ປະທານປະເທດ ແຫ່ງ ສປປ ລາວ ມີຄໍາເຫັນໂອ້ລົມຕໍ່ກອງປະຊຸມພົບປະທຸລະກິດ ລະຫວ່າງ ສປປ ລາວ ແລະບຣູໄນ ດາຣູຊາລາມ

ໃນຕອນເຊົ້າຂອງວັນທີ 26 ຕຸລາ 2022 ທີ່ນະຄອນຫຼວງ ບັນດາ ເສຣິ ເບກາວັນ, ບຣູໄນ ດາຣູຊາລາມ, ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ເປັນກຽດເຂົ້າຮ່ວມ ແລະ ມີຄໍາເຫັນໂອ້ລົມຕໍ່ກອງປະຊຸມພົບປະທຸລະກິດ ລະຫວ່າງ ສປປ ລາວ ແລະ ບຣູໄນ ດາຣູຊາລາມ ໃນໂອກາດຢ້ຽມຢາມລັດຖະກິດທີ່ ບຣູໄນ ດາຣູຊາລາມ ໃນວັນທີ 24-26 ຕຸລາ 2022. ກອງປະຊຸມດັ່ງກ່າວໄດ້ຈັດຂຶ້ນໂດຍສະພາການຄ້າ ແລະອຸດສາຫະກໍາ ແຫ່ງຊາດລາວ ຮ່ວມກັບ ສະພາການຄ້າ ແລະ ອຸດສາຫະກໍາ ແຫ່ງ ບຣູໄນ ດາຣູຊາລາມ, ໂດຍມີຄະນະຜູ້ແທນຂັ້ນສູງ ແລະ ບັນດານັກທຸລະກິດ ຂອງທັງສອງປະເທດ ລາວ-ບຣູໄນ ເຂົ້າຮ່ວມ, ເຊິ່ງມີຈຸດປະສົງເພື່ອເປີດໂອກາດໃຫ້ມີການປຶກສາຫາລືຮ່ວມກັນໃນການຮ່ວມມື ລະຫວ່າງພາກທຸລະກິດຂອງສອງປະເທດ ລາວ-ບຣູໄນ, ທັງຍັງເປັນເວທີເພື່ອເປີດໂອກາດໃນການຈັບຄູ່ທຸລະກິດ ທີ່ທັງສອງຝ່າຍມີຄວາມສົນໃຈ ແລະມີທ່າແຮງ, ໂດຍສະເພາະແມ່ນສຸມໃສ່ການຊຸກຍູ້ການຄ້າ ແລະ ການລົງທຶນລະຫວ່າງສອງປະເທດໃຫ້ຂະຫຍາຍຕົວ, ມີປະສິດທະພາບ ແລະປະສິດທິຜົນດີຂຶ້ນເທື່ອລະກ້າວ.

ໃນໂອກາດນີ້, ພະນະທ່ານປະທານປະເທດ ທອງລຸນ ສີສຸລິດ ໄດ້ໃຫ້ກຽດຂຶ້ນກ່າວເປີດກອງປະຊຸມໂດຍໄດ້ຕີລາຄາສູງຕໍ່ລັດຖະບານບຣູໄນ ທີ່ໄດ້ສ້າງເງື່ອນໄຂໃຫ້ມີເວທີພົບປະ ລະຫວ່າງ ພາກທຸລະກິດຂອງ ສປປ ລາວ ແລະບຣູໄນ ດາຣູຊາລາມ ເພື່ອໃຫ້ຕົວແທນນັກທຸລະກິດທັງສອງປະເທດໄດ້ມີໂອກາດແລກປ່ຽນຄໍາຄິດເຫັນ, ບົດຮຽນ ແລະ ປະສົບການຊຶ່ງກັນ ແລະ ກັນ ແນໃສ່ເສີມຂະຫຍາຍການຮ່ວມມື ລະຫວ່າງ ພາກທຸລະກິດດ້ວຍກັນໃຫ້ແໜ້ນແຟ້ນຍິ່ງໆຂຶ້ນໃນຕໍ່ໜ້າ, ພ້ອມທັງເປັນໂອກາດໃຫ້ພາກລັດໄດ້ນໍາສະເໜີທິດທາງ ແລະ ນະໂຍບາຍ ໃນການສົ່ງເສີມການລົງທຶນຂອງ ສປປ ລາວ ໃນເງື່ອນໄຂໃໝ່ ແລະ ຮັບຟັງການສະເໜີຄວາມຕ້ອງການ ແລະ ຈຸດປະສົງຕ່າງໆຂອງພາກທຸລະກິດ ບຣູໄນ ເພື່ອເປັນບ່ອນອີງໃຫ້ແກ່ລັດຖະບານໃນການຄົ້ນຄວ້າວາງນະໂຍບາຍ ແລະສ້າງສະພາບແວດລ້ອມທີ່ເອື້ອອໍານວຍໃຫ້ແກ່ການລົງທຶນຂອງພາກເອກະຊົນ ໃຫ້ນັບມື້ນັບດີຂຶ້ນ. ພ້ອມດຽວກັນນີ້, ພະນະທ່ານປະທານປະເທດ ທອງລຸນ ສີສຸລິດ ກໍ່ໄດ້ຍົກໃຫ້ເຫັນເຖິງຄວາມພະຍາມຂອງ ສປປ ລາວ ໃນການຟື້ນຟູສະພາບເສດຖະກິດທີ່ໄດ້ຮັບຜົນກະທົບຢ່າງໜັກໜ່ວງຈາກການແຜ່ລະບາດຂອງພະຍາດໂຄວິດ-19, ພ້ອມທັງຍົກໃຫ້ເຫັນເຖິງທ່າແຮງບົ່ມຊ້ອນຂອງ ສປປ ລາວ ລວມທັງສິ່ງອໍານວຍຄວາມສະດວກຕ່າງໆເພື່ອດຶງດູດການລົງທຶນຈາກທຸກພາກສ່ວນທຸລະກິດທັງພາຍໃນ ແລະຕ່າງປະເທດເປັນຕົ້ນແມ່ນນະໂຍບາຍສົ່ງເສີມການລົງທຶນໃນຂະແໜງກະສິກໍາສະອາດ, ອຸດສາຫະກໍາປຸງແຕ່ງ, ການທ່ອງທ່ຽວວັດທະນະທໍາ-ອະນຸລັກທໍາມະຊາດ ແລະການພັດທະນາຂະແໜງພະລັງງານ.

