ຫົວໜ້າຄະນະຈັດຕັ້ງສູນກາງພັກຢ້ຽມຢາມ ແລະເຮັດວຽກຢູ່ແຂວງຊຽງຂວາງ

ໃນລະຫວ່າງວັນທີ 27-29 ຕຸລາ 2022 ທ່ານ ນາງ ສີໄສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງ, ພັກຫົວໜ້າຄະນະຈັດຕັ້ງສູນກາງພັກ, ພ້ອມດ້ວຍຄະນະໄດ້ລົງຢ້ຽມຢາມ ແລະຊີ້ນຳວຽກງານຢູ່ແຂວງຊຽງຂວາງ.

ໂອກາດນີ້, ທ່ານ ບຸນຈັນສີວົງພັນ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆຊຽງຂວາງໄດ້ລາຍງານການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມຂອງແຂວງ, ວຽກງານການກໍ່ສ້າງພັກ-ພະນັກງານ ແລະການປັບປຸງກົງຈັກການຈັດຕັ້ງພາຍໃນແຂວງຊຽງຂວາງ. ພ້ອມນັ້ນໄດ້ລົງເລິກດ້ານວຽກງານການຈັດຕັ້ງພັກ-ພະນັກງານ, ການສ້າງໜ່ວຍພັກປອດໄສເຂັ້ມແຂງໜັກແໜ້ນ,ການປະຕິບັດກົດລະບຽບຂອງພັກກໍຄືກົດໝາຍຂອງລັດ,ວຽກງານການປັບປຸງກົງຈັກການຈັດຕັ້ງ,ຊັບຊ້ອນຈັດວາງບຸກຄະລາກອນ;ນອກນີ້ຍັງໄດ້ລາຍງານການກະກຽມພິທີງານສົມໂພດພະເຈົ້າອົງຫລວງ, ງານສະເຫລີມສະຫລອງໄຫຫີນເຂົ້າເປັນມໍລະດົກໂລກ ແລະການເປັນເຈົ້າພາບທີ່ດີ ໃນການຈັດງານມະຫະກຳກິລາແຫ່ງຊາດ ຄັ້ງທີ 11 ຢູ່ແຂວງຊຽງຂວາງ.

ຈາກນັ້ນ, ທ່ານຫົວໜ້າຄະນະຈັດຕັ້ງສູນກາງພັກໄດ້ໂອ້ລົມພະນັກງານຫລັກແຫລ່ງຂອງແຂວງຊຽງຂວາງຢູ່ທີ່ພະແນກແຜນການ ແລະການລົງທຶນເຊິ່ງທ່ານໄດ້ຍ້ອງຍໍຊົມເຊີຍຜົນງານການພັດທະນາເສດຖະກິດ-ສັງຄົມ ທີ່ແຂວງສູ້ຊົນຍາດມາໄດ້, ພ້ອມທັງເນັ້ນໃຫ້ພະນັກງານຫລັກແຫລ່ງຂອງແຂວງເອົາ ໃຈໃສ່ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກກໍຄືມະຕິຄັ້ງທີ VIII ຂອງແຂວງ ໃຫ້ເຂົ້າສູ່ລວງເລິກ, ມີຄວາມຮັບຜິດຊອບທາງດ້ານການເມືອງ, ຈັດຕັ້ງຜັນຂະຫຍາຍວາລະແຫ່ງຊາດ, ເສີມຂະ ຫຍາຍປົກປ້ອງສິດ ແລະໜ້າທີ່ຂອງສະມາຊິກພັກ, ເພີ່ມທະວີການນຳພາ, ມີຄວາມເປັນເອກະພາບສູງ, ຄວາມສາມັກຄີຈົງຮັກພັກດີຊຸກຍູ້ສົ່ງເສີມຈັນຍາບັນຈັນຍາທຳ,ກຳນົດແຜນດຳເນີນງານບັນດາຈຸດສຸມ, ຮາກຖານແຜນການນຳພາເປັນແຕ່ລະໄລຍະ. ພ້ອມນີ້, ຕ້ອງຍຶດໝັ້ນລວມສູນປະຊາທິປະໄຕ,ສະມາຊິກພັກຕ້ອງເປັນແບບຢ່າງນຳໜ້າ, ເພີ່ມທະວີວຽກງານປ້ອງກັນພັກຕ້ານການສໍ້ລາດບັງຫລວງ, ເອົາໃຈໃສ່ການປະເມີນ ແລະຕິດຕາມກວດກາຢ່າງເຄັ່ງຂັດ,ສ້າງໜ່ວຍພັກປອດໄສເຂັ້ມແຂງ ໜັກແໜ້ນ, ປະຕິບັດຕາມ 3 ທິດນຳ 5 ຫລັກການ, ບຳລຸງສ້າງພະນັກງານ,ຜັນຂະຫຍາຍແຜນງານເປັນແຜນວຽກ,ປັບປຸງກົງຈັກການຈັດຕັ້ງທີ່ຢູ່ພາຍໃຕ້ຄວາມຮັບຜິດຊອບຂອງແຂວງໃຫ້ດີກວ່າເກົ່າ; ສຳລັບວຽກງານການຈັດງານມະຫະກຳກິລາແຫ່ງຊາດແມ່ນໃຫ້ເອົາໃຈໃສ່ເພີ່ມທະວີວຽກງານ ປກຊ-ປກສ ຢ່າງແຂງແຮງ.

ການມາຢ້ຽມຢາມ ແລະຊີ້ນຳວຽກງານຢູ່ແຂວງຊຽງຂວາງໃນຄັ້ງນີ້, ຍັງໄດ້ໄປຢ້ຽມຊົມກວດກາເບິ່ງສະໜາມກິລາເປີດ-ປິດ ງານມະຫະກຳກິລາແຫ່ງຊາດ ຄັ້ງທີ XI, ຢ້ຽມຢາມຫ້ອງວາງສະແດງສິນຄ້າພູມປັນຍາທ້ອງຖິ່ນຊຽງຂວາງ ແລະລົງຢ້ຽມຢາມຮາກຖານພັກບ້ານໂອ້ລົມປະຊາຊົນບ້ານຍວນ ແລະຢ້ຽມຢາມຄອບຄົວຜະລິດວາຍເຂົ້າໄກ່ນ້ອຍ ແລະໂຮງງານຜະລິດຫີນອ່ອນຂອງບໍລິສັດ ຫົງຊັບມາໂບຈຳກັດ ບ້ານນາຫອຍ ເມືອງແປກ ນຳອີກ.

แชร์