ສົ່ງເສີມສິດທິເດັກເຊື່ອມໃສ່​ການສ້າງຄວາມເຂັ້ມແຂງຕໍ່ໄວໜຸ່ມຍິງ

ກອງ​ປະ​ຊຸມຕິດຕາມຄວາມຄືບໜ້າການຈັດຕັ້ງປະຕິບັດຄວາມໝາຍໝັ້ນໃນການສົ່ງເສີມສິດທິເດັກ ເຊື່ອມຕໍ່​ການສ້າງຄວາມເຂັ້ມແຂງໃຫ້ໄວໜຸ່ມຍິງຜ່ານລະບົບນິເວດນາງນ້ອຍ 2021-2025 ຂັ້ນແຂວງໄດ້ຈັດຂຶ້ນໃນວັນທີ 27 ຕຸລານີ້ ທີ່ໂຮງ​ແຮມແລນ​ມາກ ນະຄອນຫຼວງວຽງຈັນ, ໂດຍການເປັນປະທານຂອງທ່ານ ນາງ ອິນລາວັນ ແກ້ວບຸນພັນ ປະທານສູນກາງສະຫະພັນແມ່ຍິງລາວຮອງປະທານຜູ້ປະຈໍາການຄະນະກໍາມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ, ແມ່ ແລະເດັກ ແລະ ທ່ານ ນາງ ມາ​ຣ​ຽມ ເອ​ຄານ ຜູ້ຕາງໜ້າອົງການ UNFPA ປະຈໍາ ສປປ ລາວ, ມີບັນ​ດາ​ທ່ານ​ຮອງ​ລັດ​ຖະ​ມົນ​ຕີ, ຮອງເຈົ້າແຂວງ, ຮອງເຈົ້າຄອງນະຄອນຫຼວງວຽງຈັນ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານນາງ ອິນລາວັນ ແກ້ວບຸນພັນໄດ້ກ່າວວ່າ: ກອງ​ປະຊຸມຄັ້ງນີ້ສະ​ແດງ​ໃຫ້​​ເຫັນ​ເຖິງຄວາມຮັບຜິດຊອບ ແລະຄວາມ​ເອົາ​ໃຈໃສ່ໃນການສ້າງ​ຄວາມສະເໝີພາບລະຫວ່າງຍິງ-ຊາຍ ແລະ ການສ້າງຄວາມເຂັ້ມແຂງໃຫ້ແກ່ເດັກຍິງ, ຊຶ່ງໄລຍະບັນດາທ່ານ ຄກມດ ແຂວງ ກໍໄດ້ເອົາໃຈຊີ້ນຳສ້າງແຜນດຳເນີນງານສະເພາະທີ່ຕິດພັນກັບການສົ່ງເສີມຄວາມສະເໝີພາບຍິງ-ຊາຍ ແລະ ສິດທິເດັກທີ່ຕິດພັນກັບກອບວຽກນາງ ນ້ອຍ ພ້ອມທັງນຳເອົາຕົວຊີ້ບອກທີ່ຕິດພັນກັບຂອງວຽກນາງ ນ້ອຍ ເຂົ້າໃນແຜນພັດທະນາເສດຖະກິດ-ສັງຄົມຂອງແຂວງ ແລະ ແຜນພັດທະນາຂອງຂະແໜງການໄລຍະ 2021-2025.

ສປປ ລາວ ໄດ້ດໍາເນີນຂະບວນການສະເຫຼີມສະຫຼອງຄົບຮອບ 30 ປີ (20/11/1989 - 20/11/2019) ຂອງສົນທິສັນຍາວ່າດ້ວຍສິດທິເດັກ ແລະ ວັນເດັກໂລກ ຊຶ່ງເປັນເຫດການໜຶ່ງ ທີ່ມີຄວາມສໍາຄັນ ທີ່ການນໍາຂັ້ນສູງຂອງ ສປປ ລາວ, ຄະນະນໍາຂັ້ນແຂວງ, ຜູ້ວາງນະໂຍບາຍ, ພາກສ່ວນທຸລະກິດເອກະຊົນ, ຄູ່ຮ່ວມພັດທະນາ, ອົງການຈັດຕັ້ງສາກົນ, ອົງການຈັດຕັ້ງທາງສັງຄົມ ໄດ້ເຂົ້າຮ່ວມປະກອບສ່ວນ ແລະ ສະແດງຄວາມຮັບຜິດຊອບໃນການປົກປ້ອງສິດ, ຜົນປະໂຫຍດຂອງເດັກ ແລະ ກໍານົດທິດທາງການພັດທະນາເດັກລາວບັນດາເຜົ່າ ໂດຍໄດ້ລົງນາມຄວາມໝາຍໝັ້ນຮ່ວມກັນເພື່ອ​ສົ່ງເສີມສິດ ທິ​ເດັກ “ຄວາມອາດສາມາດບົ່ມຊ້ອນທີ່ບໍ່ຈຳກັດ ຂອງຄົນລາວຮຸ່ນປີ 2030” ຄວາມໝາຍໝັ້ນຂໍ້ດັ່ງກ່າວ ໄດ້ເນັ້ນໃຫ້ເອົາໃຈໃສ່ເປັນພິເສດຕໍ່ຄວາມສະເໝີພາບລະຫວ່າງຍິງ-ຊາຍ ແລະ ການສ້າງຄວາມເຂັ້ມແຂງໃຫ້ແກ່ເດັກຍິງ​ທີ່ໄດ້ຮັບແຮງບັນດານໃຈຈາກກອບວຽກການຈັດຕັ້ງປະຕິບັດ ນາງນ້ອຍ​ 2030.

