ອົດສະຕຣາລີຊ່ວຍເຫຼືອເຄື່ອງບັນເທົາທຸກເພື່ອຕອບໂຕ້ໄພພິບັດສຸກເສີນໃນ ສປປ ລາວ

ອົດສະຕຣາລີຍິນດີທີ່ໄດ້ສະໜັບສະໜູນລັດຖະບານລາວ ເພື່ອກຽມຄວາມພ້ອມໃນການຮັບມືກັບໄພພິບັດທາງທຳມະຊາດທີ່ອາດຈະເກີດຂຶ້ນ. ການກະກຽມເຄື່ອງຊ່ວຍເຫຼືອບັນເທົາທຸກໄວ້ໃນໃນປະເທດຈະຊ່ວຍເຮັດໃຫ້ກະຊວງແຮງງານ ແລະ ສະຫວັດດີການສັງຄົມສາມາດຕອບໂຕ້ກັບໄພພິບັດໄດ້ຢ່າງໄວວາແລະສາມາດຊ່ວຍປະຊາຊົນທີ່ອາດຈະຖືກກະທົບໄດ້ຢ່າງມີປະສິດຕິພາບເພື່ອຊ່ວຍໃຫ້ເຂົາເຈົ້າຟື້ນຟູຈາກຜົນກະທົບຂອງໄພພິບັດ.

ໃນວັນທີ 26 ຕຸລານີ້, ທີ່ສະໜາມບິນສາກົນວັດໄຕ, ນະຄອນຫຼວງວຽງຈັນ, ລັດຖະບານອົດສະຕຣາລີ ມອບເຄື່ອງບັນເທົາທຸກຊ່ວຍເຫຼືອວຽກງານດ້ານມະນຸດສະທຳ ເພື່ອຮັບມືກັບໄພພິບັດສຸກເສີນ ໃຫ້ກ່າວມອບໂດຍ ທ່ານ ໂພລ ແຄລີ ເອກອັກຄະລັດຖະທູດອົດສະຕຣາລີ ປະຈຳ ສປປ ລາວ ແລະກ່າວຮັບໂດຍ ທ່ານ ປະເດີມພອນ ສົນທະນີ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ທີ່ສະໜາມບິນສາກົນວັດໄຕ.

ການຈັດສົ່ງເຄື່ອງບັນເທົາທຸກດ້ານວຽກງານມະນຸດສະທໍາໂດຍກອງທັບອົດສະຕຮາລີແມ່ນໜຶ່ງໃນກິດຈະກຳຮ່ວມມືລາວອົດສະຕຣາລີ ເຊິ່ງແມ່ນການຮ່ວມມືປະຈຳປີຂອງທຸກຂະແໜງການຂອງລັດຖະບານອົດສະຕຣາລີ. ໂຄງການນີ້ແມ່ນຖືກຈັດຕັ້ງນຳພາໂດຍກອງທັບອົດສະຕຮາລີເພື່ອສະໜັບສະໜູນການຮ່ວມມືຫວ່າງກະຊວງປ້ອງກັນປະເທດຂອງລາວ ແລະ ອົດສະຕຣາລີກັບບັນດາປະເທດໃນພາກພື້ນຊຶ່ງລວມມີ ສປປ ລາວ.

ເຄື່ອງຊ່ວຍເຫຼືອສະໜັບສະໜູນດ້ານມະນຸດສະທຳມີມູນຄ່າ 300.000 ໂດລາອົດສະຕຣາລີຫຼື ປະມານ 3,2 ຕື້ກີບ ຊຶ່ງປະກອບມີ ຊຸດເຄື່ອງຄົວ, ມຸ້ງ, ຜ້າຫົ່ມ, ເສື່ອນອນ, ຊຸດອະນາໄມ ແລະອຸປະກອນໄຟຟ້າແສງຕາເວັນທີ່ຈະເປັນປະໂຫຍດໃຫ້ແກ່ 560 ຄອບຄົວຫຼື ປະມານ2.800 ຄົນ.ເຄື່ອງເຫຼົ່ານີ້ແມ່ນເຄື່ອງໃຊ້ອັນຈຳເປັນທີ່ສຸດສຳລັບປະຊາຊົນທີ່ໄດ້ຮັບຜົນກະທົບຈາກໄພພິບັດ.

“ລັດຖະບານລາວຕີລາຄາສູງຕໍ່ກັບການສະໜອງເຄື່ອງຊ່ວຍເຫຼືອດ້ານມະນຸດສະທຳຈາກລັດຖະບານອົດສະຕຣາລີ. ການຊ່ວຍເຫຼືອດັ່ງກ່າວຈະຊ່ວຍສ້າງການກຽມຄວາມພ້ອມແລະຄວາມອາດສາມາດໃນການຮັບມືກັບໄພພິບັດ, ໂດຍສະເພາະແມ່ນໄພນໍ້າຖ້ວມທີ່ເກີດຂຶ້ນຢູ່ເລື້ອຍໆ ແລະມີຄວາມຮຸນແຮງຂຶ້ນ." ທ່ານລັດຖະມົນຕີ ໃບຄຳກ່າວ.

ລັດຖະບານອົດສະຕຣາລີມີຄວາມມຸ່ງໝັ້ນທີ່ຈະສະໜັບສະໜູນລັດຖະບານລາວໃນວຽກງານດ້ານມະນຸດສະທຳ ແລະຕອບໂຕ້ໄພພິບັດ ແລະການຟື້ນຟູໂດຍຜ່ານການຮ່ວມມືດ້ານການພັດທະນາຂອງອົດສະຕຣາລີ.
(ຂ່າວສານຮສສ)

แชร์