ບໍລິການເກັບມ້ຽນຂີ້ເຫຍື້ອ ໃນງານບຸນນະມັດສະການພະທາດຫຼວງ

ຫ້ອງການຄຸ້ມຄອງ ແລະບໍລິການຕົວເມືອງວຽງຈັນ ຮ່ວມກັບບໍລິສັດ ສະມອນບີ້ ໄດ້ຈັດກິດຈະກໍາເປີດໂຄງການຮ່ວມມືບໍລິການເກັບມ້ຽນ-ຂົນຂີ້ເຫຍື້ອ ໃນງານບຸນນະມັດສະການ ພະທາດ ຫຼວງວຽງຈັນ ປະຈໍາປີ 2022. ພ້ອມທັງຈັດກິດຈະກໍາມອບລາງວັນແຂ່ງຂັນ ການປະກວດອອກແບບ ສະຕິກເກີຕິດໃສ່ລົດຂີ້ເຫຍື້ອ ທົ່ວນະຄອນຫລວງວຽງຈັນ ຊຶ່ງເລີ່ມປະກວດມາແຕ່ເດືອນສິງຫາຜ່ານມາ. ພິທີດັ່ງກ່າວຈັດຂຶ້ນໃນວັນທີ 5 ພະຈິກ 2022 ນີ້ ໃນໂອກາດງານບຸນນະມັດສະການ ພະທາດຫລວງວຽງຈັນ ປະຈໍາປີ 2022 ຊຶ່ງຜູ້ທີ່ໄດ້ຮັບລາງວັນທີ 1 ຄື: ທ້າວ ລັດສະໝີ ທໍາມະວົງ ໄດ້ຮັບເງິນສົດ 3 ລ້ານກີບ; ລາງວັນທີ 2 ທ້າວ ຄໍາຮຸ່ງ ປະສົມສູກ 2 ລ້ານກີບ; ລາງວັນທີ 3 ຈຳນວນ 1 ລ້ານກີບ ແລະ ລາງວັນຊົມເຊີຍ 5 ແສນກີບ ຈາກມີຜູ້ສົ່ງເຂົ້າປະກວດທັງໝົດ 50 ກວ່າ ຄົນ. ມອບໂດຍ ທ່ານ ສູນທອນ ທໍາມະວົງ ຜູ້ອໍານວຍບໍລິສັດ ສະມອນບີ້.

ໂອກາດນີ້, ທ່ານ ນິວອນ ຄຳບັນ ຫົວໜ້າການຕະຫລາດ ບໍລິສັດ ສະມອນບີ້ ໃຫ້ຮູ້ວ່າວ່າ: ໃນການສະ ເຫລີມສະຫລອງບຸນນະມັດສະການພະທາດຫລວງວຽງຈັນ ປີນີ້, ພາກສ່ວນທີ່ກ່ຽວຂ້ອງໄດ້ຈັດງານບຸນຢ່າງຍິ່ງໃຫຍ່ປະກອບມີຫລາຍກິດຈະກຳທີ່ສຳຄັນ ແລະມີຫລາຍບໍລິສັດຫລາຍຫ້າງຮ້ານເຂົ້າຮ່ວມວາງສະແດງ ແລະຈຳໜ່າຍສິນຄ້າລວມເຖິງມວນຊົນກໍໄດ້ເດີນທາງເຂົ້າມາທ່ຽວຊົມ ແລະ ສັກກາ ລະບູຊາພະທາດຫລວງ ຈໍານວນຫລວງຫລາຍໃນແຕ່ລະວັນ ເຊິ່ງປີນີ້ທາງບໍລິສັດສະມອນບີ້ໄດ້ຖືກຮັບມອບໝາຍໃຫ້ເຮັດໜ້າທີ່ຮັກສາຄວາມສະອາດໃນງານບຸນພະທາດຫລວງວຽງຈັນ. ໃນການປະ ຕິບັດໜ້າທີ່ຮັກສາຄວາມສະອາດນັ້ນແມ່ນໄດ້ແບ່ງອອກເປັນ 2 ພາກສ່ວນ: ພາກສ່ວນໜຶ່ງແມ່ນພາກສ່ວນອະນາໄມ ແລະການຈັດວາງຖັງຕາມຈຸດຕ່າງໆໃນງານບຸນ ຈໍານວນ 300 ກວ່າຖັງ ເພື່ອໃຫ້ປະຊາຊົນຜູ້ເດີນທາງມາທ່ຽວ ຊົມໄດ້ຖິ້ມຂີ້ເຫຍື້ອລົງຖັງ ແລະ ຫລັງຈາກນັ້ນ ຈະມີທີມງານອະນາ ໄມເຮັດໜ້າທີ່ອະນາໄມ ທັງກາງເວັນ ແລະ ກາງຄືນ.

ຊຶ່ງທ່ານ ນິວອນ ຄໍາບັນ ກ່າວຕື່ມວ່າ: ສໍາລັບທີມງານອະນາໄມກາງເວັນແມ່ນໄດ້ເບິ່ງຄືນຕິດຕາມເກັບມ້ຽນຂີ້ເຫຍື້ອທາງເບື້ອງເຂົ້າພະທາດຫລວງ ແລະດ້ານໃນອົງພະທາດຫລວງ ຖ້າກໍລະນີ ຖັງຂີ້ເຫຍື້ອ ເຕັມຖັງກໍນໍາມ້ຽນຂີ້ເຫື້ອຍອອກໄປຖິ້ມ, ສ່ວນຕອນກາງຄືນ ແມ່ນໄດ້ເຮັດການຂົນສົ່ງເອົາ ຂີ້ເຫຍື້ອອອກໄປຖິ້ມມື້ໜຶ່ງສະເລ່ຍ 10-15 ຖ້ຽວຕໍ່ມື້, ໃນການອະນາໄມເດີນພະທາດຫລວງໃນເວລາກາງຄືນນັ້ນຈະນໍາໃຊ້ພະນັກງານອະນາໄມ 100-150 ຄົນ ເຊິ່ງເລີ່ມອະນາໄມແຕ່ເວລາ 12:00 ໂມງ ກາງຄືນເປັນຕົ້ນໄປໃນການເກັບມ້ຽນຂີ້ເຫຍື້ອອະນາໄມທຸກໆມື້ແມ່ນໃຫ້ສຳເລັດໃນເວລາ 3:00 ໂມງເຊົ້າ ເພື່ອໃຫ້ເດີ່ນພະທາດຫລວງສະອາດຈົບງາມຕ້ອນຮັບນັກທ່ອງທ່ຽວ ທັງພາຍໃນ ແລະຕ່າງປະເທດທີ່ເຂົ້າມາທ່ຽວຊົມພາຍໃນງານ.

ສຳລັບໃນມື້ວັນທີ 7 ເຊິ່ງເປັນມື້ແຫ່ຜາສາດເຜິ້ງພວກເຮົາໄດ້ນໍາໃຊ້ລົດປະມານ 35 ຄັນ ເພື່ອຮອງຮັບການເກັບມ້ຽນຂີ້ເຫຍື້ອທີ່ອາດຈະເພີ່ມຂຶ້ນໃນວັນດັ່ງກ່າວ.
ຂ່າວ-ພາບ: ຂັນໄຊ

แชร์