ກຸ່ມບໍລິສັດນິກສັນ ຊື້-ຂາຍແຮ່ເຫຼັກຮ່ວມກັບກຸ່ມບໍລິສັດ ຫຸ້ນສ່ວນເຫຼັກຫົວຟັດ ຈຳນວນ 360.000 ໂຕນຕໍ່ປີ

ວັນທີ 1 ພະຈິກ 2022 ຢູ່ນະຄອນຫຼວງວຽງຈັນ ພິທີເຊັນສັນຍາວ່າດ້ວຍການຊື້-ຂາຍແຮ່ເຫຼັກ ລະຫວ່າງກຸ່ມບໍລິສັດ ນິກສັນ ພັດທະນາບໍ່ແຮ່ ຈໍາກັດຜູ້ດຽວ ກັບກຸ່ມບໍລິສັດ ຫຸ້ນສ່ວນເຫຼັກຫົວຟັດ ສສ ຫວຽດນາມ ຕາງໜ້າເຊັນສັນຍາຂອງທ່ານ ນິກສັນ ພົມມະວິຈິດ ປະທານກຸ່ມບໍລິສັດ ນິກສັນ ພັດທະນາບໍ່ແຮ່ ຈຳກັດຜູ້ດຽວ ເປັນຜູ້ລົງທຶນ ແລະ ຖືຫຸ້ນ 100% ແລະ ທ່ານ ເຈິນດິງລອງ ປະທານກຸ່ມບໍລິສັດ ຫົວຟັດ ສສ ຫວຽດນາມ ໂດຍມີ ທ່ານ ວັນໄຊ ແພງຊຸມມາ ເຈົ້າແຂວງຫົວພັນ ທ່ານ ສະຖາບັນດິດ ອິນສີຊຽງໃໝ່ ຮອງລັດຖະມົນຕີກະຊວງແຜນການ ແລະ ລົງທຶນ ທ່ານນາງ ຈັນສະຫວາດ ບຸກຜາ ຮອງລັດຖະມົນຕີກະຊວງພະລັງງານ ແລະບໍ່ແຮ່ມີບັນດາຫົວໜ້າກົມຫົວໜ້າຫ້ອງການກະຊວງທີ່ກ້ຽວຂ້ອງ - ຫົວໜ້າພະແນກແຜນການ ແລະການລົງທຶນແຂວງຊຽງຂວາງ ແລະຫົວໜ້າພະແນກພະລັງງານ ແລະ ບໍ່ແຮ່ ແຂວງຫົວພັນ ແລະພາກສ່ວນທີ່ກ້ຽວຂ້ອງເຂົ້າຮ່ວມ.

ພ້ອມດຽວກັນນີ້ໃນພິທີເຊັນສັນຍາປະທານກຸ່ມບໍລິສັດ ນິກສັນ ພັດທະນາບໍ່ແຮ່ ຈຳກັດຜູ້ດຽວ ໄດ້ລາຍງານຫຍໍ້ສະພາບຂອງໂຄງການຂຸດຄົ້ນປຸງແຕ່ງ ແລະສົ່ງອອກແຮ່ເຫຼັກ ເຊິ່ງບໍລິສັດໄດ້ເຊັນສັນຍາວ່າດ້ວຍການຂຸດຄົ້ນປຸງແຕ່ງ ແລະ ສົ່ງອອກແຮ່ເຫຼັກ ໃນເນື້ອທີ 12,56 ກມ2 ຄັ້ງວັນທີ 28 ຕຸລາ 2021 ໃນອາຍຸສັນຍາ 14 ປີ ຢູ່ເຂດບ້ານຖໍ້າລາ ເມືອງຮ້ຽມ ແຂວງຫົວພັນ ແລະ ເຂດເມືອງຄຳ ແຂວງຊຽງຂວາງ ພ້ອມດຽວກັນນັ້ນ ບໍລິສັດ ນິກສັນ ຍັງມີສ່ວນຮ່ວມໃນການພັດທະນາທາງດ້ານພື້ນຖານໂຄງລ່າງທາງກຸ່ມບໍລິສັດ ນິກສັນ ໄດ້ຊ່ວຍສ້າງເສັ້ນທາງໃນເຂດຂຸດຄົ້ນຫາເມືອງຮ້ຽມ ແລະ ຍັງໄດ້ສ້າງວຽກເຮັດງານທຳໃຫ້ປະຊາຊົນໃນເຂດດັ່ງກ່າວ.

ຈາກນັ້ນ ທ່ານປະທານ ກຸ່ມບໍລິສັດ ຫຸ້ນສ່ວນເຫຼັກຫົວຟັດ ສສ ຫວຽດນາມ ກໍມີຄວາມຄິດຄວາມເຫັນທີ່ມີຄວາມໝາຍຄວາມສໍາຄັນຕໍ່ກັບເນື້ອໃນຂອງສັນຍາ ແລະການຮ່ວມມືພັດທະນາເສດຖະກິດຂອງສອງຊາດລາວ-ຫວຽດນາມ ທີ່ມີມາຕັ້ງແຕ່ດົນນານ ເພື່ອເປັນການເສີມຂະຫຍາຍຄວາມສາມັກຄີການພັດທະນາເສດຖະກິດຂອງສອງຊາດ ລາວ-ຫວຽດນາມ ໃຫ້ແໜ້ນແຟ້ນຂຶ້ນເປັນການປະຕິບັດຕາມແນວທາງນະໂຍບາຍຂອງລັດຖະບານ ວາລະແຫ່ງຊາດເປັນການຊຸກຍູ້ເສດຖະກິດແຫ່ງຊາດໃຫ້ມີການຂະຫຍາຍຕົວສ້າງລາຍຮັບໃຫ້ລັດ ແລະເພື່ອເປັນການສົ່ງເສີມໃຫ້ປະຊາຊົນຫຼຸດພົ້ນຈາກຄວາມທຸກຍາກເທື່ອລະກ້າວ. ສຳລັບເນື້ອໃນສັນຍາທັງສອງຝ່າຍຕົກລົງເຫັນດີຈະມີການຊື້-ຂາຍ ອີງຕາມເນື້ອໃນສັນຍາ 14 ປີ ໃນຈຳນວນ 360.000 ໂຕນຕໍ່ປີ.

แชร์