ຍົກລະດັບ 3 ໜ້າວຽກເຫຼັກ ກຽມຮອງຮັບແຂ່ງຂັນບານສົ່ງທົ່ວປະເທດ ແລະຊຽງຂວາງ ເກມ

ສະຫະພັນບານສົ່ງແຫ່ງຊາດລາວ ຫຼື ສບສ ຈັດກອງປະຊຸມຝຶກອົບຮົມຍົກລະດັບຄວາມຮູ້ຄວາມສາມາດໃຫ້ແກ່ບຸກຄະລາກອນ 3 ໜ້າທີ່ວຽກເຫຼັກຄື: ຜູ້ຄວບຄຸ່ມການແຂ່ງຂັນ,​ ຜູ້ຄວບຄຸ່ມກຳມະການຕັດສິນ ແລະກຳມະການຕັດສິນເພື່ອກຽມຮັບໃຊ້ງານແຂ່ງຂັນບານສົ່ງໃນຮົ່ມ ຍິງ-ຊາຍ ທົ່ວປະເທດ ຊີງຂັນປະທານ ສບສ ປະຈຳປີ 2022 ຊຶ່ງຈະຈັດຂຶ້ນ ໃນລະຫວ່າງວັນທີ 29 ຕຸລາ ຫາ 4 ພະຈິກນີ້ ພ້ອມທັງເປັນການກຽມຄວາມພ້ອມຮັບໃຊ້ງານມະຫະກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງເປັນເຈົ້າພາບໃນທ້າຍປີນີ້.

ກອງປະຊຸມຝຶກອົບຮົມດັ່ງກ່າວຈັດຂຶ້ນໃນລະຫວ່າງວັນທີ 27-28 ຕຸລານີ້ ທີ່ຫ້ອງການຄະນະກຳມະການໂອແລມປິກແຫ່ງຊາດລາວພາຍໃຕ້ການເປັນປະທານຂອງທ່ານ ສຸລິຍາ ແກ້ວພິລາວົງ ຮອງປະທານສະຫະພັນບານສົ່ງແຫ່ງຊາດລາວທັງເປັນຫົວໜ້າຊີ້ນຳວຽກງານກຳມະການຕັດສິນ ສບສ, ມີທ່ານ ທິບພົງພັດ ມະນີວົງ ຮອງເລຂາທິການ ສບສ ທັງເປັນວິທະຍາກອນ ພ້ອມດ້ວຍບັນດາສຳມະນາກອນ 12 ຄົນ,​ ຍິງ 4 ຄົນ ເຂົ້າຮ່ວມ. ສຳລັບສຳມະນາກອນ ເຂົ້າຝຶກອົບໃນຄັ້ງນີ້ແມ່ນມາຈາກບັນດາກົມກອງ ແລະສະໂມສອນຕ່າງໆ ເປັນຕົ້ນແມ່ນ ສະຖາບັນກິລາ-ກາຍະກຳ, ວິທະຍາໄລພະລະສຶກສາ, ໂຮງຮຽນມັດທະຍົມສຶກສາວຽງຈັນ,​ ກອງກິລາກະຊວງປ້ອງກັນປະເທດ, ສະຖາບັນວິຈິດສິນແຫ່ງຊາດ, ໂຮງຮຽນມັດທະຍົມສຶກສາປາຍວຽງຈັນ-ໂຮຈິມິນ, ກົມລົດຕັງຍານເກາະ ແລະກົມໃຫຍ່ການເມືອງກອງທັບ. ຫຼັງຈາກສຳເລັດການຝຶກອົບຮົມກໍຈະໄດ້ເຂົ້າຮ່ວມຮັບໃຊ້ງານແຂ່ງຂັນບານສົ່ງໃນຮົ່ມ ຍິງ-ຊາຍ ທົ່ວປະເທດ ແລະ ຮັບໃຊ້ງານມະຫະກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ.

 ການແຂ່ງຂັນບານສົ່ງໃນຮົ່ມ ຍິງ-ຊາຍ ທົ່ວປະເທດຄັ້ງນີ້ຈະແຂ່ງຂັນທີ່ສະໜາມກິລາກອງທັບ (ຫຼັກ5) ຊຶ່ງ ມີທີມເຂົ້າຮ່ວມແຂ່ງຂັນ 16 ທີມ, ໃນນັ້ນປະເພດທີມຊາຍ ມີ 10ທີມ ແລະ ທີມຍິງມີ 6 ທີມ ທັງສອງລາຍການດັ່ງກ່າວ ຈັດແບ່ງອອກເປັນ 2 ກຸ່ມ ແຕ່ລະກຸ່ມແຂ່ງຂັນພົບກັນໝົດຄັດເອົາທີ 1-2 ຜ່ານເຂົ້າໄປຫຼິ້ນໃນຮອບຕໍ່ໄປ ສະເພາະທີມຊາຍ ສາຍ ກ ປະກອບມີ: ລາວສະກາຍເວ, ແຂວງບໍ່ແກ້ວ, ວິທະຍາໄລພະລະສຶກສາ, ກຣຸບ-ອັບ ວີຊີ, ສະໂມສອນ ວຽງຈັນ ແລະ ສາຍ ຂ ມີ :ກະຊວງປ້ອງກັນປະເທດ ແຊັມເກົ່າ, ນະຄອນຫຼວງວຽງຈັນ, ອອດດີ້ ສະປອດພ, ເລັບ ເຟັດທູຣີ ແລະ ບີແກນ ສະປອດ . ທີມຍິງ ສາຍ ກ ມີ: ນະຄອນຫຼວງວຽງຈັນ, ມາສເຕີ ເຊເວັ້ນ ແລະສະໂມສອນວຽງຈັນ ແລະ ສາຍ ຂ ມີ: ກະຊວງປ້ອງກັນປະເທດ ແຊັມເກົ່າ, ກົມໃຫຍ່ການເມືອງກອງທັບ ແລະດີເວີເກີນ.

ຂ່າວ: ສົງການ ພັນແພງດີ

แชร์