ຫົວໜ້າ ອອປສ ຊີ້ນໍາການຜັນຂະຫຍາຍວາລະແຫ່ງຊາດການແກ້ໄຂບັນຫາຢາເສບຕິດຢູ່ໄຊສົມບູນ

ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ (ອອປສ) ພ້ອມຄະນະລົງເຄື່ອນໄຫວຊີ້ນໍາວຽກງານການຈັດຕັ້ງຜັນຂະຫຍາຍວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດຢູ່ແຂວງໄຊສົມບູນ ແລະ ໄດ້ພົບປະຢ້ຽມຢາມທ່ານ ພອຍຄໍາ ຮຸ່ງບຸນຍວງ ເຈົ້າແຂວງໄຊສົມບູນ, ພ້ອມທັງໄດ້ລາຍງານຈຸດປະສົງການລົງເຄື່ອນໄຫວເຮັດວຽກໃນຄັ້ງນີ້, ຊຶ່ງຈະໄດ້ເຂົ້າຮ່ວມກອງປະຊຸມຊີ້ນຳ ການຈັດຕັ້ງຜັນຂະຫຍາຍວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດ ໃນວັນທີ 26 ຕຸລາ 2022 ໂດຍມີບັນດາຫົວໜ້າກົມທີ່ມາຈາກອົງການໄອຍະການປະຊາຊົນສູງສຸດ, ຫົວໜ້າອົງການໄອຍະການປະຊາຊົນແຂວງ, ຫົວໜ້າອົງການໄອຍະການປະຊາຊົນເຂດ 1, ເຂດ 2 , ພະນັກງານໄອຍະການເຂດປະຈຳເມືອງ, ອົງການໄອຍະການທະຫານແຂວງໄຊສົມບູນເຂົ້າຮ່ວມ.

ໃນກອງປະຊຸມດັ່ງກ່າວ, ທ່ານ ໄຊຊະນະ ໂຄດພູທອນ ໄດ້ແຈ້ງຕໍ່ກອງປະຊຸມຊາບວ່າ: ການລົງມາເຮັດວຽກ ໃນຄັ້ງນີ້ເປັນການຕິດຕາມ, ຊຸກຍູ້ການຈັດຕັ້ງຜັນຂະຫຍາຍແນວທາງນະໂຍບາຍຂອງພັກ-ລັດຖະບານ ແຫ່ງ ສປປ ລາວ, ມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ, ວາລະແຫ່ງຊາດກ່ຽວກັບການແກ້ໄຂບັນຫາຢາເສບຕິດ ໃຫ້ໄດ້ຮັບຜົນສໍາເລັດ, ການພັດທະນາວຽກງານໄອຍະການປະຊາຊົນ, ອົງການໄອຍະການປະຊາຊົນເຂດ, ພະນັກງານໄອຍະການປະຈຳເມືອງ, ອົງການໄອຍະການທະຫານ ຈົ່ງສືບຕໍ່ຈັດຕັ້ງປະຕິບັດບັນດານິຕິກໍາ, ຄໍາສັ່ງຂອງຫົວໜ້າອົງການໄອຍະການປະຊາຊົນສູງສຸດ ເຂົ້າສູ່ວຽກງານໄອຍະການປະຊາຊົນ ໃຫ້ໄດ້ຮັບການແກ້ໄຂຢ່າງເຂັ້ມງວດ, ຍົກສູງຄຸນນະພາບໃນການຕິດຕາມກວດກາ ການປະຕິບັດກົດໝາຍ ແລະສັ່ງຟ້ອງຜູ້ຖືກຫາຂຶ້ນສານ, ສ້າງກົນໄກປະສານງານລະຫວ່າງອົງການໄອຍະການປະຊາຊົນແຂວງ ກັບອົງການທີ່ກ່ຽວຂ້ອງຂອງແຂວງ ໂດຍສະເພາະ ການຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງ ຍາກທາງດ້ານເສດຖະກິດ-ການເງິນ, ການແກ້ໄຂບັນຫາຢາເສບຕິດເຂົ້າສູ່ວຽກງານໄອຍະການປະຊາຊົນ, ການຕິດຕາມກວດກາທົ່ວໄປ, ການດໍາເນີນຄະດີປົກຄອງ, ການປະຕິບັດຄໍາຕັດສີນຂອງສານ, ສ້າງກົນໄກປະສານງານລະຫວ່າງອົງການໄອຍະການປະຊາຊົນກັບອົງການປົກຄອງ, ອົງການສືບສວນ-ສອບສວນຂອງເຈົ້າໜ້າທີ່ຕຳຫຼວດ, ພາສີ, ປ່າໄມ້ ແລະ ອົງການສືບສວນ-ສອບສວນອື່ນຢ່າງກົມກຽວ ດ້ວຍການສ້າງບົດບັນທຶກຮ່ວມ, ນິຕິກຳ ແລະປື້ມຄູ່ມືອັນເປັນພື້ນຖານໃຫ້ແກ່ການຍົກສູງຄຸນນະພາບໃນການຕິດຕາມກວດກາການປະຕິບັດກົດໝາຍ, ແກ້ໄຂການລະເມີດທາງປົກຄອງ, ນຳເອົາຜູ້ກະທຳຜິດມາດຳເນີນຄະດີສັ່ງຟ້ອງໃຫ້ສານຕັດສີນຖືກຕ້ອງເປັນທຳເຮັດໃຫ້ສັງຄົມມີຄວາມສະຫງົບ.

