ເຜີຍແຜ່ເນື້ອໃນດຳລັດວ່າດ້ວຍກອງທຶນຄຸ້ມຄອງໄພພິບັດ ແລະຊຸກຍູ້ສ້າງກອງທຶນຄຸ້ມຄອງໄພພິບັດ

ໃນວັນທີ 31 ຕຸລາ 2022 ແຂວງວຽງຈັນ ຈັດກອງປະຊຸມ ເຜີຍແຜ່ເນື້ອໃນ ດຳລັດວ່າດ້ວຍ ກອງທຶນຄຸ້ມຄອງໄພພິບັດ ແລະ ຊຸກຍູ້ສ້າງກອງທຶນຄຸ້ມຄອງໄພພິບັດ ຢູ່ທີ່ຫ້ອງວ່າການແຂວງ, ໂດຍການເປັນປະທານຂອງ ທ່ານ ພູວົງ ບຸນຊູ ຮອງເຈົ້າແຂວງວຽງຈັນ, ປະທານຄະນະກຳມະການຄຸ້ມຄອງໄພພິບັດຂັ້ນແຂວງ, ມີ ທ່ານ ກິນດາວົງ ຫຼວງລາດ ຮອງຫົວໜ້າກົມສັງຄົມສົງເຄາະ, ຜູ້ຊີ້ນຳວຽກງານຄຸ້ມຄອງໄພພິບັດຂັ້ນສູນກາງ, ມີບັນດາທ່ານໃນຄະນະກຳມະການຄຸ້ມຄອງໄພພິບັດຂັ້ນແຂວງ ແລະ ຂັ້ນເມືອງເຂົ້າຮ່ວມ.

