ຜົນກອງປະຊຸມລັດຖະບານ ສະໄໝສາມັນ ປະຈໍາເດືອນຕຸລາ 2022

ກອງປະຊຸມລັດຖະບານ ປະຈໍາເດືອນ ຕຸລາ 2022 ໄດ້ໄຂຂຶ້ນ ໃນຕອນເຊົ້າຂອງວັນທີ 26 ຕຸລາ ແລະອັດລົງໃນວັນທີ 27 ຕຸລາ 2022 ທີ່ສໍານັກງານນາຍົກລັດຖະມົນຕີ ພາຍໃຕ້ການເປັນປະທານຂອງ ທ່ານ ພັນຄຳ ວິພາວັນ ນາຍົກລັດຖະມົນຕີ, ມີບັນດາທ່ານຮອງນາຍົກລັດຖະມົນຕີ, ສະມາຊິກລັດຖະບານ ແລະຜູ້ຕາງໜ້າຈາກບັນດາກະຊວງເຂົ້າຮ່ວມ.

ກອງປະຊຸມຄັ້ງນີ້ ໄດ້ປຶກສາຫາລື, ຄົ້ນຄວ້າ, ຕົກລົງ ແລະມີທິດຊີ້ນຳຕໍ່ຫົວຂໍ້ທີ່ສໍາຄັນຕ່າງໆ ດັ່ງນີ້: ກອງປະຊຸມໄດ້ພິຈາລະນາ ແລະເຫັນດີດ້ານຫລັກການຮັບຮອງເອົາບົດສະຫລຸບການຈັດຕັ້ງປະຕິບັດວຽກງານພົ້ນເດັ່ນຂອງລັດຖະບານ ໃນເດືອນຕຸລາ ແລະທິດທາງແຜນການຈັດຕັ້ງປະຕິບັດວຽກງານຈຸດສຸມສຳລັບເດືອນພະຈິກ 2022 ເຊັ່ນ: ວຽກງານໃນຂົງເຂດເສດຖະກິດ, ປ້ອງກັນຊາດ-ປ້ອງກັນຄວາມສະຫງົບ, ການຕ່າງປະເທດເຊິ່ງບົດສະຫລຸບດັ່ງກ່າວ ຈະກາຍເປັນພື້ນຖານໃຫ້ແກ່ການສະຫລຸບຕີລາຄາຜົນການຈັດຕັ້ງປະຕິບັດວຽກງານຂອງລັດຖະບານໃນໄລຍະ 9 ເດືອນຜ່ານມາ ແລະ ທິດທາງແຜນການໃນຕໍ່ໜ້າ. ກອງປະຊຸມໄດ້ມອບໃຫ້ຫ້ອງວ່າການສຳນັກງານນາຍົກລັດຖະມົນຕີປະສານສົມທົບກັບພາກສ່ວນກ່ຽວຂ້ອງນຳໄປປັບປຸງຄືນຕາມຄຳເຫັນຂອງສະມາຊິກລັດຖະບານເພື່ອໃຫ້ມີເນື້ອໃນກະທັດຮັດ, ຈະແຈ້ງ ແລະ ຄົບຖ້ວນ, ໃຫ້ແຕ່ລະຂະແໜງການ ຖືມາດຕະການ ໃນການແກ້ໄຂຂໍ້ຄົງຄ້າງເປັນວຽກບູລິມະສິດເຄັ່ງຮ້ອນ, ພ້ອມນັ້ນກໍຕ້ອງເພີ່ມທະວີຄວາມຮັບຜິດຊອບ, ຄວາມ ເປັນເຈົ້າການຂອງສະມາຊິກລັດຖະບານ ໃນການປະຕິບັດໜ້າທີ່ ຕາມຂອບເຂດສິດ, ພາລະບົດບາດ ຂອງຂະແໜງການຕົນ ໃຫ້ສູງເດັ່ນຂຶ້ນກວ່າເກົ່າ. ພ້ອມນັ້ນ, ກອງປະຊຸມ ໄດ້ພິຈາລະນາ ແລະ ເຫັນດີດ້ານຫລັກການຮັບຮອງ ເອົາບົດລາຍງານຫຍໍ້ຜົນການຢ້ຽມຢາມຂອງຄະນະທ່ານນາຍົກລັດຖະມົນຕີ ຢູ່ ສ ສິງກະໂປ ຢ່າງເປັນທາງການ ໃນວັນທີ 27-28 ກັນຍາ 2022; ຜົນການຕ້ອນຮັບທ່ານນາຍົກ ລັດຖະມົນຕີ ແຫ່ງ ສ ກູບາ ແລະ ທິດຜັນຂະຫຍາຍ. ກອງປະຊຸມ ໄດ້ເຫັນດີໃຫ້ຈັດຕັ້ງຜັນຂະຫຍາຍຜົນການຢ້ຽມຢາມ ສ ສິງກະໂປ ຂອງທ່ານນາຍົກລັດຖະມົນຕີ ແລະ ຜົນການມາຢ້ຽມຢາມ ສປປ ລາວ ຂອງທ່ານນາຍົກລັດຖະມົນຕີ ກູບາ ຕາມການສະເໜີຂອງກະຊວງການຕ່າງປະເທດ; ມອບໃຫ້ກະຊວງກ່ຽວຂ້ອງຜັນຂະຫຍາຍແຕ່ລະໜ້າວຽກ ແລະເອົາໃຈໃສ່ຍົກສູງຄວາມຮັບຜິດຊອບໃນການຈັດຕັ້ງປະຕິບັດ ແລ້ວລາຍງານຄວາມຄືບໜ້າໃຫ້ລັດຖະບານຊາບເປັນແຕ່ລະໄລຍະ.

