ຮອງເຈົ້າແຂວງສາລະວັນ ຕ້ອນຮັບຜູ້ໃຫ້ທຶນໂຄງການພັດທະນາຊົນນະບົດ

ໃນທ້າຍອາທິດຜ່ານມານີ້, ທ່ານ ສະເວນ ເຟດເດີລິກ ແກຣນ ຕາງໜ້າຜູ້ໃຫ້ທຶນຊ່ວຍເຫຼືອຈາກປະຊາຊົນ ແລະ ລັດຖະບານເຢຍລະມັນ ພາຍໃຕ້ໂຄງການພັດທະນາພື້ນຖານໂຄງລ່າງຢູ່ຊົນນະບົດ ພ້ອມດ້ວຍທີມງານ ໄດ້ຢ້ຽມຢາມຕິດຕາມ ແລະ ກວດກາປະເມີນຜົນການຈັດຕັ້ງປະຕິບັດໂຄງການຢູ່ແຂວງສາລະວັນ ໂດຍໃຫ້ກຽດຕ້ອນຮັບຂອງ ທ່ານ ພູທົງ ຄໍາມະນີວົງ ຄະນະປະຈໍາພັກແຂວງ ຮອງເຈົ້າແຂວງສາລະວັນ (ຜູ້ຊີ້ນໍາວຽກງານເສດຖະກິດ) ພ້ອມຄະນະໃຫ້ການຕ້ອນຮັບຢ່າງອົບອຸ່ນ.

