ສາລະວັນ ກຽມປະກາດຫໍໄຕຣປີດົກ ເປັນມໍລະດົກວັດທະນະທໍາແຫ່ງຊາດທ້ອງຖິ່ນ

ແຂວງສາລະວັນ ກຽມຈັດງານເທດສະການແຫ່ພຣະໄຕປີດົກສືບສານວັດທະນະທໍາລຳວົງສາລະວັນໃນລະຫວ່າງວັນທີ 14-20 ພະຈິກ 2022, ພາຍໃນງານ ຈະຈັດກິດຈະກຳຫລາຍກິດຈະກຳເປັນຕົ້ນ: ພິທີປະກາດຫໍໄຕຣປີດົກເປັນມໍລະດົກທາງດ້ານວັດທະນະທໍາແຫ່ງຊາດລະດັບທ້ອງຖິ່ນເຊິ່ງເປັນແຫ່ງທຳອິດຂອງແຂວງສາລະວັນ, ການປະກວດສິລະປະ, ປະກວດນັກຮ້ອງ, ໝໍລໍາ, ນາງສາວບັນດາ ເຜົ່າ ແລະອາຫານພື້ນເມືອງ, ສະແດງກາຍະສິນ ແລະອື່ນໆ.

ໂອກາດນີ້, ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນໄດ້ຖະແຫລງຂ່າວເມື່ອບໍ່ດົນມານີ້ວ່າ: ງານເທດສະການແຫ່ພຣະໄຕປີດົກ, ສືບສານວັດທະນະທໍາ, ລຳວົງສາລະວັນ ແມ່ນເພື່ອເຫລີມສະຫລອງການປະກາດຫໍໄຕຣປີດົກເປັນມໍລະດົກແຫ່ງຊາດ ລະດັບທ້ອງຖິ່ນຂອງແຂວງສາລະວັນ ທັງເປັນການອະນຸລັກ, ປົກປັກຮັກສາ ວັດທະນະທໍາຮີດຄອງປະເພນີອັນດີງາມຂອງຊາດ ແລະຂອງເຜົ່າ, ພ້ອມທັງເປັນການສົ່ງເສີມການທ່ອງທ່ຽວພາຍໃນປະເທດເວົ້າລວມ, ເວົ້າສະເພາະພາຍໃນແຂວງສາລະວັນ ກັບມາມີບັນຍາກາດຄຶກຄື້ນ.

ພາຍໃນງານຍັງຈະມີການວາງສະແດງຜະລິດຕະພັນສິນຄ້າ 2 ປະເທດ ລາວ-ຫວຽດນາມ ເຊິ່ງມາຈາກບັນດາເມືອງຕ່າງໆຂອງ ແຂວງສາລະວັນ ແລະບັນແຂວງພາກກາງຂອງ ສສ ຫວຽດນາມ, ຈັດງານສຳມະນາກ່ຽວກັບການຈັບຄູ່ທຸລະກິດດ້ານການທ່ອງທ່ຽວ, ຈັດງານກິລາແຂ່ງຂັນປະເພດຕ່າງໆ ທີ່ຈະໄປຊຽງຂວາງເກມ ແລະ ກິລາພື້ນເມືອງ.
ຂ່າວ: ທິດລານີ ພາບ: ສ.ພະຈັນ

แชร์