ສາຂາ ທ​ຫລ.ສ​ຂ ປະກອບສ່ວນແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ

ສາຂາ ທະນາຄານແຫ່ງ ສປປ ລາວ ພາກ​ກາງ ແຂວງ​ສະ​ຫວັນ​ນະ​ເຂດ (ທ​ຫລ.ສ​ຂ) ມີ​ພາ​ລະ​ບົດ​ບາດ​ໜ້າ​ທີ່​ໃນ​ການ​ຄຸ້ມ​ຄອງ​ມະ​ຫາ​ພາ​ກເສດຖະກິດດ້ານ​ເງິນ​ຕາ; ​ການ​ຄຸ້ມ​ຄອງ​ທະ​ນາ​ຄານ ແລະສະ​ຖາ​ບັນ​ການ​ເງິນ ກໍ່​ຄື​ເປັນ​ທີ່​ປຶກ​ສາ​ດ້ານ​ເງິນ​ຕາໃຫ້​ອົງ​ການ​ປົກ​ຄອງ ຢູ່ 3 ແຂວງ​ພາກ​ກາງ ປະກອບມີແຂວງ​ສະ​ຫວັນ​ນະ​ເຂດ, ຄຳ​ມ່ວນ ແລະແຂວງ​ບໍ​ລິ​ຄຳ​ໄຊ.

ທ່ານ ວົງພະຈັນ ແສງສຸວັນ ເລຂາຄະນະພັກຮາກຖານທະນາຄານແຂວງສະຫວັນນະເຂດ, ຫົ​ວໜ້າສາຂາ ທ​ຫລ.ສ​ຂ ໄດ້​ໃຫ້​ສຳ​ພາດ​ວ່າ: ໃນຕະຫຼອດ 9 ເດືອນ ປີ2022 ​ຜ່​ານ​ມາພວກເຮົາໄດ້ເອົາໃຈໃສ່ຕິດຕາມການຈັດຕັ້ງປະຕິບັດການດໍາເນີນນະໂຍບາຍອັດຕາແລກປ່ຽນຕາມກົນໄກຕະຫຼາດທີ່ມີການຄຸ້ມຄອງລັດແນໃສ່ເພື່ອໃຫ້ອັດຕາແລກປ່ຽນມີການເໜັງຕີງສອດຄ່ອງກັບລະດັບດຸນຍະພາບທາງດ້ານເສດຖະກິດ-ເງິນຕາຫຼາຍຂຶ້ນ ແລະຫຼຸດຜ່ອນສ່ວນຕ່າງລະຫວ່າງອັດຕາແລກປ່ຽນຂອງທະນາຄານ ແລະຕະຫຼາດນອກລະບົບລົງ, ໄດ້ສືບຕໍ່ຕິດຕາມກວດກາການກໍານົດອັດຕາແລກປ່ຽນຂອງບັນດາສາຂາທະນາຄານທຸລະກິດ ແລະຮ້ານແລກປ່ຽນເງິນຕາ ທີ່ເປັນຕົວແທນຂອງທະນາຄານທຸລະກິດ ທີ່ຢູ່ພາຍໃນຂອບເຂດຮັບຜິດຊອບຂອງຕົນຢ່າງໃກ້ຊິດ ໂດຍອີງໃສ່ລະບຽບຫຼັກການ ທີ່ ທຫລ ໄດ້ກໍານົດອອກໃນແຕ່ລະວັນ ເຊິ່ງອັດຕາແລກປ່ຽນຂອງທະນາຄານທຸລະກິດກໍານົດອັດຕາແລກປ່ຽນສໍາລັບຊື້ ຫຼື ຂາຍເງິນກີບກັບເງິນໂດລາສະຫະລັດໄດ້ໃນຂອບເຂດບໍ່ເກີນ ບວກ​ລົບ 4,50% ທຽບໃສ່ອັດຕາແລກປ່ຽນອ້າງອີງ ທີ່ກົມນະ ໂຍບາຍເງິນຕາປະກາດອອກໃນແຕ່ລະໄລຍະ ສ່ວນຕ່າງລະຫວ່າງອັດຕາຊື້-ຂາຍ ບໍ່ເກີນ 1%, ກໍານົດໃຫ້ສ່ວນຕ່າງ ລະຫວ່າງອັດຕາຊື້ ແລະ ອັດຕາຂາຍ 1% ສໍາລັບການແລກປ່ຽນເງິນກີບ ກັບເງິນບາດ, ເງິນຢວນ ແລະ ເງິນຢູໂຣ ແລະຮ້ານແລກປ່ຽນເງິນຕາຕົວແທນກໍານົດອັດຕາສໍາລັບຊື້-ຂາຍເງິນກີບກັບເງິນໂດລາສະຫະລັດພາຍໃນຂອບເຂດບວກ​ລົບ 3% ທຽບໃສ່ອັດຕາແລກປ່ຽນອ້າງອີງຂອງ ທ​ຫລ ປະກາດອອກໃນແຕ່ລະໄລຍະ.

