ວິຣະຖາວອນ ສ້າງຂະບວນການຕ້ອນຮັບວັນສຳຄັນຂອງພັກ-ຂອງຊາດ ດ້ວຍການຈັດການແຂ່ງຂັນກີລາສີປະຈຳປີຮຽນ

ໂຮງຮຽນ ວິຣະຖາວອນ ນະຄອນຫຼວງວຽງຈັນ ໄຂງານແຂ່ງຂັນກີລາສີຂອງໂຮງຮຽນ ປະຈຳສົກຮຽນ 2022-2023 ຂຶ້ນວັນທີ 2 ພະຈິກ 2022 ທີ່ໂຮງຮຽນດັ່ງກ່າວໂດຍມີທ່ານ ຄໍາສິງ ດວງດາລາ ຫົວໜ້າຫ້ອງການສຶກສາທິການ ແລະກີລາເມືອງສີສັດຕະນາກ ທ່ານ ຫົງແກ້ວ ທຳມະວົງ ຫົວໜ້າຂະແໜງພະລະ ສີລະປະສຶກສາພະແນກສຶກສາທິການ ແລະ ກີລາ ນະຄອນຫຼວງວຽງຈັນ ທ່ານ ນາງ ນີລາວັນ ວີຣະຖາວອນຜູ້ອຳນວຍການໂຮງຮຽນ ວິຣະຖາວອນ ພ້ອມດ້ວຍທ່ານຄະນະອຳນວຍການໂຮງຮຽນທ່ານຄະນະກຳມະການແຂກຖືກເຊີນພະນັກງານຄູ-ອາຈານ ທ່ານຜູ້ປົກຄອງ ແລະນັກຮຽນເຂົ້າຮ່ວມ.

ທ່ານ ນາງ ນີລາວັນ ວີຣະຖາວອນ ໄດ້ກ່າວວ່າ: ອີງໃສ່ການປະຕິບັດ 5 ຫຼັກມູນການສຶກສາທີ່ພັກ-ລັດ ກໍຄືກະຊວງສຶກສາທິການ ແລະ ກີລາວາງອອກແຜນປະຈໍາປີຂອງໂຮງຮຽນໃນນັ້ນວຽກງານກີລາ ແລະສີລະປະສຶກສາ ຖືເປັນວຽກງານໜຶ່ງທີ່ສໍາຄັນເຊິ່ງເປັນການເສີມສ້າງທັກສະສ້າງຄວາມສາມັກຄີໃນໝູ່ຄະນະດ້ວຍການຫຼິ້ນເປັນທີມການເຝິກສະມາທິຮູ້ຈັກແພ້ຮູ້ຊະນະໃຫ້ອະໄພພ້ອມທັງມີນໍ້າໃຈນັກກີລາຢ່າງແທ້ຈິງສົ່ງເສີມທາງດ້ານສີລະປະວັດທະນະທຳອັນດີງາມຂອງຊາດປະສົມປະສານກັບຍຸກສະໄໝໃຊ້ເວລາຫວ່າງໃຫ້ເປັນປະໂຫຍດຫ່າງໄກຈາກສິ່ງເສບຕິດສ້າງໃຫ້ນັກຮຽນໄດ້ມີພິກໄຫວກ້າສະແດງຄວາມສາມາດຂອງຕົນອອກຢ່າງຖືກຕ້ອງໂດຍປະສະຈາກການໃຊ້ຄວາມຮຸນແຮງ.

ພ້ອມນີ້ຍັງເປັນການສ້າງຂະບວນການຄຳນັບຮັບຕ້ອນວັນສໍາຄັນຂອງພັກຂອງຊາດທີ່ຈະມາເຖິງ ໂດຍສະເພາະ ວັນຊາດທີ 2 ທັນວາ ຄົບຮອບ 47 ທີ່ຈະມາເຖິງນີ້ ທາງໂຮງຮຽນຈຶ່ງຖືເອົາມື້ນີ້ເປັນມື້ເປີດພິທີພາຍໃຕ້ການດູແລຂອງຄູ-ອາຈານ ແລະ ຄະນະຮັບຜິດຊອບນັກຮຽນເພື່ອຄວາມເປັນລະບຽບຮຽບຮ້ອຍ.

ງານກິລາດັ່ງກ່າວໄດ້ແບ່ງອອກເປັນ 2 ລະດັບຄື: ລະດັບຊັ້ນປະຖົມສຶກສາ ແລະລະດັບຊັ້ນມັດທະຍົມສຶກສາ ເຊິ່ງລວມມີ 10 ທີມ ແຕ່ລະທີມຈະມີສີປະຈຳທີມຂອງຕົນເອງ ໂດຍຊັ້ນປະຖົມປະກອບມີ 4 ທີມ: ທີມສີຂຽວ ສີຟ້າ ສີເຫຼືອງ ແລະສີແດງ ພາຍໃນທີມຈະປະກອບດ້ວຍນັກຮຽນ ຊັ້ນ ປ.1 ຫາ ຊັ້ນ ປ.5.

ສໍາລັບຊັ້ນມັດທະຍົມສຶກສາປະກອບມີ 6 ທີມ ຄື: ທີມ ມ.1 ສີຂຽວ ທີມ ມ.2 ສີເຫຼືອງ ທີມ ມ.3 ສີຟ້າ ທີມ ມ.4 ສີແດງ ທີມ ມ.5 ສີບົວ ທີມ ມ.6 ສີມ່ວງ ສ່ວນຊັ້ນ ມ.7 ແມ່ນເປັນຜູ້ບໍລິຫານຈັດການ ແລະເປັນຜູ້ຊີ້ນຳແຕ່ລະທີມໃນຖານະຮຸ່ນອ້າຍ-ເອື້ອຍ.

ການແຂ່ງຂັນຈະໄດ້ດຳເນີນໄປ ເປັນເວລາ 2 ວັນ ແລະມີການແຂ່ງຂັນແຕ່ລະປະເພດຄື: ຊັ້ນປະຖົມປະກອບດ້ວຍ 18 ປະເພດກີລາ ຊັ້ນມັດທະຍົມປະກອບດ້ວຍ 19 ປະເພດກີລາ ຊັ້ນປະຖົມມີ ກີລາໝູນລໍ້ ສົ່ງບານໃຫຍ່ ເຕາະບານ ດຶງເຊືອກ ເຕັ້ນປ່ຽນບ້ວງ ແລ່ນໄຖ່ ຕີດອກປີກໄກ່ ແລ່ນເອົາທຸງ ຂັ້ນໄດງູ ຫຼອດດູດໃສ່ແກ້ວ ຂີ່ມ້າ ຮ່າຍນໍ້າ ເປົ່າຈອກ ແລ່ນປ່ຽນຈວຍ ກິ້ງບານ ເກມບົ້ງ ແລະເຕັ້ນກົບ.

ສຳລັບຊັ້ນມັດທະຍົມ ກີລາກາງແຈ້ງມີບານສົ່ງ ຍີງ-ຊາຍ ບານບ້ວງ ຍິງ-ຊາຍ ເຕາະບານ ກະຕໍ້ ດອກປີກໄກ່ ແລະປິ່ງປ່ອງ ປະເພດໃນຮົ່ມ ແຂ່ງຕອບຄຳຖາມແຂ່ງສະກົດຄຳ ແຂ່ງເອເຊັກ ເຮັດ Poster ປະກວດຖ່າຍຮູບ ເກມບົ້ງ ບານສົ່ງໃຫຍ່ ແລ່ນເທິງໄມ້ ວາງຕຸກນໍ້າ.

แชร์