ສະຫາຍເລຂາທິການໃຫຍ່ຕ້ອນຮັບ ສະຫາຍ ພົຈ. ຮວິ່ງ ດັກເຮືອງ ພ້ອມຄະນະເຂົ້າຢ້ຽມຂໍ່ານັບ

ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະທານປະເທດ ແຫ່ງ ສປປ ລາວ ໄດ້ຕ້ອນຮັບ ສະຫາຍ ພົຈ. ຮວິ່ງ ດັກເຮືອງ ຫົວໜ້າຄະນະປະສານງານທົ່ວປະເທດ ອະດີດຫົວໜ້າຄະນະຊ່ຽວຊານປະທານທະຫານອາສາສະໝັກຫວຽດນາມ ຢູ່ລາວພ້ອມດ້ວຍຄະນະເຂົ້າຢ້ຽມຂໍ່ານັບໃນວັນທີ 7 ພະຈິກ ນີ້ ທີ່ຫ້ອງປະຊຸມຊັ້ນ 1 ຫ້ອງວ່າການສູນກາງພັກ; ໂອກາດທີ່ຄະນະຜູ້ແທນດັ່ງກ່າວເດີນທາງມາຢ້ຽມຢາມ ແລະເຄື່ອນໄຫວວຽກຢູ່ ສປປ ລາວ ໃນລະຫວ່າງວັນທີ 2-7 ພະຈິກ 2022.

ສະຫາຍເລຂາທິການໃຫຍ່ໄດ້ຕາງໜ້າໃຫ້ການນໍາພັກ-ລັດ ແລະປະຊາຊົນລາວບັນດາເຜົ່າໃນທົ່ວປະເທດສະແດງຄວາມຕ້ອນຮັບອັນອົບອຸ່ນ ແລະສະໜິດສະໜົມມາຍັງຄະນະຜູ້ແທນດັ່ງກ່າວ; ພ້ອມທັງສະແດງຄວາມຊົມເຊີຍ ແລະ ຕີລາຄາສູງ ໃນການເດີນທາງມາຢ້ຽມຢາມ ສປປ ລາວ ໃນຄັ້ງນີ້ ຊຶ່ງຢູ່ໃນບັນຍາກາດທີ່ສອງພັກ, ສອງລັດ, ສອງກຳລັງປະກອບອາວຸດ ແລະ ປະຊາຊົນສອງຊາດ ລາວ-ຫວຽດນາມ ພວມສະເຫຼີມສະຫຼອງປີສາມັກຄີມິດຕະພາບກໍຄືສະເຫຼີມສະຫຼອງສອງວັນປະຫວັດສາດ ລາວ ແລະ ຫວຽດນາມ ຢ່າງເປັນຂະບວນຟົດຟື້ນ ແລະມີຄວາມໝາຍເລິກເຊິ່ງ; ພ້ອມກັນນັ້ນ, ກໍໄດ້ຕີລາຄາການມາຢ້ຽມຢາມ ແລະເຮັດວຽກຂອງຄະນະໃນເທື່ອນີ້ຖືເປັນການປະກອບສ່ວນເສີມຂະຫຍາຍ ແລະເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານລາວ ແລະ ຫວຽດນາມໃຫ້ນັບມື້ເຂົ້າສູ່ລວງເລິກຍິ່ງໆຂຶ້ນ.

ໂອກາດນີ້, ສະຫາຍ ພົຈ. ຮວິ່ງ ດັກເຮືອງ ຂອບໃຈຕໍ່ສະຫາຍເລຂາທິການໃຫຍ່ທີ່ໄດ້ໃຫ້ການຕ້ອນຮັບອັນອົບອຸ່ນ ແລະສະໜິດສະໜົມຄັ້ງນີ້; ພ້ອມທັງໄດ້ແຈ້ງຈຸດປະສົງ ແລະ ຜົນສໍາເລັດໃນການມາເຄື່ອນໄຫວຢ້ຽມຢາມ ແລະ ເຮັດວຽກ ຢູ່ລາວໃນຄັ້ງນີ້; ນອກນີ້, ກໍຍັງໄດ້ຊົມເຊີຍຕໍ່ບັນດາຜົນສຳເລັດຂອງພັກ, ລັດ ແລະ ປະຊາຊົນລາວ ໃນການປົກປັກຮັກສາ ແລະພັດທະນາປະເທດຊາດ; ພ້ອມກັນນັ້ນ, ກໍໄດ້ຕີລາຄາຕໍ່ການພົວພັນຮ່ວມມືລະຫວ່າງ ລາວ-ຫວຽດນາມ.

ໃນໂອກາດດຽວກັນ, ສະຫາຍ ທອງລຸນ ສີສຸລິດ ກໍໄດ້ ຊົມເຊີຍ ແລະຕີລາຄາສູງ ຕໍ່ບັນດາຜົນສຳເລັດຂອງ ພັກ-ລັດຖະບານ ແລະປະຊາຊົນຫວຽດນາມ ອ້າຍນ້ອງ ຍາດມາໄດ້ໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດໃນໄລຍະຜ່ານມາ ເຮັດໃຫ້ ສສ ຫວຽດນາມ ນັບມື້ເຕີບໃຫຍ່ເຂັ້ມແຂງ,ມີສະຖຽນລະພາບທາງການເມືອງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນໄດ້ຮັບການພັດທະນາໃຫ້ດີຂຶ້ນຢ່າງເດັ່ນຊັດ, ບົດບາດ ແລະ ອິດທິພົນຂອງ ສສ ຫວຽດນາມ ໄດ້ຮັບການເຊີດຊູໃຫ້ສູງຂຶ້ນໃນເວທີພາກພື້ນ-ສາກົນ ແລະອວຍພອນໃຫ້ປະຊາຊົນຫວຽດນາມ ອ້າຍນ້ອງສືບຕໍ່ໄດ້ຮັບຜົນສຳເລັດອັນໃໝ່ໃຫຍ່ຫຼວງກວ່າເກົ່າໃນພາລະກິດປົກປັກຮັກສາ ແລະ ສ້າງສາພັດທະນາປະເທດ. ສະຫາຍຍັງໄດ້ຕີລາຄາການພົວພັນຮ່ວມມືລາວ-ຫວຽດນາມ ຊຶ່ງພັກ, ລັດ ແລະປະຊາຊົນລາວບັນດາເຜົ່າມີຄວາມປິຕິຊົມຊື່ນເປັນຢ່າງຍິ່ງທີ່ເຫັນວ່າ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານລະຫວ່າງ ລາວ-ຫວຽດນາມ ໄດ້ຮັບການເສີມຂະຫຍາຍເຂົ້າສູ່ທັງທາງກວ້າງ ແລະລວງເລິກ,ນັບມື້ເກີດດອກອອກຜົນຕົວຈິງໃນທຸກຂົງເຂດ ນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດລາວ ແລະ ຫວຽດນາມ ພວກເຮົາ, ປະກອບສ່ວນອັນສຳຄັນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນໄລຍະໃໝ່ຂອງສອງປະເທດລາວ ແລະຫວຽດນາມ, ກໍຄືການປະກອບສ່ວນເຂົ້າໃນພາລະກິດສັນຕິພາບ, ສະຖຽນລະພາບ,ການຮ່ວມມື ແລະການພັດທະນາໃນພາກພື້ນ ແລະໃນໂລກ.

แชร์