ສະຫຼອງວັນເດັກຍິງສາກົນ ແລະວັນເກີດນາງ ນ້ອຍ ຄົບຮອບ 16 ປີ

ສູນກາງສະຫະພັນແມ່ຍິງລາວ (ສສຍລ) ແລະອົງການສະຫະປະຊາຊາດກອງທຶນເພື່ອປະຊາກອນ (UNFPA), ຮ່ວມກັບອົງການ ແພຣນ ສາກົນປະຈໍາ ສປປ ລາວ ແລະບັນດາຄູ່ຮ່ວມງານໄດ້ຈັດພິທີສະເຫຼີມສະຫຼອງວັນເດັກຍິງສາກົນ ປະຈໍາປີ 2022 ແລະວັນເກີດນາງ ນ້ອຍ ຄົບຮອບ 16 ປີ ຈັດຂຶ້ນໃນວັນທີ 26 ຕຸລາ 2022 ທີ່ໂຮງແຮມເໜືອງແທງ ນະຄອນຫຼວງວຽງຈັນ ພາຍໃຕ້ຄໍາຂັວນ’’ ປັດຈຸບັນແມ່ນເວລາຂອງ ພວກເຮົາ-ສິດທິຂອງພວກເຮົາ ແລະອະນາຄົດຂອງພວກເຮົາ’’ ໂດຍການເປັນປະທານຮ່ວມຂອງທ່ານ ນາງ ອິນລາວັນ ແກ້ວບຸນພັນ ປະທານຄະນະບໍລິຫານງານສູນກາງສະຫະພັນແມ່ຍິງລາວ, ທ່ານ ນາງ ມາຣຽມ ເອຄານ ຜູ້ຕາງໜ້າອົງການສະຫະປະຊາຊາດກອງທຶນເພື່ອປະຊາກອນ UNFPA ມີບັນດາທ່ານລັດຖະມົນຕີ,ຮອງລັດຖະມົນຕີບັນດາຄູ່ຮ່ວມງານສະຖາທູດອົງການຈັດຕັ້ງສາກົນ ຫົວໜ້າກົມ, ຮອງກົມ, ປະທານ, ຮອງປະທານສະຫະພັນແມ່ຍິງບັນດາກະຊວງ, ອົງການ ແລະນະຄອນຫຼວງວຽງຈັນ, ຜູ້ຕາງໜ້າອົງການຈັດຕັ້ງສາກົນ, ອົງການຈັດຕັ້ງທາງສັງຄົມເຂົ້າຮ່ວມ.

ໂອກາດນີ້, ທ່ານ ນາງ ອິນລາວັນ ແກ້ວບຸນພັນ ໄດ້ກ່າວວ່າ: ນາງ ນ້ອຍ ຊື່ງແມ່ນນາມສົມມຸດທີ່ພວກເຮົາຮ່ວມກັນຕັ້ງຊື່ໃຫ້ລາວ ໃນປີ 2016 ວ່າ “ນາງນ້ອຍ” ເພື່ອເປັນຕົວແທນໃຫ້ແກ່ແມ່ຍິງໜຸ່ມລາວ ແລະ ໃນປີນີ້ ນາງ ນ້ອຍ ແມ່ນມີອາຍຸໄດ້ 16 ປີ ແລະ ກຳລັງກ້າວເຂົ້າສູ່ໄວໜຸ່ມຢ່າງເຕັມຕົວຊຶ່ງເປັນໄວຂອງເດັກຍິງທີ່ກຳລັງຕ້ອງການເຂົ້າສູ່ການຮຽນຮູ້ຕ່າງໆເພື່ອພັດທະນາຕົນເອງທາງຮ່າງກາຍ ແລະມັນສະໜອງໃຫ້ກາຍເປັນເດັກທີ່ມີຄວາມສະຫຼາດ ແລະມີຄວາມຮູ້ຄວາມສາມາດ. ເຖິງຢ່າງໃດກໍຕາມ, ເດັກຍິງລາວທີ່ເປັນຕົວແທນໂດຍນາງ ນ້ອຍ ແມ່ນໜຶ່ງໃນບັນດາຜູ້ຍິງທີ່ຖືກປ່ອຍປະໃນເລື່ອງຂອງການເຂົ້າເຖິງການບໍລິການດ້ານສຸຂະພາບ, ການສຶກສາ, ການຈ້າງງານ ແລະໂອກາດດ້ານອື່ນໆ ເຮັດໃຫ້ເດັກຍິງເຫຼົ່ນັ້ນຕົກຢູ່ໃນຄວາມສ່ຽງທີ່ເຫັນໄດ້ຊັດເຈນແມ່ນອັດຕາການແຕ່ງດອງຂອງເດັກຍິງແຕ່ອາຍຸຍັງນ້ອຍແມ່ນສູງ ແລະອັດຕາການເກີດລູກຂອງໄວໜຸ່ມໃນແມ່ນສູງທີ່ສຸດໃນພາກພື້ນ. ການຈັດພິທີສະເຫຼີມສະຫຼອງວັນເກີດນາງ ນ້ອຍ ຄົບຮອບ 16 ປີ ແມ່ນມີຄວາມໝາຍຄວາມສຳຄັນຍິ່ງເນື່ອງຈາກເປັນການຈັດຕັ້ງປະຕິບັດກອບແຜນງານ 2030 ຂອງນາງ ນ້ອຍ ເພື່ອແກ້ໄຂສິ່ງທ້າທາຍຂອງຂອງເດັກຍິງລາວທີ່ປະເຊີນກັບບັນຫາເລື່ອງການເຂົ້າເຖິງການສຶກສາ, ສຸຂະພາບຈະເລີນພັນ, ເພດສຳພັນ, ການຈ້າງງານ ແລະຄວາມສະເໝີພາບຍິງ-ຊາຍ ລວມທັງໂອກາດໃນການມີສ່ວນຮ່ວມ ແລະການຕັດສິນໃຈໃນເລື່ອງຕ່າງໆ ໃນຊີວິດຂອງເຂົາເຈົ້າ.