ໂອກາດດັ່ງກ່າວ, ທ່ານ ສະເວນ ເຟດເດີລິກ ແກຣນ ໄດ້ສົມທົບກັບພາກສ່ວນທີ່ກ່ຽວຂ້ອງຂັ້ນແຂວງ-ຂັ້ນເມືອງ ໄດ້ລົງຢ້ຽມຢາມຕິດຕາມ ແລະ ກວດກາປະເມີນຜົນການຈັດຕັ້ງປະຕິບັດໂຄງການຢູ່ເມືອງຕະໂອ້ຍ ແລະ ເມືອງສະໝ້ວຍ ແຂວງສາລະວັນ ໄດ້ລາຍງານສະພາບການຕິດຕາມ ແລະ ກວດກາປະເມີນຜົນການຈັດຕັ້ງປະຕິບັດໂຄງການຕົວຈິງ ຊຶ່ງທ່ານໄດ້ໃຫ້ຮູ້ວ່າ: ໂຄງການພັດທະນາພື້ນຖານໂຄງລ່າງຢູ່ຊົນນະບົດ ແມ່ນໂຄງການໜຶ່ງທີ່ໄດ້ຮັບທຶນຊ່ວຍເຫຼືອຈາກປະຊາຊົນ ແລະ ລັດຖະບານເຢຍລະມັນ ໂດຍຜ່ານທະນາຄານເພື່ອການພັດທະນາ KFW ທີ່ມີເປົ້າໝາຍຢາກຊ່ວຍເຫຼືອປະຊາຊົນຢູ່ເຂດຊົນນະບົດຫ່າງໄກສອກຫຼີກເມືອງພູດອຍທຸກຍາກມີຊີວິດການເປັນຢູ່ທີ່ດີຂຶ້ນເທື່ອລະກ້າວ ຊຶ່ງໄລຍະຜ່ານມາແຂວງສາລະວັນ ກໍເປັນແຂວງໜຶ່ງທີ່ໄດ້ຮັບທຶນຊ່ວຍເຫຼືອຈາກປະຊາຊົນ ແລະ ລັດຖະບານເຢຍລະມັນ ແຕ່ຕົ້ນປີ 2015 ໃນການພັດທະນາກໍ່ສ້າງພື້ນຖານໂຄງລ່າງ ທີ່ຈໍາເປັນຢູ່ເຂດຊົນນະບົດເມືອງພູດອຍທຸກຍາກ 2 ເມືອງຄື: ເມືອງຕະໂອ້ຍ ແລະ ສະໝ້ວຍ; ໃນການກໍ່ສ້າງທາງຊົນນະບົດຢູ່ 2 ເມືອງ, ມີ 7 ເສັ້ນທາງ, ລວງຍາວທາງ 121,7 ກມ, ໃນນັ້ນ ທາງດິນແດງປູດ້ວຍດິນດີ 46,34 ກມ, ເປັນທາງປູຢາງ 74.5 ກມ, ກໍ່ສ້າງຂົວ ຈຳນວນ 29 ແຫ່ງ, ລວງຍາວ 600 ແມັດ, ທໍ່ດາໂລ ຈໍານວນ 56 ແຫ່ງ ລວງຍາວ 1.342 ແມັດ. ນອກຈາກນັ້ນ ຍັງໄດ້ຕໍ່ເຕີມຫ້ອງການໂຍທາທິການ-ຂົນສົ່ງ ເມືອງຕະໂອ້ຍ ແລະ ເມືອງສະໝ້ວຍ, ປັບປຸງສ້ອມແປງຕະຫຼາດຊຸມຊົນເມືອງຕະໂອ້ຍ ຊຶ່ງມີມູນຄ່າທັງໝົດ 122 ຕື້ກີບ. ຫຼາຍໆໂຄງການດັ່ງກ່າວໄດ້ກໍ່ສ້າງສໍາເລັດໃນທ້າຍປີ 2019 ແລະ ນໍາໃຊ້ໃນໄລຍະຜ່ານມາຈົນມາຮອດປັດຈຸບັນ; ການກວດກາຕີລາຄາປະເມີນຜົນການຈັດຕັ້ງປະຕິບັດເຫັນວ່າ: ໂຄງການສາມາດຕອບສະໜອງ, ຊ່ວຍເຫຼືອແກ້ໄຂຊີວິດການເປັນຢູ່ຂອງປະຊາຊົນດີຂຶ້ນຈາກເດີມຫຼາຍ ໂດຍສະເພາະພາຍຫຼັງກໍ່ສ້າງເສັ້ນທາງແລ້ວເຮັດໃຫ້ປະຊາຊົນຕັ້ງຖິ່ນຖານທີ່ອາໄສຢູ່ລຽບຕາມສາຍທາງເພີ່ມຂຶ້ນ, ມີເສັ້ນທາງໄປມາຫາສູ່ກັນສະດວກສະບາຍ, ປະລິມານການສັນຈອນເພີ່ມຂຶ້ນ 339%, ຄ່າຜູ້ໂດຍສານຖືກລົງ 26% ແລະ ຄ່າຂົນສົ່ງສິນຄ້າຫຼຸດລົງ 32%, ເຮັດໃຫ້ເວລາໃນການໄປຫາຕະຫຼາດຫຼຸດລົງ 39% ແລະ ໄປຫາກຸ່ມບ້ານຫຼຸດລົງ 51%, ກະສິກຳເພື່ອການຕະຫຼາດເພີ່ມຂຶ້ນ 207%, ໄຟຟ້າເຂົ້າເຖິງເພີ່ມຂຶ້ນ 41%, ຫຼຸດຜ່ອນເວລາການເດີນທາງ ແລະ ຄ່າຂົນສົ່ງ, ເປີເຊັນການເຂົ້າໂຮງຮຽນເພີ່ມຂຶ້ນ 8% (ລວມທັງການຫຼຸດຊ່ອງວ່າງລະຫວ່າງຍິງ-ຊາຍ), ປະຊາຊົນໄດ້ເພີ່ມການປູກພືດ ແລະ ໝາກໄມ້ຫຼາຍຂຶ້ນ, ສົ່ງເສີມບໍລິສັດຮັບເໝົາຂະໜາດນ້ອຍ ແລະ ຂະໜາດກາງ, ເຮັດໃຫ້ການຄ້າຂາຍລະດັບເມືອງເພີ່ມຂຶ້ນ, ເດັກນ້ອຍເຂົ້າໂຮງຮຽນຫຼາຍຂຶ້ນ, ປະຊາຊົນໄດ້ນໍາໃຊ້ນໍ້າສະອາດເພີ່ມຂຶ້ນ, ແມ່ມານໄປອອກລູກຢູ່ໂຮງໝໍໄດ້ສະດວກສະບາຍ, ລາຍຮັບຂອງປະຊາຊົນເພີ່ມຂຶ້ນ ແລະ ເປີເຊັນຄວາມທຸກຍາກຫຼຸດລົງ; ນອກນັ້ນເສັ້ນທາງບາງຈຸດຍັງເປ່ເພ ຍ້ອນໄດ້ຮັບຜົນກະທົບຈາກພາຍຸ.

ໂອກາດດຽວກັນ, ທ່ານ ພູທົງ ຄໍາມະນີວົງ ກໍໄດ້ສະແດງຄວາມຍ້ອງຍໍຊົມເຊີຍ ແລະ ຂອບໃຈຕໍ່ທ່ານ, ປະຊາຊົນ ແລະ ລັດຖະບານເຢຍລະມັນ ທີ່ໄດ້ສະໜັບສະໜູນຊ່ວຍໃນກໍ່ສ້າງພື້ນຖານໂຄງລ່າງຢູ່ເຂດເມືອງພູດອຍ ຊຶ່ງຫຼາຍໆໂຄງການໄດ້ເປັນການຊຸກຍູ້ປະກອບສ່ວນຢ່າງຕັ້ງໜ້າເຮັດຊີວິດການເປັນຢູ່ຂອງປະຊາຊົນດີຂຶ້ນເທື່ອລະກ້າວ ພ້ອມທັງຮຽກຮ້ອງໃຫ້ໂຄງການດັ່ງກ່າວສືບຕໍ່ສະໜັບສະໜູນກໍ່ສ້າງປັບປຸງໂດຍສະເພາະຈຸດທີ່ໄດ້ຮັບຜົນກະທົບເສຍຫາຍຈາກພາຍຸ.
(ຂ່າວ-ພາບ: ສ.ພະຈັນ)

แชร์