ຍົກລະດັບຄວາມຮູ້ ຄວາມສາມາດຂອງທັນຕະແພດລາວ

ສະມາຄົມທັນຕະແພດລາວ ຈັດກອງປະຊຸມສາມັນວິທະຍາສາດ ແລະ ສາກົນດ້ານທັນຕະກໍາຄັ້ງທີ 11 ຂຶ້ນວັນທີ 3-4 ພະຈິກ 2022 ທີ່ສູນການຮ່ວມມືສາກົນ ແລະ ເຝິກອົບຮົມນະຄອນຫຼວງວຽງຈັນ (ITCT) ເປັນປະທານຂອງທ່ານ ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກມີ ທ່ານ ຄໍາຮຸ່ງ ພົມມະວົງສາ ປະທານສະມາຄົມທັນຕະແພດລາວ ພ້ອມດ້ວຍຄະນະສະມາຄົມທັນຕະແພດລາວຮອງອະທິການບໍດີມະຫາວິທະຍາໄລວິທະຍາສາດສຸຂະພາບຄະນະກົມສະຖາບັນການສຶກສາ ສະມາຊິກສະມາຄົມທັນຕະແພດລາວອາຈານທີ່ມາຈາກໄທ ຍີ່ປຸ່ນ ແລະເກົາຫຼີເຂົ້າຮ່ວມ.

ກອງປະຊຸມຄັ້ງນີ້ ໄດ້ຮັບການຮ່ວມມືຈາກຄະນະທັນຕະແພດສາດມະຫາວິທະຍາໄລວິທະຍາສາດສຸຂະພາບ ສປປ ລາວ ມູນນິທິຄົນເຈັບມະເຮັງຜົ້ງປາກແຫ່ງປະເທດໄທ ມູນນິທິທັນຕະແພດເອກະຊົນແຫ່ງປະເທດໄທຄະນະກໍາມະການທັນຕະສາທາລະນະສຸກພາກຕາເວັນອອກສ່ຽງເໜືອປະເທດໄທທັນຕະແພດພາກອິສານກະຊວງສາທາລະນະສຸກ ປະເທດໄທ ແລະໂຮງໝໍກະເສມຣາຊໂດຍກອງປະຊຸມມີຈຸດປະສົງເພື່ອແລກປ່ຽນບົດຮຽນທາງດ້ານວິຊາການກ່ຽວກັບການສົ່ງເສີມສຸຂະພາບປາກ ແລະແຂ້ວລະຫວ່າງທັນຕະແພດລາວ ແລະ ທັນຕະແພດປະເທດເພື່ອນມິດເພື່ອເປັນການຊຸກຍູ້ສົ່ງເສີມບົດຮຽນທາງດ້ານວຽກງານທັນຕະກໍາແນໃສ່ຊ່ວຍຍົກລະດັບຄວາມຮູ້ ຄວາມສາມາດຂອງທັນຕະແພດລາວໃຫ້ສູງຂຶ້ນເຊິ່ງກອງປະຊຸມໄດ້ເຊີນເອົາວິທະຍາກອນທັງພາຍໃນ ແລະ ຕ່າງປະເທດມາໃຫ້ຄວາມຮູ້ແກ່ທັນຕະແພດຂອງລາວ ເຊັ່ນ: ວິທະຍາກອນຈາກຄະນະທັນຕະແພດສາດມະຫາວິທະຍາໄລວິທະຍາສາດສຸຂະພາບວິທະຍາກອນຈາກໂຮງໝໍສູນກາງຈາກປະເທດໄທ ແລະປະເທດຍີ່ປຸ່ນ ທີ່ມາໃຫ້ຄວາມຮູ້ດ້ານວິຊາການ ເພື່ອໃຫ້ທັນຕະແພດລາວໄດ້ນໍາໄປໃຊ້ ປະກອບມີຫົວຂໍ້ສິ່ງໃດທີ່ທັນຕະແພດສາມາດເຮັດໄດ້ຈາກການນໍາໃຊ້ຢາສະໝຸນໄພຄວາມເຈັບປວດໃນໃບໜ້າ ແລະ ຜົ້ງປາກ ພະຍາດທາງລະບົບທີ່ພົວພັນເຖິງຜົ້ງປາກການປະຕິບັດຕົວຈິງໃນການປິ່ນປົວພະຍາດເຫືອກອັກເສບການແກ້ໄຂການດັດແຂ້ວໃນກໍລະນີມີການຖອນແຂ້ວ ແຂ້ວທຽມສະໜິດ ຖອດໄດ້ດ້ວຍການຮອງຮັບຈາກແຂ້ວ ແລະດ້ວຍຈີວະອ່ອນການບູລະນະດ້ວຍການຜ່າຕັດເພື່ອແກ້ໄຂກໍລະນີຜິດປົກກະຕິຂອງບໍລິເວນໃບໜ້າ ທັນຕະກໍາຮາກທຽມໃນປັດຈຸບັນທັນຕະກໍາຮາກທຽມໃນຍຸກດີຈີຕອນການນໍາສະເໜີບົດຄົ້ນຄວ້າວິທະຍາສາດໃນຮູບແບບ poster 11 ຫົວຂໍ້ ແລະ ຫົວຂໍ້ອື່ນໆທີ່ພົວພັນເຖິງວຽກງານທັນຕະກໍານອກຈາກນີ້ຍັງມີຫົວບົດສາທິດໃນການນໍາເຄື່ອງມືດ້ານທັນຕະກໍາ.

ກອງປະຊຸມຄັ້ງນີ້ຜູ້ທີ່ເຂົ້າຮ່ວມຈະໄດ້ຮັບຜົນປະໂຫຍດທາງດ້ານວິຊາການຈາກການຟັງບັນລະຍາຍຂອງວິທະຍາກອນ ແລະໄດ້ຄະແນນສະສົມເພື່ອນໍາເອົາໄປເປັນເງື່ອນໄຂຕໍ່ໃບອະນຸຍາດເຄື່ອນໄຫວວິຊາຊີບປິ່ນປົວຕາມທິດທາງຂອງສະພາຄຸ້ມຄອງວິຊາຊີບປິ່ນປົວວາງອອກພ້ອມນັ້ນບັນດາບໍລິສັດ ຫ້າງຮ້ານຈໍາໜ່າຍສິນຄ້າທັນຕະກໍາ ໄດ້ນໍາເອົາຜະລິດຕະພັນຂອງຕົນເອງເຂົ້າຮ່ວມວາງສະແດງໃນງານເພື່ອເປີດໂອກາດໃຫ້ທັນຕະແພດລາວໄດ້ພົບກັບສິນຄ້າໃໝ່ໆທີ່ມີຄວາມຈະເລີນກ້າວໜ້າຂອງຍຸກສະໄໝເຊິ່ງມີບໍລິສັດພາຍໃນປະເທດ 8 ບໍລິສັດ ແລະບໍລິສັດຈາກປະເທດໄທ 15 ບໍລິສັດ.

แชร์