ໃນໂອກາດດັ່ງກ່າວ, ທ່ານຫົວໜ້າອົງການໄອຍະການປະຊາຊົນສູງສຸດໄດ້ໂອ້ລົມ ແລະຊີ້ນຳໃນການຈັດຕັ້ງປະຕິບັດຫຼາຍບັນຫາທີ່ຕິດພັນກັບວຽກງານໃນຂົງເຂດໄອຍະການ ໂດຍຮຽກຮ້ອງໃຫ້ຜູ້ແທນກອງປະຊຸມ ແລະພະນັກງານ-ລັດຖະກອນທັງໜົດຈົ່ງເຊີດຊູຄວາມຮັບຜິດຊອບຂອງຕົນໃນການເຮັດລ້ອນໜ້າທີ່-ທີ່ພັກ, ລັດ ແລະ ປະຊາຊົນມອບໝາຍໃຫ້; ຮັບໃຊ້ຊາດ, ຮັບໃຊ້ປະຊາຊົນດ້ວຍຄວາມບໍລິສຸດໃຈ, ນໍາເອົາເນື້ອໃນຈິດໃຈໃນການຊີ້ນໍາໃນຄັ້ງນີ້ໄປຈັດຕັ້ງຜັນຂະຫຍາຍຢູ່ກົມກອງຂອງຕົນ ເຂົ້າໃນວຽກງານຕົວຈິງຢ່າງມີຜົນສໍາເລັດ, ພັດທະນາວຽກງານໄອຍະການປະຊາຊົນຕາມທິດກ້າວໜ້າ, ທັນສະໄໝ ແລະມີວິທະຍາສາດ.

ພ້ອມກັນນີ້, ຄະນະພັກ-ຄະນະນຳ ອົງການໄອຍະການປະຊາຊົນສູງສຸດກໍໄດ້ມອບຄອມພີວເຕີ 2 ຊຸດ ໃຫ້ແກ່ ອົງການໄອຍະການປະຊາຊົນແຂວງເພື່ອນໍາໃຊ້ເຂົ້າສູ່ວຽກງານໄອຍະການປະຊາຊົນຕາມທິດຫັນເປັນທັນສະໄໜເທື່ອລະກ້າວ.
ຂ່າວ: ອອປສ

แชร์