່ສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ ພວມສະເຫຼີມສະຫຼອງ ປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ 2022 ກໍຄື ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະການຮ່ວມມື ລາວ-ຫວຽດນາມ ຄົບຮອບ 45 ປີ ຢ່າງເປັນຂະບວນຟົດຟື້ນ.

ການເດີນທາງມາຢ້ຽມຢາມ ສປປ ລາວ ຂອງຄະນະຜູ້ແທນ ສສ ຫວຽດນາມທັງ 2 ຄະນະດັ່ງກ່າວຍັງເປັນການປະກອບສ່ວນສຳຄັນໃນການຮັດແໜ້ນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫຫວ່າງສອງພັກ, ສອງລັດ ແລະປະຊາຊົນສອງຊາດ ລາວ-ຫວຽດນາມໃຫ້ນັບມື້ເຂົ້າສູ່ລວງກວ້າງ ແລະລວງເລິກ ເວົ້າລວມ, ເວົ້າສະເພາະແມ່ນການພົວພັນຮ່ວມມືໃນຂົງເຂດວຽກງານສະຫະພັນນັກຮົບເກົ່າລາວ ແລະຫວຽດນາມ ແລະການພົວພັນຮ່ວມມືລະຫວ່າງ ນະຄອນຫຼວງວຽງຈັນ ແລະນະຄອນຫຼວງຮ່າໂນ້ຍ ໃຫ້ໄດ້ຮັບການພັດທະນາ ແລະຂະຫຍາຍຕົວຍິ່ງຂຶ້ນ ແລະສືບຕໍ່ໃຫ້ການຊ່ວຍເຫຼືອຊຶ່ງກັນ ແລະ ກັນຕະຫຼອດໄປ, ພ້ອມນັ້ນສະຫາຍນາຍົກລັດຖະມົນຕີຍັງໄດ້ສະແດງຄວາມຂອບໃຈຕໍ່ພັກ, ລັດຖະບານ ແລະປະຊາຊົນຫວຽດນາມ ອ້າຍນ້ອງທີ່ຍາມໃດກໍໄດ້ໃຫ້ການຊ່ວຍເຫຼືອຢ່າງທັນການແກ່ ສປປ ລາວ ມາໂດຍຕະຫຼອດ.

ໃນໂອກາດດັ່ງກ່າວຕາງໜ້າຄະນະຜູ້ແທນທັງ 2 ຄະນະ ໄດ້ສະແດງຄວາມຂອບໃຈຕໍ່ ສະຫາຍ ພັນຄຳ ວິພາວັນ ທີ່ໄດ້ໃຫ້ກຽດຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງແຈ້ງຈຸດປະສົງຂອງການເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃຫ້ສະຫາຍນາຍົກລັດຖະມົນຕີໄດ້ຮັບຊາບ.
ຂ່າວ: ນາງແສງຈັນ

แชร์