ແຕ່ເຖິງແນວໃດກໍ່ຕາມ, ສະພາບປັດໃຈພາຍນອກຍັງສ້າງແຮງກົດດັນຕໍ່ເນື່ອງໃນສະພາບເງື່ອນໄຂພາຍໃນຫຼາຍດ້ານທີ່ຍັງບອບບາງເຮັດໃຫ້ສ່ວນຕ່າງລະຫ່ວາງອັດຕາແລກປ່ຽນຂອງທະນາຄານ ແລະ ຕະຫຼາດນອກລະບົບໄດ້ກວ້າງອອກຫຼາຍແຕ່ໄລຍະເດືອນມີນາເປັນຕົ້ນມາ ຈາກທີ່ເຄີຍໄດ້ແຄບເຂົ້າມາຢູ່ໃນລະດັບຕໍ່າກວ່າ 2%; ໄດ້ຕິດຕາມລາຄາສິນຄ້າຢ່າງໃກ້ຊິດ (ໂດຍການລົງເກັບກໍາລາຄາສິນຄ້າທີ່ກະທົບໄວຕໍ່ຊີວິດ​ການເປັນຢູ່ຕາມທ້ອງຕະຫຼາດປະຈໍາອາທິດໂດຍລາຍງານໃຫ້ກົມນະໂຍບາຍທ​ຫລ) ເພື່ອໃຫ້ສາມາດເຫັນໄດ້ເຖິງທິດທາງສາເຫດການປ່ຽນແປງຂຶ້ນລົງຂອງດັດຊະນີລາຄາເພື່ອຕິດຕາມສະພາບໂດຍປະສານສົມທົບກັບພາກສ່ວນກ່ຽວຂ້ອງຢ່າງໃກ້ຊິດ.

ພ້ອມ​ດຽວ​ກັ​ນນັ້ນ; ທ​ຫລ.ສ​ຂ ໄດ້ເອົາໃຈໃສ່ໃນການຈໍາ​ໜ່າຍພັນທະບັດ ທຫລ ສະກຸນເງິນກີບ ທີ່ສາຂາທະນາຄານທຸລະກິດເປັນຜູ້ຈຳໜ່າຍໃຫ້ແກ່ປະຊາຊົນ, ພະນັກງານ, ທະຫານ, ຕຳຫຼວດເຊິ່ງມາຮອດປະຈຸບັນຈໍາໜ່າຍພັນທະບັດ ທຫລ ພາຍໃນ 3 ແຂວງພາກກາງ ໄດ້ທັງໝົດຈໍານວນ 610,68 ຕື້ກີບ. ພັນທະບັດ ທຫລ ແມ່ນໜຶ່ງໃນປະເພດຫຼັກຊັບ ທີ່ມີຄວາມໝັ້ນຄົງ ແລະ ປອດໄພ ພ້ອມໃຫ້ຜົນຕອບແທນ ທີ່ດີທີ່ສຸດ, ເປັນເຄື່ອງມືນະໂຍບາຍເງິນຕາຂອງທະນາຄານກາງທີ່ນໍາໃຊ້ເພື່ອຄຸ້ມຄອງປະລິມານເງິນໃນຂອດຈໍລະຈອນໃຫ້ດຸ່ນດ່ຽງກັບລະບົບເສດຖະກິດປະກອບສ່ວນເຂົ້າໃນການຮັກສາສະຖຽນລະພາບທາງດ້ານເງິນຕາແຫ່ງຊາດ.

ສຳ​ລັບວຽກງານການຄຸ້ມຄອງ ແລະແກ້ໄຂຮ້ານແລກປ່ຽນເງິນຕາ; ທ​ຫລ.ສ​ຂ ກໍ່​ໄດ້ຍົກສູງບົດບາດໃນການຄຸ້ມຄອງຂອງຕົນເອງໂດຍເອົາໃຈໃສ່ໃນການຈັດຕັ້ງປະຕິບັດບັນດານິຕິກໍາຕ່າງໆທີ່ ທຫລ ວາງອອກໃນແຕ່ລະໄລຍະ ຊື່ງບັນດານິຕິກຳລ້ວນແລ້ວຕິດພັນກັບການຄຸ້ມຄອງເງິນຕາຕ່າງປະເທດ ແລະການແລກປ່ຽນເງິນຕາໃຫ້ຮັດກຸມຫຼາຍຂຶ້ນ ແລະມີຜົນສັກສິດຢ່າງແທ້ຈິງ; ໂດຍການຫັນການຄຸ້ມຄອງໃຫ້ມີຄວາມຮັດກຸມຂຶ້ນດ້ວຍການຄຸ້ມຄອງທຸລະກິດແລກປ່ຽນເງິນຕາຜ່ານລະບົບທະນາຄານທຸລະກິດ, ອີງຕາມແຈ້ງການຂອງຫ້ອງການ ທ​ຫລ ສະບັບເລກທີ 175/ຫກ, ລົງວັນທີ 17 ກັນຍາ 2021 ຊື່ງເບື້ອງຕົ້ນຮ້ານແລກປ່ຽນທີ່ເປັນຕົວແທນຂອງທະນາຄານທຸລະກິດມີ 48 ຮ້ານ, ແຕ່ປັດຈຸບັນມີ 32 ຮ້ານແລກປ່ຽນຖືກຖອນໃບອະນຍຸາດບໍ່ໃຫ້ເປັນຕົວແທນຂອງທະນາຄານທຸລະກິດ.

