ລາວ ເປັນປະທານຈັດກອງປະຊຸມ ລັດຖະມົນຕີວັດທະນະທໍາ ແລະສິລະປະອາຊຽນ ຄັ້ງທີ 10 ທາງໄກ

ວັນທີ 27 ຕຸລາ 2022, ນະຄອນຫລວງວຽງຈັນກອງປະຊຸມລັດຖະມົນຕີ ວັດທະນະທໍາ ແລະສິລະປະອາຊຽນຄັ້ງທີ 10 ແລະ ກອງປະຊຸມກ່ຽວຂ້ອງໃນຮູບແບບທາງໄກໂດຍການເປັນປະທານຂອງທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະທ່ອງທ່ຽວ ແຫ່ງ ສປປ ລາວ,ມີບັນດລັດຖະມົນຕີວັດທະນະທໍາ ແລະສິລະປະອາຊຽນ,ບັນດາເອກອັກຄະລັດຖະທູດອາຊຽນ ແລະເອກອັກຄະລັດຖະທູດອາຊຽນບວກສາມ (ສປ ຈີນ,ຍີ່ປຸ່ນ ແລະ ສ ເກົາຫລີ) ປະຈໍາ ສປປ ລາວ, ຜູ້ຕາງໜ້າຈາກກອງເລຂາອາຊຽນເຂົ້າຮ່ວມ,ຊຶ່ງກອງປະຊຸມໃນຄັ້ງນີ້ແມ່ນວາລະທີ່ ສປປ ລາວ ໄດ້ຮັບກຽດເປັນເຈົ້າພາບພາຍໃຕ້ຫົວຂໍ້: ການສົ່ງເສີມ ບົດບາດຂອງວັດທະນະທໍາ ແລະສິລະປະອາຊຽນຫລັງການແພ່ລະບາດຂອງພະຍາດໂຄວິດ-19 ເພື່ອການພັດທະນາແບບຍືນຍົງ.

ທ່ານ ນາງ ສວນສະຫວັນ ວິຍະເກດ ໄດ້ກ່າວວ່າ: ດັ່ງທີ່ພວກເຮົາຮັບຮູ້ນໍາກັນແລ້ວວ່າວຽກງານວັດທະນະທໍາ ແລະສິລະປະອາຊຽນກໍແມ່ນຂະແໜງການໜຶ່ງທີ່ມີຄວາມສຳຄັນ ປະກອບສ່ວນເຂົ້າໃນການສ້າງເສດຖະກິດ-ສັງຄົມຂອງຊາດ ແລະ ນອນຢູ່ໃນເສົາຄໍ້າວັດທະນະທຳ-ສັງຄົມອາຊຽນ ຊຶ່ງໄດ້ມີຄວາມພະຍາຍາມສູງໃນການຈັດຕັ້ງຜັນຂະຫຍາຍບັນດາແຜນງານຂອງຕົນກໍຄືແຜນຍຸດທະສາດວັດທະນະທໍາ-ສິລະປະອາຊຽນ 2016-2025, ແຜນແມ່ບົດປະຊາຄົມວັດທະນະທໍາ-ສັງຄົມອາຊຽນ 2025 ແລະວິໄສທັດປະຊາຄົມອາຊຽນ 2025 ໃຫ້ປະກົດຜົນເປັນຈິງ.

ກອງປະຊຸມໃນມື້ນີ້,ຈະເປັນຂີດໝາຍອັນສຳຄັນໃນການປຶກສາຫາລື ແລະແລກປ່ຽນຄວາມຄິດຄວາມເຫັນເຊິ່ງກັນ ແລະກັນກ່ຽວກັບວຽກງານການສົ່ງເສີມບົດບາດຂອງວັດທະນະທໍາ ແລະສິລະປະອາຊຽນຫລັງການແພ່ລະບາດຂອງພະຍາດໂຄວິດ-19 ເພື່ອການພັດທະນາທີ່ຍືນຍົງ.ສປປ ລາວ ເຫັນໄດ້ຄວາມສຳຄັນຂອງວຽກງານວັດທະນະທຳ-ສິລະປະ ແລະຖືເອົາວຽກງານດັ່ງກ່າວເປັນພື້ນຖານແຫ່ງຄວາມຍືນຍົງຄົງຕົວຂອງຊາດເປັນກຳລັງຍູ້ດັນໃຫ້ສັງຄົມມີການຂະຫຍາຍຕົວ,ທັງເປັນເປົ້າໝາຍແຫ່ງການພັດທະນາຄົນ ແລະ ສັງຄົມໃຫ້ມີຄວາມສາມັກຄີປອງດອງ,ຍຸຕິທຳ ແລະ ສີວິໄລ ທັງວັດຖຸ ແລະ ຈິດໃຈ ແລະ ຍັງໄດ້ປະກອບສ່ວນພັນທະຂອງຕົນຢ່າງຕັ້ງໜ້າ ດ້ວຍຄວາມເອົາໃຈໃສ່ໃນການເຂົ້າຮ່ວມບັນດາກົນໄກ ແລະກິດຈະກໍາຮ່ວມມືທາງດ້ານວັດທະນະທຳ-ສິລະປະ ທີ່ຈັດຂຶ້ນຢູ່ພາຍໃນປະເທດສະມາຊິກອາຊຽນ ແລະອາຊຽນບວກສາມ.

ອາຊຽນ ເປັນພາກພື້ນໜຶ່ງທີ່ມີເອກະລັກສະເພາະ, ມີຄວາມຫລາກຫລາຍທາງດ້ານວັດທະນະທໍາ, ສິລະປະ, ຮີດຄອງປະເພນີ,ພາສາ ແລະສາສະໜາເຖິງວ່າຈະມີຄວາມແຕກຕ່າງກັນກໍຕາມແຕ່ປະຊາຊົນອາຊຽນກໍອາໃສຢູ່ຮ່ວມກັນໂດຍສັນຕິ,ມີຄວາມສາມັກຄີປອງດອງ,ຊ່ວຍເຫລືອເຊິ່ງກັນ ແລະກັນ, ທັງມີການແລກປ່ຽນການໄປ-ມາຫາສູ່ເຊິ່ງກັນ ແລະກັນຕະຫລອດມາໂດຍຜ່ານກົນໄກການຮ່ວມມືຂອງອາຊຽນທີ່ມີປະສິດທິພາບ ແລະປະສິດຜົນໂດຍສະເພາະແມ່ນຂອບການຮ່ວມມືໃນຂົງເຂດການປົກປັກຮັກສາ ແລະສົ່ງເສີມມໍລະດົກວັດທະນະທໍາ,ຮີດຄອງປະເພນີອັນດີງາມເພື່ອສ້າງເອກະລັກອາຊຽນ ແລະນຳໄປສູ່ການພັດທະນາທີ່ຍືນຍົງ ແລະວັດທະນາຖາວອນຂອງແຕ່ລະຊາດອາຊຽນ.

ຂ່າວ: ບຸນນິກ

แชร์