ພ້ອມກັນປົກປັກຮັກສາຂໍ້ມູນພາບ-ສຽງ ໃຫ້ກາຍເປັນສົມບັດຊາດ

ກົມຮູບເງົາກະຊວງຖະແຫລງຂ່າວ, ວັດທະນະທຳ ແລະທ່ອງທ່ຽວຈະໄດ້ຈັດກິດຈະກຳຕິດປ້າຍຄຳຂວັນ ແລະໂຄສະນາເຜີຍແຜ່ກ່ຽວກັບວັນມໍລະດົກ ພາບ-ສຽງໂລກ ຄົບຮອບ 42 ປີ ແລະ ວັນຄວາມຊົງຈຳໂລກຄົບຮອບ 30 ປີ ໃຫ້ສັງຄົມໄດ້ຮັບຮູ້ ແລະພ້ອມກັນປົກປັກຮັກສາຂໍ້ມູນ ພາບ-ສຽງ ທີ່ເປັນມໍລະດົກຂອງປະເທດໃຫ້ກາຍເປັນສົມບັດຂອງຊາດເພື່ອສະເຫຼີມສະຫຼອງວັນມໍລະດົກ ພາບ-ສຽງໂລກ ໃນປີນີ້, ໃຫ້ມີບັນຍາກາດອັນຄຶກຄື້ນແນໃສ່ໃຫ້ທົ່ວສັງຄົມເຫັນເຖິງຄວາມໝາຍ, ຄວາມສຳຄັນຂອງພາບ-ສຽງ ໂດຍສະເພາະແມ່ນຮູບເງົາມູນເຊື້ອໃນການຕໍ່ສູ້ກູ້ຊາດຂອງປະຊາຊົນລາວ. ພ້ອມນີ້, ຍັງເປັນການປູກຈິດສຳນຶກໃຫ້ແກ່ບັນດາຊາວໜຸ່ມ-ເຍົາວະຊົນໃຫ້ຮູ້ຈັກຄຸນຄ່າຂອງການເກັບຮັກສາ, ຖະໜຸຖະໜອມວັດຖຸທີ່ເປັນພາບ-ສຽງໃຫ້ກາຍເປັນສົມບັດຂອງຕົນເອງ, ເປັນຂອງປະເທດຊາດ ແລະໃຫ້ກາຍເປັນມໍລະດົກພາບ-ສຽງໂລກ ຊຶ່ງອົງການອຸຍແນັດສະໂກໄດ້ກຳນົດເອົາວັນທີ 27 ຕຸລາ ຂອງທຸກໆປີເປັນວັນມໍລະດົກ ພາບ-ສຽງໂລກ.

ໂອກາດນີ້, ທ່ານ ຄຳເພົ້າ ວັນນະວົງ ຫົວໜ້າກົມຮູບເງົາໄດ້ໃຫ້ຮູ້ ໃນວັນທີ 25 ຕຸລາ 2022 ນີ້ວ່າ:ອົງການອົງການອຸຍແນັດສະໂກ (UNESCO) ໄດ້ກຳນົດເອົາວັນທີ 27 ຕຸລາ ຂອງທຸກໆປີເປັນວັນມໍລະດົກ ພາບ-ສຽງໂລກ ໂດຍຮຽກຮ້ອງໃຫ້ປະເທດສະມາຊິກທຸກປະເທດໃຫ້ຈັດຕັ້ງການສະເຫຼີມສະຫຼອງວັນດັ່ງກ່າວ, ຕາມສະພາບຄວາມເປັນຈຶ່ງຂອງປະເທດນັ້ນໆ ເພື່ອປູກຈິກສໍານຶກໃຫ້ສັງຄົມໄດ້ເຫັນຄວາມສຳຄັນຂອງເອກະສານທີ່ບັນທຶກດ້ວຍພາບ-ສຽງ (AV Material).