ການຈັດງານຄັ້ງນີ້ສະແດງໃຫ້ເຫັນເຖິງຄວາມເອົາໃຈໃສ່ຂອງລັດຖະບານ ສປປ ລາວ ໂດຍສະເພາະສູນກາງສະຫະພັນແມ່ຍິງລາວ, ອົງການ UNFPA, ຄູ່ຮ່ວມພັດທະນາ ແລະພາກສ່ວນຕ່າງໆ ທີ່ໄດ້ເອົາໃຈໃສ່ຈັດຕັ້ງປະຕິບັດບັນດາຕົວຊີ້ວັດຂອງເປົ້າໝາຍການພັດທະນາແບບຍືນຍົງໂດຍສະເພາະຕົວຊີ້ບອກ SDG2, SDG3, SDG4, SDG 5 ແລະ SDG8 ທີ່ເຊື່ອມໃສ່ຂອບວຽກນາງນ້ອຍ. ການສະເຫຼີມສະຫຼອງວັນເດັກຍິງສາກົນ ແລະ ວັນເກີດນາງນ້ອຍ ສຳລັບປີນີ້ ແມ່ນເພື່ອເປັນການຜັນຂະຫຍາຍຖະແຫຼງການຂອງອົງການສະຫະປະຊາຊາດ ແລະເປັນການປະຕິບັດແຜນງານຮ່ວມມືລະຫວ່າງລັດຖະບານ ສປປ ລາວ ແລະອົງການສະຫະປະຊາຊາດ ກອງທຶນສຳລັບປະຊາກອນ; ເປັນການສ້າງຂະບວນການສະແດງໃຫ້ເຫັນເຖິງຄວາມສຳຄັນຂອງສິດທິເດັກ, ສົ່ງເສີມການເຂົ້າເຖິງໂອກາດຕ່າງໆ ຂອງເດັກຍິງ ແລະ ຄວາມເທົ່າທຽມຂອງເດັກຍິງ ແລະ ເດັກຊາຍໃນສັງຄົມ; ເພື່ອສ້າງຄວາມຮັບຮູ້, ເຂົ້າໃຈ ຊອກວິທີທາງແກ້ໄຂບັນຫາສິ່ງທ້າທາຍຕ່າງໆ ລວມທັງຄວາມຫຍຸ້ງຍາກທີ່ເດັກຍິງກໍາລັງປະເຊີນໃນປັດຈຸບັນ ເພື່ອຮ່ວມມືໃນການກັນແກ້ໄຂບັນຫາດັ່ງກ່າວທີ່ເດັກຍິງໜຸ່ມກຳລັງປະເຊີນ ແນ່ໃສ່ປົກປ້ອງສິດຜົນປະໂຫຍດ ແລະ ສ້າງຄວາມເຂັ້ມແຂງໃຫ້ບັນດາເດັກຍິງໂດຍສະເພາະພາຍຫຼັງສະພາບທີ່ມີການລະບາດຂອງໂຄວີດ-19,ດ້ວຍການຈັດກິດຈະກຳຕ່າງໆເພື່ອໂຄສະນາປູກຈິດສຳນຶກໃຫ້ທຸກພາກສ່ວນໃນທົ່ວສັງຄົມ ໄດ້ຮັບຮູ້ ແລະເຂົ້າໃຈດ້ວຍການຮ່ວມມື ແລະສະໜັບສະໜູນທຶນຮອນຈາກອົງການສະຫະປະຊາຊາດກອງທຶນສຳລັບປະຊາກອນເພື່ອຈັດຕັ້ງປະຕິບັດວຽກງານດັ່ງກ່າວ. ເປັນຕົ້ນການຈັດຕັ້ງປະຕິບັດວຽກງານແມ່ຍິງ 3 ດີ ຕິດພັນການສ້າງບ້ານພັດທະນາຕາມທິດ 3 ສ້າງ, ການມີສ່ວນຮ່ວມຂອງເພດຊາຍເຂົ້າໃນການປ້ອງກັນ ແລະລຶບລ້າງຄວາມຮຸນແຮງໃນຄອບຄົວ, ສະຖານທີ່ເຮັດວຽກ, ສະຖານທີ່ອອກແຮງງາານ ແລະໃນພື້ນທີ່ສາທະລະນະທີ່ຕິດພັນກັບແຜນພັດທະນາແມ່ຍິງແຫ່ງຊາດ.

แชร์