ພະນະທ່ານປະທານປະເທດ ທອງລຸນ ສີສຸລິດ ຍັງໄດ້ຍົກໃຫ້ເຫັນອີກວ່າຕະຫຼອດໄລຍະເກືອບ 3 ທົດສະວັດ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ບຣູໄນ ດາຣູຊາລາມ, ສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດ ໄດ້ຮັບການພັດທະນາ ແລະ ຂະຫຍາຍຕົວເປັນກ້າວໆມາ, ສອງປະເທດ ລາວ-ບຣູໄນ ໄດ້ມີການແລກປ່ຽນການຢ້ຽມຢາມລະຫວ່າງການນໍາຂັ້ນສູງໃນລະດັບຕ່າງໆຢ່າງເປັນປົກກະຕິອັນເປັນພື້ນຖານໃຫ້ແກ່ການຮັດແໜ້ນສາຍພົວພັນທີ່ດີງາມ ແລະເສີມຂະຫຍາຍການຮ່ວມມືໃຫ້ກວ້າງຂວາງຍິ່ງໆຂຶ້ນໃນຫຼາຍຂົງເຂດເປັນຕົ້ນແມ່ນທາງດ້ານການເມືອງ,ການພັດທະນາຊັບພະຍາກອນມະນຸດ,ເສດຖະກິດ ແລະ ວັດທະນະທໍາ-ສັງຄົມ. ເວົ້າສະເພາະການຮ່ວມມືໃນຂົງເຂດເສດຖະກິດ ເຖິງແມ່ນວ່າການຮ່ວມມືດ້ານການຄ້າ ແລະ ການລົງທຶນລະຫວ່າງສອງປະເທດໃນໄລຍະຜ່ານມາຍັງບໍ່ທັນຕອບສະໜອງຕາມທ່າແຮງບົ່ມຊ້ອນຂອງທັງສອງປະເທດກໍ່ຕາມ, ແຕ່ໃນຕໍ່ໜ້າລັດຖະບານຂອງທັງສອງປະເທດ ຈະຕ້ອງສືບຕໍ່ອໍານວຍຄວາມສະດວກ ແລະ ສ້າງກາລະໂອກາດໃຫ້ຂະແໜງການທີ່ເປັນທ່າແຮງ ຂອງທັງສອງປະເທດ, ເຊິ່ງເປີດກວ້າງການຮ່ວມມືກັນໃຫ້ເກີດດອກອອກຜົນເປັນຮູບປະທໍາກວ່າເກົ່າ, ເປັນຕົ້ນແມ່ນຂະແໜງກະສິກໍາແລະພະລັງງານໄຟຟ້າສະອາດທີ່ ສປປ ລາວ ມີທ່າແຮງໃນດ້ານການຜະລິດເປັນສິນຄ້າສົ່ງອອກ ແລະທາງ ບຣູໄນ ກໍ່ມີທ່າແຮງດ້ານຂະແໜງພະລັງງານ ໂດຍສະເພາະນໍ້າມັນ ແລະ ອາຍແກັດ. ພ້ອມນັ້ນ, ພະນະທ່ານປະທານປະເທດ ທອງລຸນ ສີສຸລິດ ຍັງໄດ້ຮຽກຮ້ອງໃຫ້ບັນດານັກທຸລະກິດຂອງທັງສອງປະເທດໃຫ້ມີການແລກປ່ຽນ ແລະພົວພັນຮ່ວມມືທາງດ້ານການຄ້າ ແລະການລົງທຶນໃນຂະແໜງການທີ່ຕົນມີທ່າແຮງເພື່ອນໍາເອົາຜົນປະໂຫຍດຕົວຈິງມາສູ່ທັງສອງປະເທດ ລາວ-ບຣູໄນ.

ໃນໂອກາດດຽວກັນນີ້, ໄດ້ມີການລົງນາມບົດບັນທຶກຄວາມເຂົ້າໃຈວ່າດ້ວຍການຮ່ວມມືລະຫວ່າງສະພາການຄ້າ ແລະອຸດສາຫະກໍາ ແຫ່ງຊາດລາວ ແລະສະພາການຄ້າ ແລະ ອຸດສາຫະກໍາ ແຫ່ງ ບຣູໄນ ດາຣູຊາລາມ, ໂດຍແມ່ນ ທ່ານ ອຸເດດ ສຸວັນນະວົງ, ປະທານສະພາການຄ້າ ແລະອຸດສາຫະກໍາ ແຫ່ງຊາດລາວ ແລະທ່ານ Haji Abdul Saman Haji Ahmad, ປະທານສະພາການຄ້າ ແລະອຸດສາຫະກໍາ ແຫ່ງ ບຣູໄນ ດາຣູຊາລາມ.

ຂ່າວໂດຍ: ກົມການຂ່າວ, ກະຊວງການຕ່າງປະເທດ
ຮູບພາບໂດຍ: ສໍານັກຂ່າວສານປະເທດລາວ

แชร์