ຂະບວນຍ່າງຊົມເຊີຍ 33 ປີ ແຫ່ງການຫັນເປັນທຸລະກິດຂອງ ທຄຕລ

ທະນາຄານການຄ້າຕ່າງປະເທດລາວມະຫາຊົນ (ທຄຕລ) ໄດ້ຈັດຕັ້ງຂະບວນຍ່າງເພື່ອສຸຂະພາບເນື່ອງໃນໂອກາດສະເຫຼີມສະຫຼອງວັນຫັນເປັນທະນາຄານທຸລະກິດຂອງ ທຄຕລ ຄົບຮອບ 33 ປີ (ວັນທີ 01.11.1989 – 01.11.2022) ໂດຍພາຍໃຕ້ການນຳພາຂອງ ທ່ານ ນາງ ສາຍສະໝອນ ຈັນທະຈັກ ຜູ້ອໍານວຍການ ທຄຕລ ແລະໂດຍການໃຫ້ກຽດເຂົ້າຮ່ວມຂອງທ່ານ ນາງ ວັດທະນາ ດາລາລອຍ ຮອງຜູ້ວ່າການທະນາຄານແຫ່ງ ສປປ ລາວ, ພ້ອມດ້ວຍບັນດາຄະນະນຳຈາກພາກລັດ-ພາກທຸລະກິດ; ຜູ້ປະກອບການ ແລະລູກຄ້າຂອງ ທຄຕລ ເຂົ້າຮ່ວມເກືອບ 1.000 ຄົນ.

ໃນວັນທີ່ມີຄວາມໝາຍສຳຄັນນີ້; ທ່ານຜູ້ອໍານວຍການ ທຄຕລ ໄດ້ກ່າວເຖິງປະຫວັດ ແລະຄວາມເປັນມາຂອງການຫັນເປັນທະນາຄານທຸລະກິດຂອງ ທຄຕລ ໂດຍຫຍໍ້ເຊິ່ງຍົກ ໃຫ້ເຫັນຜົນງານຂອງ ທຄຕລ ທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດຂອງຊາດ ຕະຫຼອດໄລຍະ 33 ປີ ພາຍໃຕ້ການນຳພາຂອງພັກແລະລັດ ຖະບານກໍ່ຄືຄະນະພັກ-ຄະນະຜູ້ວ່າການທະນາຄານແຫ່ງ ສປປ ລາວ ແລະ ສຳຄັນທີ່ສຸດກໍ່ໄດ້ສະແດງຄວາມຍ້ອງຍໍຊົມເຊີຍຜູ້ບໍລິຫານ-ພະນັກງານຂອງ ທຄຕລ ໃນແຕ່ລະຮຸ່ນຄົນທີ່ໄດ້ປະກອບສ່ວນທຸ້ມເທເຫື່ອແຮງ, ສະຕິປັນຍາ, ເຫື່ອແຮງ ແລະຈິດໃຈເຂົ້າໃນການປະຕິບັດໜ້າທີ່ທີ່ໄດ້ຮັບມອບໝາຍອັນໄດ້ນຳມາເຊິ່ງຜົນອັນສໍາເລັດທີ່ພົ້ນເດັ່ນໃນຫຼາຍໆດ້ານແລະພ້ອມກັນສ້າງ ທຄຕລ ໃຫ້ເປັນທະນາຄານທີ່ເຂັ້ມແຂງທັນສະໄໝໄດ້ມາດຕະຖານສາກົນບົນພື້ນຖານການຮັບໃຊ້ສັງຄົມກໍ່ຄືປະຊາຊົນລາວທົ່ວປະເທດ.

ປະຈຸບັນ ທຄຕລ ມີຕາໜ່າງການໃຫ້ບໍລິການໃນຂອບເຂດທົ່ວປະເທດທັງໝົດມີ 1 ສໍານັກງານໃຫຍ່, 20 ສາຂາ, 102 ໜ່ວຍບໍລິການ, 11 ຫ້ອງແລກປ່ຽນ, ຕົວແທນເງິນດ່ວນມວນຊົນ BCOME 800 ກວ່າຕົວແທນ, ຖານການນໍາໃຊ້ບັນຊີ 2 ລ້ານກວ່າບັນຊີ, ຖານການນໍາໃຊ້ແອັບພລີເຄຊັ້ນທາງ ການເງິນ (BCEL One) ເກືອບ 2ລ້ານຢູເຊີ້ສາມາດຮອງຮັບການໃຫ້ບໍລິການລູກຄ້າໄດ້ທຸກຂົງເຂດໃນທົ່ວປະເທດ ແລະຍັງໄດ້ຮັບໃບຢັ້ງຢືນລະບົບມາດຕະຖານ ISO 9001:2015 ດ້ານການບໍລິການຄຸນນະພາບ (The Provision Of Banking Services) ອີກດ້ວຍ ແລະທະນາຄານການຄ້າຕ່າງປະເທດລາວມະຫາຊົນຍັງຈະສືບຕໍ່ກໍ່ສ້າງ ແລະຮັກສາມູນເຊື້ອເປັນທະນາຄານແຖວໜ້າທີ່ພຽບພ້ອມຄວາມທັນສະໄໝວ່ອງໄວໝັ້ນໃຈ ແລະຮັບໃຊ້ສັງຄົມໃຫ້ດີທີ່ສຸດ.

ຂ່າວ: ຣັດສະໝີ ດວງສັດຈະ

แชร์