ເຊັນບົດບັນທຶກຄວາມເຂົ້າໃຈ ສຶກສາສຳຫຼວດ ແລະສ້າງບົດວິພາກເຕັກນິກ ແຮ່ຄຳ ແລະແຮ່ຕິດພັນ

ວັນທີ 25 ຕຸລາ 2022 ທີ່ຫ້ອງປະຊຸມຫ້ອງວ່າການແຂວງອົງການປົກຄອງແຂວງໄຊສົມບູນ ແລະບໍລິສັດ ລາວກໍ່ສ້າງ ແລະສຳຫຼວດຂຸດຄົ້ນຊັບພະຍາກອນ ຈຳກັດຜູ້ດຽວໄດ້ເຊັນບົດບັນທຶກຄວາມເຂົ້າໃຈ MOU ເພື່ອສຶກສາສຳຫຼວດ ແລະສ້າງບົດວິພາກເຕັກນິກ ແຮ່ຄຳ ແລະ ແຮ່ຕິດພັນໃນເນື້ອທີ 38,62 ກມ 2 ຢູ່ເມືອງຮົ່ມ,ເມືອງອະນຸວົງ ແລະເມືອງລ້ອງຊານແຂວງໄຊສົມບູນໂດຍການເຂົ້າຮ່ວມຂອງທ່ານ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນມີຄະນະນຳຂອງແຂວງ,ຮອງເຈົ້າເມືອງອະນຸວົງ, ຮອງເຈົ້າເມືອງຮົ່ມ,ຮອງເຈົ້າເມືອງລ້ອງຊານພ້ອມດ້ວຍຫົວໜ້າພະແນກການອອ້ມຂ້າງແຂວງ ແລະບໍລິສັດທີ່ກ່ຽວຂ້ອງເຂົ້າຮ່ວມ.



ໂຄງການເຊັນບົດບັນທຶກຄວາມເຂົ້າໃຈດັ່ງກ່າວແມ່ນເພື່ອສຶກສາສຳຫລວດ ແລະສ້າງບົດວິພາກເຕັກນິກ ແຮ່ຄຳ ແລະແຮ່ຕິດພັນ ໃນເນື້ອທີ່ 38,62 ກິໂລຕາແມັດຢູ່ເມືອງອະນຸວົງ,ເມືອງຮົ່ມ ແລະ ເມືອງລ້ອງຊານ ຊຶ່ງເປັນໂຄງການລະຫວ່າງ ລັດຖະບານ ແຫ່ງ ສປປລາວໂດຍມອບໃຫ້ ແຂວງໄຊສົມບູນ ເປັນຕາງໜ້າ ແລະ ບໍລິສັດທີ່ສຳປະທານແມ່ນບໍລິສັດ ລາວກໍ່ສ້າງ ແລະ ສຳຫລວດຂຸດຄົ້ນຊັບພະຍາກອນ ຈຳກັດຜູ້ດຽວ ໂຄງການດັ່ງກ່າວ ຈະດຳເນີນການຈັດຕັ້ງປະຕິບັດເປັນເວລາ 2 ປີ ນັບແຕ່ມື້ລົງລາຍເຊັນເປັນຕົ້ນໄປ ຊຶ່ງກ່ອນເຊັນບົດບັນທຶກຄວາມເຂົ້າໃຈ ໃນຄັ້ງນີ້ ບໍລິສັດໄດ້ມອບພັນທະຕ່າງໆໃຫ້ແກ່ແຂວງໄຊສົມບູນຈຳນວນ 43 ພັນໂດລາຕໍ່ປີ ຊຶ່ງຈະເປັນອີກທ່າແຮງໜຶ່ງໃນການພັດທະນາ ແຂວງໄຊສົມບູນຈະມີສ່ວນຊ່ວຍໃນການຊຸກຍູ້ທາງດ້ານເສດຖະກິດ-ສັງຄົມ ຢູ່ພາຍໃນແຂວງໃຫ້ໄດ້ຮັບການພັດທະນາແບບກ້າວກະໂດດ, ໂດຍຕິດພັນກັບການພັດທະນາສັງຄົມໂດຍສະເພາະແມ່ນທ້ອງຖິ່ນເມືອງອະນຸວົງ, ເມືອງລ້ອງຊານ ແລະເມືອງຮົ່ມ ຮັບປະກັນເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າ ດີຂຶ້ນກວ່າເກົ່າ, ມີວຽກເຮັດງານທຳມີລາຍຮັບອາຊີບທີ່ໝັ້ນຄົງ ແລະຫຼຸດພົ້ນອອກຈາກຄວາມທຸກຍາກເທື່ອລະກ້າວ.



ຈາກນັ້ນໄດ້ມີພິທີລົງນາມເຊັນບົດບັນທຶກຄວາມເຂົ້າໃຈຢ່າງເປັນທາງການຊຶ່ງຕາງໜ້າໃຫ້ແກ່ອົງການປົກຄອງ ແຂວງໄຊສົມບູນ ໂດຍພະແນກແຜນການ ແລະການລົງທຶນເປັນຕົວແທນເຊັນບົດບັນທຶກຄວາມເຂົ້າໃຈ MOU ກັບບໍລິສັດລາວກໍ່ສ້າງແລະ ສຳຫຼວດຂຸດຄົ້ນຊັບພະຍາກອນ ຈຳກັດຜູ້ດຽວ ເຊັນເປັນພະຍານໂດຍພະແນກພະລັງງານ ແລະບໍ່ແຮ່, ເມືອງອະນຸວົງ, ເມືອງຮົ່ມ ແລະເມືອງລ້ອງຊານ ໂດຍຊ້ອງໜ້າແຂກທີ່ເຂົ້າຮ່ວມເປັນສັກຂີພິຍານ. ໃນຕອນທ້າຍບໍລິສັດລາວກໍ່ສ້າງແລະ ສຳຫລວດຂຸດຄົ້ນຊັບພະຍາກອນຈຳກັດຜູ້ດຽວໄດ້ປະກອບສ່ວນມອບເງິນຊຸກຍູ້ໃຫ້ແຂວງອີກຈຳນວນ 200 ລ້ານກີບ ເພື່ອນຳໃຊ້ເຄື່ອນໄຫວວຽກງານຕ່າງໆ ໃນການພັດທະນາແຂວງໄຊສົມບູນໃຫ້ໄດ້ຮັບການພັດທະນາຂຶ້ນຢ່າງບໍ່ຢຸດຢັ້ງ.
ຂ່າວ: ວຽງໃຈ
ບ.ກ ຄຳສາວ ເລືອງຄຳທິບ

แชร์