ສຳລັບ ລັດຖະບານແຫ່ງ ສປປ ລາວ ແມ່ນເຫັນຄວາມສຳຄັນໃນການຮັກສາມໍລະດົກທີ່ເປັນພາບ-ສຽງຂອງຊາດ ໂດຍສະເພາະ ແມ່ນຮູບເງົາເອກະສານທີ່ຜະລິດໃນຊຸມປີ 1950 ເຖິງປັດຈຸບັນ, ຊຶ່ງລັດຖະບານລາວ ໄດ້ກໍ່ສ້າງພື້ນຖານໂຄງລ່າງທີ່ສຳຄັນ ໂດຍການສ້າງສາງສຳເນົາຟິມຮູບເງົາທີ່ໄດ້ມາດຕະຖານສາກົນ, ທີ່ມີອຸຫະພູມ 10 ອົງສາ ແລະ ຄວາມຊຸ່ມ 35% ສາມາດຮັກສາເອກະສານສຳຄັນຂອງຊາດບໍ່ໃຫ້ເສຍຫາຍ ແລະ ຖືກທຳລາຍ ດ້ວຍສະພາບດິນຟ້າອາກາດເຂດຮ້ອນ ໃນຂົງ ເຂດອາຊີຕາເວັນອອກສຽງໃຕ້ຂອງພວກເຮົາ.

ທ່ານ ຄຳເພົ້າ ວັນນະວົງ ກ່າວອີກວ່າ: ການເກັບກຳຂໍ້ມູນເອກະສານປະເພດຕ່າງໆ ເພື່ອບັນທຶກປະຫວັດສາດຂອງຊາດໃນແຕ່ລະໄລຍະນັ້ນມີຄວາມສຳຄັນຫລາຍຊຶ່ງທຸກຊາດໃນໂລກໄດ້ເອົາໃຈໃສ່ເກັບຮັກສາເອກະສານເຫຼົ່ານັ້ນ ໃຫ້ເປັນຂໍ້ມູນມໍລະດົກຂອງຊາດ ຊຶ່ງເອກະສານທີ່ບັນທຶກທີ່ມີຊີວິດຊີວາ ແລະເປັນຫລັກຖານໃຫ້ຄົນຮຸ່ນຫລັງໄດ້ເຫັນກັບຕາຕົນເອງຄືກັບຕົນເອງໄດ້ຢູ່ກັບເຫດການນັ້ນໆ ແມ່ນເອກະສານທີ່ບັນທຶກເຫດການຕ່າງໆ ຂອງປະຫວັດສາດດ້ວຍວັດຖຸທີ່ເປັນ ພາບ-ສຽງ ເຊັ່ນ: ຮູບເງົາ, ກະແຊັດວິດີໂອ, VCD, DVD, ຟາຍວິດີໂອເອັດດີ(HD) ແລະອື່ນໆ.

ໂອກາດນີ້, ທ່ານ ຄຳເພົ້າ ວັນນະວົງ ຍັງໄດ້ຮຽກຮ້ອງມາຍັງທຸກພາກສ່ວນໃນສັງຄົມ, ອົງການຈັດຕັ້ງພັກ-ລັດ, ເອກະຊົນ, ບຸກຄົນ, ນິຕິບຸກຄົນ ແລະຄອບຄົວທີ່ມີວັດຖຸທີ່ເປັນຂໍ້ມູນທາງດ້ານພາບ-ສຽງ ເຊັ່ນ: ຟິມຮູບເງົາ,ກະແຊັດວິດີໂອ,VCD, DVD, HD ແລະອື່ນໆ ທີ່ໄດ້ບັນທຶກເຫດການຕ່າງໆ ໃຫ້ປົກປັກຮັກສາໄວ້ໃຫ້ດີເພາະວ່າໃນອະນາຄົດມັນຈະກາຍເປັນມໍລະດົກອັນລໍ້າຄ່າໃຫ້ແກ່ໂຕທ່ານເອງ ແລະປະເທດຊາດ.
ຂ່າວ: ປະເທດລາວ. ທະນູທອງ. ພາບ: ເກດສະໜາ

แชร์