ໃນເກົ້າເດືອນເສດຖະກິດຫຼວງພະບາງສືບຕໍ່ຂະຫຍາຍຕົວຕໍ່ເນື່ອງ 3%

ຕາມການລາຍງານຂໍ້ມູນຂອງທ່ານ ນາງ ສີລິພອນ ສຸພັນທອງ ຮອງເຈົ້າແຂວງຫຼວງພະບາງໃນກອງປະຊຸມອົງການປົກຄອງແຂວງເປີດກວ້າງ ປະຈໍາປີ 2022 ໃຫ້ຮູ້ໃນຕົ້ນເດືອນ ຕຸລາ 2022 ນີ້ວ່າ: ໃນ 9 ເດືອນຜ່ານມາການພັດທະນາເສດຖະກິດ-ສັງຄົມຂອງແຂວງ ທ່າມກາງເງື່ອນໄຂສະພາບການຂອງໂລກ ແລະ ພາຍໃນປະເທດ ຍັງເປັນສິ່ງທ້າທາຍຫຼາຍປະການໂດຍສະເພາະແມ່ນການຂາດດຸນງົບປະມານ, ຂາດດຸນເງິນຕາຕ່າງປະເທດ, ການເໜັງຕີງຂອງອັດຕາແລກປ່ຽນ, ການສະໜອງ ແລະ ການເໜັງຕີງຂອງລາຄານໍ້າມັນເຊື້ອໄຟ,ສິນຄ້າອຸປະໂພກ ແລະບໍລິໂພກ, ການແຜ່ລະບາດຂອງພະຍາດໂຄວິດ-19, ບັນຫາໄພທຳມະຊາດ ແລະບັນຫາອື່ນໆຊຶ່ງທັງໝົດເຫຼົ່ານັ້ນໄດ້ສົ່ງຜົນກະທົບໂດຍກົງ ແລະທາງອ້ອມຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງຢ່າງຫຼີກລ່ຽງບໍ່ໄດ້. ແຕ່ຍ້ອນພາຍໃຕ້ການນໍາພາ-ຊີ້ນໍາຢ່າງໃກ້ຊິດຂອງຄະນະພັກ ແລະ ໄດ້ຮັບການຊ່ວຍເຫຼືອຈາກປະເທດ ເພື່ອນມິດ ບວກໃສ່ຄວາມພະຍາຍາມຢ່າງຕັ້ງໜ້າຂອງອົງການປົກຄອງແຕ່ລະຂັ້ນໃນການແກ້ໄຂບັນຫາຫຍຸ້ງຍາກເຫຼົ່ານັ້ນໄດ້ເຮັດໃຫ້ແຂວງຫຼວງພະບາງຍັງສືບຕໍ່ໄດ້ຮັບການພັດທະນາຢ່າງຕໍ່ເນື່ອງ ຊຶ່ງສະແດງອອກຍັງສືບຕໍ່ຮັກສາໄດ້ສະຖຽນລະພາບທາງການເມືອງ,ສັງຄົມມີຄວາມສະຫງົບ, ມີຄວາມປອດໄພ ແລະ ມີຄວາມເປັນລະບຽບຮຽບຮອ້ຍໂດຍພື້ນຖານ. ສືບຕໍ່ຊຸກຍູ້ບັນດາຂະແໜງການ, ຫົວໜ່ວຍການຜະລິດກະສິກຳ,ອຸດສາຫະກຳ ແລະການບໍລິການທີ່ເປັນທ່າແຮງເຮັດໃຫ້ເສດຖະກິດຂອງແຂວງສືບຕໍ່ຂະຫຍາຍຕົວຢ່າງຕໍ່ເນື່ອງ. ລວມຍອດຜະລິດຕະພັນພາຍໃນ (GDP) ໃນ 9 ເດືອນຜ່ານມາເຫັນວ່າຍັງຄົງຂະຫຍາຍຕົວໃນລະດັບ 3% (ແຜນການປີແມ່ນ 5,6%) ເປັນມູນຄ່າ (ລາຄາໃນປີນີ້) 10.794,2 ຕື້ກີບ ເທົ່າກັບ 124,98% ຂອງແຜນການ (ແຜນການປີແມ່ນ 8.636,5 ຕື້ກີບ) ແລະ ຄາດວ່າໝົດປີ ເສດຖະກິດຂອງແຂວງຈະຂະຫຍາຍຕົວໃນລະດັບ 4,6%,ໃນນີ້ຂົງເຂດກະສິກໍາ-ປ່າໄມ້ຂະຫຍາຍຕົວໃນລະດັບ 5,14% (ແຜນການ 3,58%), ກວມ 46,84% ຂອງGDP. ຂົງເຂດອຸດສາຫະກຳ ຂະຫຍາຍຕົວໃນລະດັບ 1,1% (ແຜນການ 8,13%), ກວມ 31,75% ຂອງຂົງເຂດບໍ່ລິການ ຂະຫຍາຍຕົວໃນລະດັບ 1,48 % (ແຜນການ 5,92%), ກວມ 21,41% ຂອງ GDP. ໃນ 9 ເດືອນຜ່ານມາການຈັດເກັບລາຍຮັບ ລວມພູດຂອງສູນກາງ ແລະທ້ອງຖິ່ນຕາມແຜນ 377 ຕື້ 755 ລ້ານກີບ, ປະຕິບັດໄດ້ 255 ຕື້ 841 ລ້ານກີບ, ເທົ່າກັບ 67,73% ຂອງແຜນການປີ.ໃນນີ້ລາຍຮັບພູດສູນກາງ ຕາມແຜນ 11 ຕື້ 180 ລ້ານກີບ, ປະຕິບັດໄດ້ 17 ຕື້ 355 ລ້ານກີບ ເທົ່າກັບ 155,24% ຂອງແຜນປີ (ລື່ນແຜນການ 55,24%) ລາຍຮັບພູດທອ້ງຖິ່ນຕາມແຜນ 366 ຕື້ 575 ລ້ານກີບ, ປະຕິບັດໄດ້ 238 ຕື້ 486 ລ້ານກີບ, ເທົ່າກັບ 65,6% ຂອງແຜນປີ. ຄຽງຄູ່ກັນນີ້ກໍມີລາຍຈ່າຍຕາມແຜນ 649 ຕື້ 970 ລ້ານກີບປະຕິບັດໄດ້ 441 ຕື້ 465 ລ້ານກີບ, ເທົ່າກັບ 67,92% ຂອງແຜນປີ.

