ພິທີເປີດໂຄງການ “ການຜະລິດກະສິກໍາເພື່ອແກ້ໄຂຄວາມທຸກຍາກ’’ ຂອງບ້ານຊຽງແຫວນ ເມືອງທ່າແຂກ ແຂວງຄໍາມ່ວນ ໂດຍບໍລິສັດຊີໂນ-ອາກຣີໂປຕາສ ຈໍາກັດ ໄດ້ຈັດຂຶ້ນເມື່ອບໍ່ດົນມານີ້, ທ່ານກົວ ປາຍຊຸນ (Guo Baichun) ປະທານບໍລິສັດ ອາຊີໂປຕາສສາກົນ (ບໍລິສັດແມ່) ໄດ້ນຳພາຄະນະບໍລິຫານຂັ້ນສູງຂອງບໍລິສັດເຂົ້າຮ່ວມພິທີເປີດດັ່ງກ່າວ, ພ້ອມທັງໄດ້ມອບເຄື່ອງອຸປະໂພກບໍລິໂພກໃນການດໍາລົງຊີວິດສຸກເສີນ ມີມູນຄ່າ 200 ກວ່າລ້ານກີບ. ຊຶ່ງເປັນສັນຍານໃນການລົງມືຂອງໂຄງການການຜະລິດກະສິກໍາເພື່ອແກ້ໄຂຄວາມທຸກຍາກຢູ່ລາວຂອງບໍລິສັດ, ຊຶ່ງມີຄວາມແຕກຕ່າງຈາກການແກ້ໄຂຄວາມທຸກຍາກແບບດັ້ງເດີມ, ໂຄງການ "ການຜະລິດກະສິກໍາເພື່ອແກ້ໄຂຄວາມທຸກຍາກ" ທີ່ບໍລິສັດປະຕິບັດແມ່ນຈະໄດ້ຮຽນຮູ້ຈາກປະສົບການພາຍໃນປະເທດໃນການແກ້ໄຂຄວາມທຸກຍາກແບບມີເປົ້າໝາຍຊັດເຈນ, ແນະນຳແນວຄວາມຄິດການຜະລິດກະສິກໍາທີ່ທັນສະໄໝ ແລະຮູບແບບການຄຸ້ມຄອງກະສິກຳທີ່ທັນສະໄໝ, ຊ່ວຍໃຫ້ທ້ອງຖິ່ນບັນລຸການຫຼຸດພົ້ນຈາກຄວາມທຸກຍາກ ແລະໄປສູ່ຄວາມຮັ່ງມີໄດ້ຢ່າງແທ້ຈິງໂດຍຜ່ານການຍົກລະດັບການຜະລິດກະສິກຳ ແມ່ນການແກ້ໄຂຄວາມທຸກຍາກແບບຍືນຍົງດ້ວຍການສ້າງຄວາມເຂັ້ມແຂງດ້ວຍຕົນເອງເພິ່ງຕົນເອງນໍາພາຕົນເອງຫຼຸດພົ້ນອອກຈາກຄວາມທຸກຍາກດັ່ງຄໍາສຸພາສິດຈີນທີ່ວ່າ "ສ້າງກະແສເລືອດ, ສອນວິທີຫາປາແຕ່ບໍ່ແມ່ນເອົາປາໃຫ້".
