ເປີດງານບຸນນະມັດສະການ ພະທາດຫຼວງວຽງຈັນ ປະຈຳປີ 2022

ງານບຸນນະມັດສະການ ພະທາດຫລວງວຽງຈັນ ແລະຕະຫຼາດນັດ ປະຈຳປີ 2022 ໄດ້ເປີດຂຶ້ນຢ່າງເປັນທາງການໃນລະຫວ່າງວັນທີ 4-8 ພະຈິກ 2022 ຊຶ່ງຄະນະຮັບຜິດຊອບໄດ້ຈັດຂຶ້ນຢ່າງຍິ່ງໃຫຍ່ທັງຢູ່ເດີ່ນກົມມະລຽນພະທາດຫຼວງ, ສະໜາມຫຼວງ ແລະຢູ່ສູນການຄ້າລາວ-ໄອເຕັກ; ໄດ້ຈັດໃຫ້ມີຫຼາກຫຼາຍກິດຈະກໍາທີ່ສອດຄ່ອງກັບຮີດຄອງປະເພນີ ແລະ ວັດທະນະທໍາອັນດີງາມຂອງຊາດລາວ. ໃຫ້ກຽດເຂົ້າຮ່ວມເປີດງານໂດຍ ທ່ານ ພັນຄໍາ ວິພາວັນ ນາຍົກລັດຖະມົນຕີ ແຫ່ງ ສປປ ລາວ, ມີບັນດາການນໍາພັກ, ລັດພ້ອມດ້ວຍແຂກຖືກເຊີນທັງພາຍໃນ ແລະຕ່າງປະເທດເຂົ້າຮ່ວມ.

ໂອກາດນີ້, ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫລວງວຽງຈັນ, ຫົວໜ້າຄະນະຊີ້ນຳຈັດບຸນ ລາຍງານໃຫ້ຮູ້ວ່າ: ບຸນນະມັດສະການພະທາດຫຼວງປີນີ້, ສະເພາະຢູ່ພາຍໃນເດີ່ນທາດຫລວງ ແລະ ສະໜາມຫລວງມີງານວາງສະແດງສິນຄ້າປະເພດຕ່າງໆ; ໃນນັ້ນ, ມີສິນຄ້າໂອດັອບ, ສິນຄ້າຄອບຄົວຕົວແບບ, ສິນຄ້າອຸດສາຫະກຳ,ກະສິກຳ ແລະບໍລິການ ທີ່ນຳມາຈາກນະຄອນຫຼວງວຽງຈັນ, ຈາກ 16 ແຂວງ ທົ່ວປະເທດ, ທັງຈາກນະຄອນ,ແຂວງມິດຕະພາບ ກໍຄື: ນະຄອນຫລວງຮ່າໂນ້ຍ ສສ ຫວຽດນາມ, ນະຄອນຄຸນໝິງ ແຂວງຫູໜານ, ແຂວງຢຸນໜານ ສປ ຈີນ, ແຂວງໜອງຄາຍ ລາຊະອານາຈັກໄທລວມທັງໝົດ 536 ຫ້ອງ; ນອກນັ້ນ, ຍັງມີການວາງສະ ແດງການທ່ອງທ່ຽວ, ເຂດທ່ອງທ່ຽວເຮືອນລາວ, ສະແດງນະວັດຕະກຳໃໝ່ ທາງລົດໄຟຄວາມໄວສູງ ແລະ ສິນຄ້າທົ່ວໄປອື່ນໆ ຈາກພາຍໃນ ແລະ ຕ່າງປະເທດ 669 ຫ້ອງ, ມີປະເພດອາຫານ-ເຄື່ອງດື່ມ, ເຂົ້າຫລາມ ປີ້ງໄກ່ ຢູ່ຂອບເຂດຮອບນອກ 146 ກວ່າຫ້ອງ ລວມທັງໝົດ 1.351 ກວ່າຫ້ອງ. ເພື່ອບໍ່ໃຫ້ມີການແອອັດ ຄະນະຮັບຜິດຊອບຈັດງານຍັງໄດ້ຈັດວາງສະແດງສິນຄ້າຢູ່ສູນການຄ້າ ລາວ-ໄອເຕັກ ໂດຍມີຈໍານວນຫ້ອງວາງສະແດງໄວ້ຮອງຮັບທັງໝົດ 480 ກວ່າຫ້ອງ.