ເພື່ອເຮັດໃຫ້ການພັດທະນາເສດຖະກິດ-ສັງຄົມຂອງແຂວງຫຼວງພະບາງໄດ້ຮັບການຂະຫຍາຍຕົວ ແລະ ປັບຕົວໄປຕາມສະພາບເສດຖະກິດຂອງໂລກອົງການປົກຄອງແຂວງຫຼວງພະບາງ ຍັງຈະຕ້ອງໄດ້ສຸມໃສ່ບັນດາໜ້າວຽກທີ່ຍັງຄົງຄ້າງຢ່າງແຂງແຮງເປັນຕົ້ນແມ່ນວຽກງານພັດທະນາພື້ນຖານໂຄງຮ່າງຂອງ ບັນດາເມືອງທີ່ຍັງບໍ່ທັນລຸດພົ້ນອອກຈາກເມືອງທຸກຍາກຂອງແຂວງ,ການປັບປຸງອົງການຈັດຕັ້ງ, ການພັດທະນາເຂດເສດຖະກິດພິເສດ, ແຫຼ່ງທ່ອງທ່ຽວລວມໄປເຖິງຂອດບໍລິການຕ່າງໆ ໃຫ້ມີຄວາມສະດວກຍິ່ງໆຂຶ້ນ,ດຶງດູດ ແລະຍາດແຍ່ງທຶນຮອນຈາກນັກລົງທຶນພາຍໃນ ແລະຕ່າງປະເທດເຂົ້າພັດທະນາຕື່ມອີກ.

(ຂ່າວ: ເພັດສາຄອນ ສິມມະວົງ)

แชร์