ກອງປະຊຸມ ໄດ້ພິຈາລະນາ ແລະເຫັນດີດ້ານຫລັກການຮັບຮອງເອົາບົດລາຍງານຂອງລັດຖະບານທີ່ຈະສະເໜີລາຍງານ ຕໍ່ກອງປະຊຸມສະພາແຫ່ງຊາດສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX. ກອງປະຊຸມໄດ້ຊີ້ນໍາໃຫ້ຫ້ອງວ່າການສໍານັກງານນາຍົກລັດຖະມົນຕີເປັນໃຈກາງປະສານສົມທົບກັບກະຊວງແຜນການ ແລະ ການລົງທຶນ, ກະຊວງການເງິນ, ທະນາຄານ ແຫ່ງ ສປປ ລາວ ແລະກະຊວງພາຍໃນ ຮີບຮ້ອນປັບປຸງບົດລາຍງານ ຮ່ວມກັບບັນດາກຳມາທິການກ່ຽວ ຂ້ອງຂອງສະພາແຫ່ງຊາດ ໃຫ້ມີຄວາມເປັນເອກະພາບທາງດ້ານເນື້ອໃນ ແລະບັນດາຕົວເລກຄາດໝາຍຕ່າງໆ ໃຫ້ສຳເລັດເພື່ອສົ່ງໃຫ້ສະພາແຫ່ງຊາດຕາມກຳນົດເວລາ; ກອງປະຊຸມ ໄດ້ພິຈາລະນາ ແລະເຫັນດີດ້ານຫລັກການຮັບຮອງເອົາຮ່າງດໍາລັດວ່າດ້ວຍທຶນການສຶກສາຕ່າງປະເທດ ແລະຜູ້ຮຽນ. ກອງປະຊຸມໄດ້ຊີ້ນໍາໃຫ້ກະຊວງສຶກສາທິການ ແລະ ກິລາ ເປັນໃຈກາງສົມທົບກັບກະຊວງພາຍໃນ ແລະ ກະຊວງຍຸຕິທຳ ປັບປຸງຮ່າງດຳລັດດັ່ງກ່າວ ໃຫ້ມີເນື້ອໃນຄົບຖ້ວນສົມບູນ, ສິ່ງສໍາຄັນແມ່ນໃຫ້ເອົາໃຈໃສ່ການຊຸກຍູ້ສົ່ງເສີມການຍົກລະດັບຄວາມຮູ້, ຄວາມສາມາດ, ການຄຸ້ມຄອງທຶນທີ່ລັດຖະບານ ໄດ້ອະນຸ ມັດໃຫ້ ແລະ ການຄຸ້ມຄອງຜູ້ທີ່ໄປຕໍ່ດ້ວຍທຶນຕົນເອງ; ກອງປະຊຸມໄດ້ພິຈາລະນາ ແລະເຫັນດີດ້ານຫລັກການຮັບຮອງເອົາຮ່າງແຜນຜັງແຫ່ງຊາດກ່ຽວກັບຄື້ນຄວາມຖີ່ວິທະຍຸສື່ສານ (ສະບັບປັບປຸງ). ກອງປະຊຸມໄດ້ຊີ້ນໍາໃຫ້ກະຊວງເຕັກໂນໂລຊີ ແລະການສື່ສານສົມທົບກັບພາກສ່ວນທີ່ກ່ຽວຂ້ອງນຳໄປປັບປຸງ ແລະຮຽບຮຽງຮ່າງແຜນຜັງດັ່ງກ່າວດ້ານຄໍາສັບ ແລະເນື້ອໃນໃຫ້ຄົບຖ້ວນ ແລະສອດຄ່ອງກັບກົດໝາຍກ່ຽວຂ້ອງ ຕາມການປະກອບຄຳເຫັນຂອງສະມາຊິກລັດຖະບານ ແລະໃຫ້ສຳເລັດໂດຍໄວແລ້ວນຳສະເໜີທ່ານນາຍົກລັດຖະມົນຕີພິຈາລະນາລົງລາຍເຊັນປະກາດໃຊ້.