ໂອກາດນີ້, ທ່ານ ພູວົງ ບຸນຊູ ຮອງເຈົ້າແຂວງວຽງຈັນ, ປະທານຄະນະກຳມະການຄຸ້ມຄອງໄພພິບັດຂັ້ນແຂວງ ໄດ້ກ່າວເປີດກອງປະຊຸມວ່າ: ແຂວງວຽງຈັນ ກໍ່ເປັນແຂວງໜຶ່ງ ທີ່ໄດ້ຮັບຜົນກະທົບຈາກສະພາບໄພພິບັດ ເຮັດໃຫ້ກະທົບຕໍ່ ໂຄງລ່າງພື້ນຖານ ແລະ ຊີວິດການເປັນຢູ່ຂອງ ປະຊາຊົນພາຍໃນແຂວງ ເຮັດໃຫ້ຖ່ວງດຶງການພັດທະນາເສດຖະກິດ-ສັງຄົມຂອງ ບ້ານ, ເມືອງ ກໍ່ຄື ແຂວງວຽງຈັນ ແຕ່ຖ້າທຽບກັບແຂວງອື່ນ ກໍ່ບໍ່ຮຸນແຮງເທົ່າໃດ, ບັນຫາໄພພິບັດທີ່ເກີດຂື້ນ ນັບມື້ນັບມີຄວາມຮຸນແຮງ ລັດຖະບານແມ່ນໃຫ້ຄວາມສໍາຄັນຕໍ່ກັບວຽກງານການຄຸ້ມຄອງໄພພິບັດ ແລະ ຖືເອົາວຽກງານນີ້ເປັນວຽກສໍາຄັນໜຶ່ງ, ຜ່ານມາການຈັດຕັ້ງປະຕິບັດວຽກງານການຄຸ້ມຄອງໄພພິບັດຜ່ານມາ ເຫັນວ່າ ການຈັດ ຕັ້ງປະຕິບັດໃນການຕອບໂຕ້ສຸກເສີນຍັງເປັນສິ່ງທ້າທາຍ ໂດຍສະເພາະ ແມ່ນ ຂໍ້ຈຳກັດ ທາງດ້ານງົບປະມານຮັບໃຊ້ເຂົ້າໃນການແກ້ໄຂໄພພິບັດ ໄລຍະສຸກເສີນ ແລະ ເພື່ອເປັນການຜັນຂະຫຍາຍ ກົດໝາຍວ່າດ້ວຍ ການຄຸ້ມຄອງໄພພິບັດ ທີ່ໄດ້ລະບຸໄວ້ໃນພາກທີ 5 ໃຫ້ມີການສ້າງດຳລັດກອງທຶນຄຸ້ມຄອງໄພພິບັດ ແລະ ເພື່ອຮັບປະກັນໃນການຜັນຂະຫາຍການສ້າງຕັ້ງດຳລັດກອງທຶນ ແລະ ເພື່ອຮັບປະກັນໃຫ້ມີງົບປະມານ ຮັບໃຊ້ເຂົ້າໃນວຽກງານຄຸ້ມຄອງໄພພິບັດ ເປັນຕົ້ນການຕອບໂຕ້ສຸກເສີນ ລັດຖະບານຈຶ່ງອະນຸມັດຮັບຮອງເອົາ ດຳລັດກອງທຶນຄຸ້ມຄອງໄພພິບັດ ສະບັບເລກທີ 631/ລບ, ລົງວັນທີ 24 ທັນວາ 2020 ເຊິ່ງໃຫ້ສາມາດສ້າງກອງທຶນຄຸ້ມຄອງໄພພິບັດຢູ່ 3 ຂັ້ນ ຄື: ຂັ້ນສູນກາງ, ຂັ້ນແຂວງ ແລະ ຂັ້ນເມືອງ ເພື່ອ ກໍານົດຫລັກການ, ລະບຽບການ, ກ່ຽວກັບການຄຸ້ມຄອງ ແລະ ນໍາໃຊ້ ກອງທຶນຄຸ້ມຄອງໄພພິບັດ ເພື່ອລະດົມທຶນ ແລະ ສະສົມທຶນຈາກພາຍໃນ ແລະ ຕ່າງປະເທດ, ແນໃສ່ສະໜອງທຶນໃຫ້ແກ່ການຊ່ວຍເຫຼືອສຸກເສີນ, ການສ້ອມແປງໂຄງລ່າງພື້ນຖານທີ່ຈຳເປັນ, ການຊອກຄົ້ນ, ຄົ້ນຫາ ແລະ ກູ້ໄພ ເຮັດໃຫ້ຊີວິດການເປັນຢູ່ຂອງປະຊາຊົນກັບຄືນສູ່ສະພາບປົກກະຕິ ແລະ ດີຂື້ນກວ່າເກົ່າ ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ.

ທ່ານຮອງເຈົ້າແຂວງກວ່າຕື່ມອີກວ່າ: ກອງປະຊຸມຄັ້ງນີ້ ສຸດທີ່ມີຄວາມໝາຍສໍາຄັນ ຊຶ່ງຜູ້ເຂົ້າຮ່ວມ ຈະມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງ ຕໍ່ກັບ ເນື້ອໃນ ຂອງ ດຳລັດກອງທຶນຄຸ້ມຄອງໄພພິບັດ ສະບັບນີ້ ແລະ ຂໍ້ຕົກລົງວ່າດ້ວຍການຄຸ້ມຄອງ ແລະ ນໍາໃຊ້ກອງທຶນຄຸ້ມຄອງໄພພິບັດ ເລກທີ 04/ຄພສ, ລົງວັນທີ 2 ມີນາ 2022 , ພ້ອມທັງ ຈະໄດ້ມີໂອກາດ ແລກປ່ຽນ ສົນທະນາ ຕໍ່ກັບເນື້ອໃນ ຂອງ ບັນດານິຕິກຳ 2 ນິຕິກຳດັ່ງກ່າວໃຫ້ມີຄວາມເຂົ້າໃຈເລິກເຊິ່ງ ກວ່າເກົ່າ ເພື່ອນໍາມາຜັນຂະຫຍາຍສ້າງກອງທຶນໃນຂັ້ນແຂວງ ແລະ ຂັ້ນເມືອງ.
ພາບ+ຂ່າວ : ບຸນມາ ແກ້ວບຸດດາ.

แชร์