ໂຮມຊຸມນຸມສະເຫຼີມສະຫຼອງຜົນສໍາເລັດ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນ

ໃນວັນທີ 31 ຕຸລາ 2022, ສະຫາຍ ພັນຄຳ ວິພາວັນ ກໍາມະການກົມການເມືອງສູນກາງພັກນາຍົກລັດຖະມົນຕີ ແຫ່ງ ສປປ ລາວ ໄດ້ເຂົ້າຮ່ວມພິທີໂຮມຊຸມນຸມສະເຫຼີມສະຫຼອງຜົນສໍາເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນ ທີ່ສະຖານເອກອັກຄະລັດຖະທູດ ສປ ຈີນ ປະຈໍາ ສປປ ລາວ ເປັນເຈົ້າພາບຈັດຂຶ້ນທີ່ໂຮງແຮມແລນມາກນະຄອນຫຼວງວຽງຈັນ ໂດຍມີບັນດາການນໍາຂັ້ນສູງພັກ-ລັດ, ອົງການຈັດຕັ້ງມະຫາຊົນ ແລະຜູ້ຕາງໜ້າຈາກບັນດາອົງການຂອງພັກ-ລັດ, ພ້ອມດ້ວຍພະນັກງານສະຖານທູດຈີນ, ນັກທຸລະກິດ ແລະສະມາຄົມຊາວຈີນຕ່າງດ້າວເຂົ້າຮ່ວມ.

ໃນໂອກາດເຂົ້າຮ່ວມພິທີດັ່ງກ່າວ, ສະຫາຍ ພັນຄໍາ ວິພາວັນ ໄດ້ຕາງໜ້າໃຫ້ສູນກາງພັກ ປປ ລາວ, ລັດຖະບານ ແລະປະຊາຊົນລາວບັນດາເຜົ່າສະແດງຄວາມຊົມເຊີຍຢ່າງສຸດອົກສຸດໃຈຕໍ່ການດໍາເນີນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນທີ່ຫາກໍປິດລົງດ້ວຍຜົນສໍາເລັດອັນສະຫງ່າງາມໃນອາທິດທີ່ຜ່ານມາຊຶ່ງເປັນເຫດການການເມືອງທີ່ສຳຄັນໃນປະຫວັດສາດຍຸກໃໝ່ຂອງພັກ ແລະປະຊາຊົນຈີນ, ຜົນສຳເລັດ ຂອງກອງປະຊຸມໃຫຍ່ ໄດ້ສະແດງໃຫ້ເຫັນຢ່າງເດັ່ນຊັດເຖິງຂີດໝາຍໃໝ່ແຫ່ງການເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງຂອງພັກ, ສະແດງໃຫ້ເຫັນເຖິງຄວາມເປັນເອກະພາບ, ຄວາມຕັດສິນໃຈອັນສູງສົ່ງຂອງທົ່ວພັກເພື່ອສືບຕໍ່ແບກຫາບພາລະກຳປະຫວັດສາດ ໃນການສ້າງສັງຄົມນິຍົມທີ່ມີສີສັນພິເສດຂອງຈີນ ໃນຍຸກສະໄໝໃໝ່ໃຫ້ປະກົດຜົນເປັນຈິງ ຕາມຄາດໝາຍທີ່ວາງໄວ້.

