ບໍລິສັດ ພູເບ້ຍ ມາຍນິງ ຕ້ອນຮັບຄະນະຢ້ຽມຢາມຈາກສະພາແຫ່ງຊາດ ແລະສະພາປະຊາຊົນແຂວງໄຊສົມບູນ

ໃນວັນທີ 25 ຕຸລາ 2022 ທີ່ຜ່ານມາ, ບໍລິສັດ ພູເບ້ຍ ມາຍນິງ ໄດ້ຕ້ອນຮັບຄະນະຜູ້ແທນຂັ້ນສູງຈາກສະພາແຫ່ງຊາດ ແລະ ສະພາປະຊາຊົນແຂວງໄຊສົມບູນ ລົງເຄື່ອນໄຫວຢ້ຽມຢາມໂຄງການຂຸດຄົ້ນ-ປຸງແຕ່ງ ທອງ-ຄໍາ ພູຄໍາ ຂອງບໍລິສັດ.ຄະນະຜູ້ແທນນຳໂດຍ ທ່ານ ປອ ລີເບີ ລີບົວປາວ ກໍາມະການສູນກາງພັກ, ຄະນະປະຈໍາສະພາແຫ່ງຊາດ, ປະທານກໍາມາທິການແຜນການ, ການເງິນ ແລະ ການກວດສອບພ້ອມດ້ວຍຄະນະຈາກສະພາແຫ່ງຊາດ 10 ທ່ານຢ້ຽມຢາມໂຮງງານເປັນເວລາເຄິ່ງວັນ.

ທ່ານ ແດງ ປະທຸມທອງ, ຮອງເລຂາພັກແຂວງ, ປະທານສະພາປະຊາຊົນແຂວງໄຊສົມບູນພ້ອມດ້ວຍຄະນະຕິດຕາມຈາກສະພາປະຊາຊົນແຂວງໄຊສົມບູນ 19ທ່ານ.ໃນໄລຍະການລົງເຄື່ອນໄຫວຢ້ຽມຢາມເປັນເວລາເຄິ່ງວັນ, ຄະນະດັ່ງກ່າວໄດ້ຮັບຟັງການລາຍງານຫຍໍ້ກ່ຽວກັບການດຳເນີນທຸລະກິດ, ການຜະລິດຂອງບໍລິສັດ, ການປະກອບສ່ວນທາງດ້ານການເງິນໃຫ້ແກ່ລັດຖະບານລາວ,ໂຄງການຕ່າງໆຂອງບໍລິສັດຊຶ່ງແນ່ໃສ່ການຂະຫຍາຍໂຄງການໃນປັດຈຸບັນຂອງບໍລິສັດ ພູເບ້ຍ ມາຍນິງ ຢູ່ ສປປ ລາວ ແຕ່ນີ້ຈົນເຖິງປີ 2025 ແລະ ໃນຕໍ່ໜ້າ. ນອກຈາກນີ້, ຍັງໄດ້ປຶກສາຫາລືດ້ານອື່ນໆ ໂດຍສະເພາະ ຜົນສຳເລັດ ແລະ ຜົນງານຂອງບໍລິສັດທີ່ຍາດມາໄດ້ໃນລະດັບ ປະເທດ, ພາກພື້ນ ແລະ ສາກົນສໍາລັບວຽກງານການພັດທະນາຊຸມຊົນທີ່ປະຕິບັດໄດ້ຢ່າງດີເລີດ, ແຜນງານຝຶກອົບຮົມ ແລະພັດທະນາບຸກຄະລາກອນ ແລະແຜນງານຄຸ້ມຄອງສິ່ງແວດລ້ອມ.

ນອກຈາກນັ້ນ, ຄະນະດັ່ງກ່າວຍັງໄດ້ຮັບຟັງການລາຍງານກ່ຽວກັບການສະໜັບສະໜູນດ້ານວັດຖຸປັດໃຈ ແລະດ້ານການເງິນຂອງບໍລິສັດ ພູເບ້ຍ ມາຍນິງ ໃຫ້ແກ່ລັດຖະບານລາວ ເພື່ອປະກອບສ່ວນເຂົ້າໃນການປ້ອງກັນ, ຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ໃນປີ 2020 ແລະ 2021 ພ້ອມທັງໂຄງການສັກວັກຊີນຕ້ານພະຍາດໂຄວິດ-19 ໃຫ້ພະນັກງານຂອງບໍລິສັດ.

ທ່ານ ດວງໃຈ ຍານົງ, ຜູ້ຈັດການພະແນກພົວພັນຊຸມຊົນຂອງບໍລິສັດ ພູເບ້ຍ ມາຍນິງ ໄດ້ຕິດຕາມ ແລະນຳທາງຄະນະດັ່ງກ່າວເພື່ອຢ້ຽມຊົມໂຄງການເປັນຕົ້ນຫ້ອງຄວບຄຸມບໍ່ແຮ່ດ້ວຍລະບົບຄອມພິວເຕີ, ໂຮງງານຜະລິດ-ປຸງແຕ່ງ ແລະບໍ່ເປີດໜ້າດິນ.

ໃນຕອນທ້າຍຂອງການຢ້ຽມຊົມໂຄງການ, ທ່ານ ປອ ລີເບີ ລີບົວປາວ ພ້ອມດ້ວຍຄະນະໄດ້ສະແດງຄວາມຂອບໃຈ ແລະປະທັບໃຈທີ່ໄດ້ເຫັນອຸດສາຫະກໍາບໍ່ແຮ່ຂອງລາວ ໄດ້ຊ່ວຍສະໜັບສະໜູນການພັດທະນາເສດຖະກິດຢູ່ແຂວງໄຊສົມບູນ.

ປະທານບໍລິສັດ ພູເບ້ຍ ມາຍນິງ, ທ່ານ ຈັນເພັງ ບຸນນະຜົນ ໄດ້ກ່າວເຖິງຄວາມມຸ້ງໝັ້ນຂອງບໍລິສັດຕໍ່ການຮັກສາສາຍພົວພັນອັນເຂັ້ມແຂງກັບລັດຖະບານລາວ.
ທ່ານ ຈັນເພັງ ໄດ້ໃຫ້ຮູ້ວ່າ “ບໍລິສັດ ພູເບ້ຍ ມາຍນິງ ມີຄວາມຍິນດີເປັນຢ່າງຍິ່ງທີ່ໄດ້ຕ້ອນຮັບຄະນະຂັ້ນສູງຈາກສະພາແຫ່ງຊາດເປັນຄັ້ງທີສອງນັບຕັ້ງແຕ່ປີ 2021 ເປັນຕົ້ນມາ.ການຢ້ຽມຢາມໃນຄັ້ງນີ້ໄດ້ຊ່ວຍເພີ້ມຄວາມເຂົ້າໃຈໃຫ້ແກ່ສະພາແຫ່ງຊາດຫຼາຍຂຶ້ນກ່ຽວກັບວຽກງານການຂຸດຄົ້ນຂອງພວກເຮົາ, ແລະເສີມຂະຫຍາຍຄວາມມຸ້ງໝັ້ນຂອງບໍລິສັດໃຫ້ເຂັ້ມແຂງຍິ່ງຂຶ້ນໃນການພົບປະປຶກສາຫາລືແບບສອງທາງ ແລະໂປ່ງໃສ ຢ່າງຕໍ່ເນື່ອງກັບລັດຖະບານລາວໃນທຸກຂັ້ນ.

ຂ່າວ: ບຸນນິກ ມະນີ

แชร์