ໃນງານຍັງມີການສະແດງສິລະປະວັນນະຄະດີຢູ່ເວທີກາງ ເຊິ່ງມີການຟ້ອນ, ຂັບລຳຈາກກອງ ສິລະປະກອນສູນກາງ, ກອງສິລະປະກອນກອງທັບ, ໜ່ວຍສິລະປະກອນຈາກ 9 ເມືອງ ພາຍໃນນະຄອນຫລວງວຽງຈັນ, ສູນວັດທະນະທຳເດັກ ແລະ ສະໂມສອນດ່ານຊ້າງ ມາເຂົ້າຮ່ວມສະແດງໃນແຕ່ລະວັນພາຍໃນບຸນ. ສະເພາະວັນທີ 6 ພະຈິກ, ເວລາ 16:00 ໂມງ ຈະມີພິທີສູດປະລິຕະມຸງ ຄຸນທີ່ພະທາດຫຼວງ, ວັນທີ 7 ພະຈິກ ເວລາ 13:30 ໂມງ ພິທີແຫ່ຜາສາດເຜິ້ງ ແລະ ໃນວັນທີ 8 ພະຈິກ ເວລາ 7:00 ໂມງ ຈະມີພິທີໃສ່ບາດຖວາຍສັງຄະທານ, ຮອດເວລາ 13:00 ໂມງ ຈະມີພິທີແຫ່ລູກຄີ ແລະແຂ່ງຂັນກິລາພື້ນບ້ານຕີຄີ, ຫຼັງຈາກນັ້ນ, ເວລາ 19:00 ໂມງ ຈະມີພິທີວຽນ ທຽນ ແລະ ຈູດທູບທຽນ, ບັ້ງໄຟສັກກະລະບູຊາອົງພະທາດ. ການຈັດງານໃນຄັ້ງນີ້ເພື່ອເປັນການອະ ນຸລັກຮັກສາ ແລະສົ່ງເສີມວັດທະນະທໍາ, ຮີດຄອງປະເພນີອັນດີງາມຂອງບຸນນະມັດສະການ ພະ ທາດຫຼວງ ຂອງຊາວລາວ ກໍຄືຊາວນະຄອນຫຼວງວຽງຈັນ ທີ່ສືບທອດກັນມາແຕ່ບູຮານນະການໃຫ້ມີຄວາມໂດດເດັ່ນ ແລະເປັນທີ່ຮັບຮູ້ໃນເວທີສາກົນ, ທັງເປັນການສ້າງໂອກາດໃນການຈັດ ຕັ້ງປະຕິບັດ 2 ວາລະແຫ່ງຊາດກໍຄືການຟື້ນຟູເສດຖະກິດ ດ້ວຍຮູບການຊຸກຍູ້ສົ່ງເສີມການທ່ອງ ທ່ຽວ, ການຄ້າ, ສິນຄ້າຄອບຄົວຕົວແບບທີ່ຈະກ້າວເປັນສິນຄ້າໂອດັອບ ທີ່ໄດ້ກາໝາຍແຫ່ງຊາດ ແລະສິນຄ້າຂອງບັນດາວິສາຫະກິດຂະໜາດນ້ອຍ ແລະກາງໄດ້ມາວາງສະແດງ ແລະຈໍາໜ່າຍສິນຄ້າທັງພາຍໃນ ແລະຕ່າງປະເທດໃຫ້ປະຊາຊົນຊາວນະຄອນຫລວງວຽງຈັນ ຕະຫລອດຮອດແຂກ ທັງພາຍໃນ ແລະ ຕ່າງປະເທດໄດ້ເຫັນ ແລະໄດ້ຊົມໃຊ້ສິນຄ້າ, ພ້ອມທັງເປັນການແລກປ່ຽນບົດຮຽນປະສົບການຕ່າງໆຂອງບັນດາຫົວໜ່ວຍທຸລະກິດດ້ວຍກັນ.
ຂ່າວ: ຂປລ

แชร์