ໂອກາດນີ້, ສະຫາຍນາຍົກລັດຖະມົນຕີຍັງໄດ້ເນັ້ນໜັກເຖິງມູນເຊື້ອສາຍພົວພັນມິດຕະພາບທີ່ມີມາຍາວນານຂອງສອງພັກ, ສອງລັດ ແລະປະຊາຊົນສອງຊາດ ລາວ-ຈີນ ໂດຍໄດ້ກ່າວວ່າ: ໃນຖານະເພື່ອນສະຫາຍຮ່ວມອຸດົມການ ແລະ ຄູ່ຮ່ວມຊາຕາກຳດຽວກັນ, ພັກ ປປ ລາວ ໄດ້ຖືສໍາຄັນໃນລະດັບສູງຕໍ່ເຫດການການເມືອງຂອງພັກກອມມູນິດຈີນ ໃນຄັ້ງນີ້ ກໍຄື ການຢຶດໝັ້ນທັດສະນະອັນສະເໝີຕົ້ນສະເໝີປາຍຂອງຕົນ ໃນການສະໜັບສະໜູນ ພາລະກິດສ້າງສັງຄົມນິຍົມທີ່ມີສີສັນພິເສດຂອງຈີນ ແລະມີຄວາມຊົມຊື່ນຍິນດີເປັນຢ່າງຍິ່ງຕໍ່ການເຕີບໃຫຍ່ເຂັ້ມແຂງ ຂອງພັກກອມມູນິດຈີນ ແລະ ຜົນສຳເລັດອັນສະຫງ່າງາມຂອງກອງປະຊຸມໃຫຍ່ຄັ້ງນີ້; ສະແດງຄວາມເຊື່ອໝັ້ນວ່າພາຍໃຕ້ແສງສະຫວ່າງຂອງບັນດາມະຕິກອງປະຊຸມໃຫຍ່ຄັ້ງນີ້ ແລະການຊີ້ນຳ-ນໍາພາອັນເຂັ້ມແຂງຂອງສູນກາງພັກກອມມູນິດຈີນທີ່ຖືສະຫາຍ ສີ ຈິ້ນຜິງ ເປັນແກນກາງ ແລະດ້ວຍພະລັງແຮງແຫ່ງຄວາມສາມັກຄີເປັນປຶກແຜ່ນຂອງປວງຊົນທັງຊາດ, ພັກ, ລັດ ແລະປະຊາຊົນຈີນອ້າຍນ້ອງຈະສາມາດບັນລຸຜົນສໍາເລັດຮອບດ້ານ, ໃຫຍ່ຫຼວງ ແລະໜັກແໜ້ນໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນວາງອອກຢ່າງແນ່ນອນ.

ໃນພິທີດັ່ງກ່າວ, ສະຫາຍ ຈຽງ ຈ້າຍຕົງ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປ ຈີນ ປະຈໍາ ສປປ ລາວ ໄດ້ມີຄໍາເຫັນໂດຍໄດ້ຕີລາຄາເຖິງຄວາມໝາຍ ຄວາມສໍາຄັນ ຂອງ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນ ຕໍ່ພັກ, ລັດ ແລະປະຊາຊົນຈີນອ້າຍນ້ອງ, ໂດຍສະເພາະແມ່ນໝາກຜົນລວມຍອດໃນຕະຫຼອດໄລຍະຜ່ານມາ ທີ່ພັກກອມມູນິດຈີນອັນມີສະຫາຍເລຂາທິການໃຫຍ່ ສີ ຈິ້ນຜິງ ເປັນແກນກາງໄດ້ນຳພາປະຊາຊົນຈີນອ້າຍນ້ອງຍາດໄດ້ຜົນສຳເລັດອັນຍິ່ງໃຫຍ່, ຮອບດ້ານ, ກ້າວກະໂດດ ແລະມະຫັດສະຈັນ ໃນພາລະກິດສ້າງສັງຄົມນິຍົມທີ່ມີສີສັນພິເສດຂອງຈີນ; ໄດ້ຍົກໃຫ້ເຫັນມະຕິຂອງກອງປະຊຸມໃຫຍ່ທີ່ໄດ້ກຳນົດບັນດາທິດນຳຍຸດທະສາດ, ແນວທາງນະໂຍບາຍໃໝ່ ແລະວິໄສທັດທີ່ກວ້າງໄກເພື່ອຮັບປະກັນການກ້າວເດີນໄປຂ້າງໜ້າຢ່າງໜັກແໜ້ນຂອງປະຊາຊົນຈີນອ້າຍນ້ອງພາຍໃຕ້ການນໍາພາອັນຖືກຕ້ອງ, ສະຫຼາດສ່ອງໃສຂອງພັກກອມມູນິດຈີນ.

ການຈັດພິທີໂຮມຊຸມນຸມໃນຄັ້ງນີ້ເປັນກິດຈະກໍາໜຶ່ງທີ່ມີຄວາມໝາຍສໍາຄັນ, ສະແດງໃຫ້ເຫັນເຖິງການພົວພັນທີ່ສະໜິດແໜ້ນລະຫວ່າງ ສອງພັກ, ການປະກອບສ່ວນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອທີ່ມີມາແຕ່ດົນນານລະຫວ່າງສອງພັກ, ສອງລັດ ແລະປະຊາຊົນສອງຊາດ ລາວ-ຈີນ ກໍຄື ການສ້າງຄູ່ຮ່ວມຊາຕາກໍາ ລາວ-ຈີນ ໃຫ້ນັບມື້ນັບແຕກດອກອອກຜົນ ແລະນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ຈີນ.
ຂ່າວ: ຄຕພ-ຮູບ: ສຳນານ (ປະຊາຊົນ)

แชร์