ນອກ​ຈາກ​ການ​ຄຸ້ມ​ຄອງ​ມະ​ຫາ​ພາກດ້ານ​ເງິນ​ຕາ​ແລ້ວ; ທ​ຫລ.ສ​ຂ ຍັງ​ເອົາ​ໃຈ​ໃສ່​ໃນການຊຸກຍູ້ ໃຫ້​ທະ​ນາ​ຄານ​ທຸ​ລ​ະ​ກິດ ແລະສະ​ເພາະ​ກິດເພື່ອສະໜອງແຫຼ່ງທຶນເຂົ້າໃນ​ການສົ່ງເສີມວິສາຫະກິດຂະໜາດນ້ອຍ ແລະ ກາງ (SMEs) ແລະ ບ້ານສາມສ້າງ ​ຊຶ່​ງມາ​ຮອດເດືອນ 09/2022 ສາຂາທະນາຄານທຸລະກິດໃນ 3 ແຂວງພາກກາງ ໄດ້ສະໜອງແຫຼ່ງທຶນສົ່ງເສີມ SMEs ມີທັງໝົດ 57 ຫົວ​ໜ່ວຍທຸລະກິດ ໃນວົງເງິນອະນຸມັດທັງ​ໝົດ ຈຳນວນ 100 ຕື້ກີບ ແລະ ມີຍອດເຫຼືອທັງໝົດຈຳນວນ 45,75 ຕື້ກີບ (SMEs 3% ແລະ ແຫຼ່ງທຶນ SMEs ອື່ນໆ);

ສຳ​ລັບການປ່ອຍສິນເຊື່ອ​ເຂົ້າ​ໃນບ້ານສາມສ້າງຂອງທະນາຄານນະໂຍບາຍ ສາຂາສະຫວັນນະເຂດມີຂອບເຂດເຄື່ອນໄຫວຢູ່ແຂວງສະຫວັນນະເຂດ ແລະຄຳມ່ວນ ໂດຍສິນເຊື່ອໄດ້ເຂົ້າເຖິງ​ປະ​ຊາ​ຊົນ ກວມເອົາ 2 ແຂວງ, 11 ເມືອງ, 1 ນະຄອນ ເທົ່າກັບ 48% ຂອງເມືອງ, ສາມສ້າງພາຍໃນ 2 ແຂວງ ( 25 ເມືອງ ) ຈຳນວນ 55 ບ້ານ ກວມເອົາ 47,83% ຂອງບ້ານສາມສ້າງທັງໝົດ (115 ບ້ານ) ໃນນີ້; ມີບ້ານທຸກຍາກ 2 ບ້ານ, ຈັດຕັ້ງກຸ່ມກູ້ຢືມໄດ້ 553 ກຸ່ມ, ປະຊາຊົນເຂົ້າເຖິງແຫຼ່ງທຶນ 3.816 ຄອບຄົວ, ລາຍບຸກຄົນ 11 ຄົນ, ເທົ່າກັບ 13,30% ຂອງຄອບຄົວທັງ​ໝົດ (28.780 ຄອບຄົວ), ຄອບຄົວທຸກຍາກ 213 ຄອບຄົວເທົ່າກັບ 22,45% ຄອບຄົວທຸກຍາກທັງໝົດ (949 ຄອບຄົວ) ແລະ ໃນ​ຂະ​ນະ​ນີ້ ທ​ຫລ.ສ​ຂ ໄດ້ຍົກສູງຄວາມຮັບຜິດຊອບໃນຈັດຕັ້ງປະຕິ ບັດໜ້າທີ່ການເມືອງຂອງຕົນໄດ້ເປັນຢ່າງດີ ອັນເຮັດໃຫ້ສະພາບເສດຖະກິດ-ສັງຄົມ ຢູ່ສາມແຂວງພາກກາງມີສະເຖຍລະພາບ ແລະມີການຂະຫຍາຍຕົວໄປເທື່ອລະກ້າວ.

ຂ່າວ: ຣັດ​ສະ​ໝີ ດວງ​ສັດ​ຈ​ະ

แชร์