ແຜນວຽກ ນາງ ນ້ອຍ ຫຼື ໄວໜຸ່ມຍິງ ເປັນແຜນງານເພື່ອສະໜັບສະໜູນການຈັດຕັ້ງປະຕິບັດສົນທິສັນຍາວ່າດ້ວຍການລຶບລ້າງທຸກຮູບແບບການຈໍາແນກຕໍ່ແມ່ຍິງ, ສົນທິສັນຍາວ່າດ້ວຍສິດທິເດັກ, ຖະແຫຼງການ ແລະ ແຜນປະຕິບັດປັກກິ່ງ ແລະ ເປົ້າໝາຍການພັດທະນາແບບຍືນຍົງ ຢູ່ ສປປ ລາວ ແລະ ເອກະສານກອງປະຊຸມປະຊາກອນໂລກ ເພື່ອບັນລຸຄວາມສະເໝີພາບຍິງ-ຊາຍ ແລະສ້າງຄວາມເຂັ້ມແຂງໃຫ້ໄວໜຸ່ມຍິງ, ເຖິງແມ່ນວ່າໄລຍະຜ່ານມາພັກ-ລັດ ໄດ້ເອົາໃຈໃສ່ເຂົ້າໃນການພັດທະນາ ສົ່ງເສີມເດັກຍິງໜຸ່ມແຕ່ກໍບໍ່ປາສະຈາກໄດ້ຂໍ້ຄົງຄ້າງ ແລະສິ່ງທ້າທາຍດ້ານຕ່າງໆ ຊຶ່ງເຮັດໃຫ້ເດັກຍິງຈຳນວນຫຼາຍໂດຍສະເພາະແມ່ນເດັກຍິງທີ່ທຸກຍາກ, ເດັກຍິງຊົນນະບົດ ແລະ ເດັກທີ່ດ້ອຍໂອກາດຍັງໄດ້ຮັບຜົນກະທົບ ແລະ ບໍ່ໄດ້ຮັບການພັດທະນາເທົ່າທີ່ຄວນ, ສະແດງອອກການແຕ່ງດອງກ່ອນໄວອັນຄວນຂອງເດັກຍິງ, ຈໍາກັດໂອກາດໃນການພັດທະນາທາງດ້ານເສດຖະກິດ-ສັງຄົມ, ການເຂົ້າເຖິງການບໍລິການດ້ານສຸຂະພາບ, ໂພຊະນາການທີ່ດີ, ປົກປ້ອງທາງສັງຄົມ; ນາງ ນ້ອຍ ຈຶ່ງເປັນນາມສົມມຸດທີ່ເປັນຕົວແທນໃຫ້ໄວໜຸ່ມຍິງ ທີ່ມີອາຍຸ 10-19 ປີ ຢູ່ ສປປ ລາວ ທີ່ຍັງປະເຊີນກັບຄວາມທຸກຍາກ ແລະສິ່ງທ້າທາຍ.

ເພື່ອຈັດຕັ້ງປະຕິບັດຄວາມໝາຍໝັ້ນໃນການ​ສົ່ງເສີມສິດທິ​ເດັກດ້ວຍການນໍາໃຊ້ຄວາມອາດສາມາດບົ່ມຊ້ອນທີ່ບໍ່ຈຳກັດ ຂອງຄົນລາວຮຸ່ນປີ 2030 ຫຼື ການພັດທະນາຄົນລາວຮຸ່ນປີ 2030 ທີ່ໄດ້ຮັບຮອງໃນກອງປະຊຸມຜູ້ແທນລະດັບສູງທ້າຍປີ 2019 ໂອກາດສະເຫຼີມສະຫຼອງວັນສົນທິສັນຍາວ່າດ້ວຍສິດທິເດັກ ແລະວັນເດັກສາກົນ. ປີ 2020 ຄຊກມດ ກໍໄດ້ຈັດກອງປະຊຸມປຶກສາຫາລື ການຈັດຕັ້ງປະຕິບັດຄວາມໝາຍໝັ້ນຂອງ ສປປ ລາວ ໃນການສົ່ງເສີມສິດທິເດັກໂດຍເຊື່ອມໃສ່ຂອບແຜນວຽກສ້າງຄວາມເຂັ້ມແຂງໃຫ້ໄວໜຸ່ມຍິງ ຜ່ານລະບົບນິເວດ ນາງນ້ອຍ ໄລຍະ 2021-2025 ຂັ້ນແຂວງຊຶ່ງກອງປະຊຸມຄັ້ງນັ້ນບັນດາຜູ້ແທນກອງປະຊຸມໄດ້ເປັນເອກະພາບຕໍ່ບັນດາຕົວຊີ້ວັດ ແລະວຽກງານຈຸດສຸມໃນການສ້າງຄວາມເຂັ້ມແຂງໃຫ້ໄວໜຸ່ມຍິງຜ່ານລະບົບນິເວດ ນາງນ້ອຍ ເພື່ອເຊື່ອມເຂົ້າໃນແຜນພັດທະນາເສດຖະກິດ-ສັງຄົມຂອງແຂວງ ແລະແຜນພັດທະນາຂອງຂະແໜງການໂດຍສ້າງເປັນແຜນງານ ແລະໂຄງການຕາມຈຸດພິເສດ, ທ່າແຮງ ແລະເງື່ອນໄຂສະພາບຄວາມເປັນຈິງຂອງແຕ່ລະທ້ອງຖິ່ນ.

ຂ່າວ-ພາບ: ບຸນອູ້ມ

แชร์