ກອງປະຊຸມໄດ້ພິຈາລະນາ ແລະເຫັນດີດ້ານຫລັກການຮັບຮອງເອົາຮ່າງຍຸດທະສາດແຫ່ງຊາດເພື່ອການພັດທະນາວຽກງານຊົນເຜົ່າ ປີ 2021-2030 ແລະ ວິໄສທັດຮອດ 2035. ກອງປະຊຸມໄດ້ຊີ້ນໍາໃຫ້ສືບຕໍ່ຄົ້ນຄວ້າຮ່າງຍຸດທະສາດດັ່ງກ່າວສຳຄັນດ້ານເນື້ອໃນຕ້ອງຮັບປະກັນໃຫ້ສອດຄ່ອງກັບບັນດາແນວທາງຂອງພັກ,ລັດຖະທຳມະນູນ ແລະກົດໝາຍ, ມອບໃຫ້ກະຊວງພາຍໃນປະສານສົມ ທົບແນວລາວສ້າງຊາດ, ກຳມາທິການທີ່ກ່ຽວຂ້ອງຂອງສະພາແຫ່ງຊາດປຶກສາຫາລື ແລະ ຈັດສຳມະນາ ເປັນເອກະພາບດ້ານໂຄງສ້າງ, ເນື້ອໃນແລ້ວ ຈຶ່ງສະເໜີລັດຖະບານພິຈາລະນາໃນຂັ້ນຕໍ່ໄປ.

ສໍາລັບແຜນວຽກຈຸດສຸມເດືອນພະຈິກ 2022 ນີ້, ກໍແມ່ນເປັນການສຸມໃສ່ປະຕິບັດແຜນດຳເນີນງານຂອງລັດຖະບານ, ແຜນພັດທະນາເສດຖະກິດ-ສັງຄົມແຫ່ງຊາດ ແລະ ການຈັດຕັ້ງປະຕິບັດ 2 ວາລະແຫ່ງຊາດ ໃຫ້ເປັນຮູບປະທຳເພີ່ມຂຶ້ນ, ໃນນັ້ນ ລັດຖະບານຈະສືບຕໍ່ຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ ຕິດພັນກັບວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຕາມແຜນການ, ພ້ອມທັງເພີ່ມທະວີການຕ້ານ ແລະ ແກ້ໄຂປະກົດການຫຍໍ້ທໍ້ໃນສັງຄົມ; ຄຽງຄູ່ກັບການສືບຕໍ່ສຸມໃສ່ ຊຸກຍູ້ການຈັດເກັບລາຍຮັບ ໃຫ້ໄດ້ຕາມແຜນ, ແກ້ໄຂການຄຸ້ມຄອງ ແລະການສະໜອງເງິນຕາຕ່າງປະເທດ, ການຄຸ້ມຄອງບັນດາຮ້ານແລກປ່ຽນເງິນຕາຕ່າງ ປະເທດ, ການສະໜອງນໍ້າມັນເຊື້ອໄຟ, ການຄຸ້ມຄອງລາຄາສິນຄ້າ, ແກ້ໄຂບັນຫາໜີ້ສິນທັງພາຍໃນ ແລະ ຕ່າງປະເທດ ໃຫ້ເປັນໄປຕາມແຜນທີ່ກຳນົດໄວ້, ທັງສືບຕໍ່ແກ້ໄຂຜົນກະທົບຈາກໄພນໍ້າຖ້ວມຢູ່ບາງແຂວງຈຳນວນໜຶ່ງໃຫ້ກັບຄືນມາສູ່ສະພາບປົກກະຕິໂດຍໄວ ລວມທັງການປ້ອງກັນ ແລະ ແກ້ໄຂການລະບາດຂອງພະຍາດຕາມລະດູການ. ພ້ອມກັນນັ້ນ, ກໍສືບຕໍ່ຈັດຕັ້ງປະຕິບັດແນວທາງການຕ່າງປະເທດຂອງພັກໃຫ້ມີປະສິດທິຜົນ.

ເພື່ອໃຫ້ທິດທາງແຜນວຽກຈຸດສຸມເດືອນພະຈິກ 2022 ໄດ້ຮັບການຈັດຕັ້ງປະຕິບັດ ຢ່າງເປັນຮູບປະທໍາ, ກອງປະຊຸມໄດ້ຊີ້ນໍາໃຫ້ ບັນດາສະມາຊິກລັດຖະບານຈົ່ງນໍາເອົາຜົນກອງປະຊຸມລັດຖະບານຄັ້ງນີ້ໄປຫັນເປັນແຜນຈັດຕັ້ງປະຕິບັດຂອງຂະແໜງການຕົນໃຫ້ລະອຽດ, ມີການແບ່ງຄວາມຮັບຜິດຊອບໃຫ້ການຈັດຕັ້ງ, ບຸກຄະລາກອນຢູ່ໃນແຕ່ລະຂັ້ນ ແລະມີຄາດໝາຍຊັດເຈນໃນແຕ່ລະໄລຍະໃຫ້ຈະແຈ້ງ, ສອດຄ່ອງກັບເງື່ອນໄຂສະພາບຄວາມເປັນຈິງຂອງແຕ່ຂະແໜງການໃຫ້ໄດ້ຮັບຜົນດີ.
ຂ່າວ: ກົມປະຊາສໍາພັນ
ພາບ: ທະນູທອງ

แชร์