ການພັດທະນາເທື່ອນີ້, ໄດ້ຖືເອົາບ້ານຊຽງແຫວນເປັນຈຸດທົດລອງການຜະລິດກະສິກໍາເພື່ອແກ້ໄຂຄວາມທຸກຍາກ, ຊຶ່ງເປັນການຍົກລະດັບການປະຕິບັດໜ້າທີ່ທາງສັງຄົມຂອງບໍລິສັດຂຶ້ນ ບໍ່ພຽງແຕ່ຈະເປັນການກະຕຸ້ນທ່າແຮງພັດທະນາທີ່ບົ່ມຊ້ອນພາຍໃນຂອງທ້ອງຖິ່ນເທົ່ານັ້ນ, ຍັງເປັນການເພີ່ມທະວີການເຊື່ອມໂຍງເຂົ້າກັນໃຫ້ເລິກເຊິ່ງຕື່ມ ລະຫວ່າງປະຊາຊົນລາວ ແລະປະຊາຊົນຈີນ. ຊຶ່ງຜ່ານບັນດາມາດຕະການແກ້ໄຂຄວາມທຸກຍາກດ້ວຍການຜະລິດກະສິກໍາ, ຍັງສາມາດບໍາລຸງລ້ຽງຕະຫຼາດ ທີ່ມີທ່າແຮງບົ່ມຊ້ອນດ້ານຝຸ່ນເຄມີຢູ່ລາວ ແລະຈະຊ່ວຍບັນລຸການພັດທະນາແບບຕ່າງຝ່າຍຕ່າງມີຜົນປະໂຫຍດ ລະຫວ່າງ ບໍລິສັດ ກັບ ປະຊາຊົນອ້ອມຂ້າງ.
ໂຄງການການຜະລິດກະສິກໍາເພື່ອແກ້ໄຂຄວາມທຸກຍາກຂອງບໍລິສັດໄດ້ຮັບການຕີລາຄາສູງ ແລະສະໜັບສະໜູນຢ່າງແຂງແຮງຈາກລັດຖະບານລາວ. ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ໄດ້ເດີນທາງໄປຢ້ຽມຢາມບ້ານຊຽງແຫວນ ເພື່ອມອບຂໍ້ຕົກລົງ ຂອງອໍານາດການປົກຄອງແຂວງກ່ຽວກັບໂຄງການການຜະລິດກະສິກໍາເພື່ອແກ້ໄຂຄວາມທຸກຍາກຂອງບໍລິສັດ, ພ້ອມທັງໄດ້ຍ້ອງຍໍໂຄງການວ່າຈະເປັນໂຄງການສັນຍາລັກທີ່ສຳຄັນອີກໂຄງການໜຶ່ງໃນການຮ່ວມມືຕົວຈິງ ລະຫວ່າງ ພາກລັດຖະບານ ແລະວິສາຫະກິດ.
ປັດຈຸບັນ, ບໍລິສັດໄດ້ກາຍເປັນຜູ້ຜະລິດຝຸ່ນໂປຕາສທີ່ເຕີບໂຕໄວ ແລະ ໃຫຍ່ທີ່ສຸດໃນອາຊີຕາເວັນອອກສຽງໃຕ້. ຊຶ່ງທັງໝົດນີ້ແມ່ນໄດ້ຮັບການສະໜັບສະໜູນຈາກລັດຖະບານລາວ ແລະ ປະຊາຊົນທ້ອງຖິ່ນ. ໃນນາມ ເປັນວິສາຫະກິດ ຝຸ່ນໂປຕາສ ທີ່ກໍາລັງຢູ່ໃນໄລຍະການພັດທະນາທີ່ມີຄຸນນະພາບສູງ, ພວກເຮົາສໍານຶກໃນພາລະກິດ ແລະ ຄວາມຮັບຜິດຊອບຢ່າງແຮງກ້າ, ມຸ່ງໝັ້ນທີ່ຈະເປັນຜູ້ສະໜອງຝຸ່ນໂປຕາສລະດັບໂລກ, ຮັບປະກັນທີ່ແຂງແຮງຕໍ່ການຜະລິດກະສິກຳໃນອາຊີ ແລະ ໃນໂລກ. ພ້ອມກັນນັ້ນ, ບໍລິສັດຍາມໃດກໍຕັ້ງໜ້າສະແຫວງຫາການພັດທະນາຮ່ວມກັນລະຫວ່າງ ວິສາຫະກິດ, ປະຊາຊົນ ແລະລັດຖະບານ, ຫວັງວ່າຈະຊ່ວຍໃຫ້ປະຊາຊົນໃນທ້ອງຖິ່ນມີໂອກາດໃນການພັດທະນາທີ່ດີຂຶ້ນ.
ໂຄງການຄັ້ງນີ້, ເພື່ອແກ້ໄຂບັນຫາສະບຽງອາຫານຂອງຄອບຄົວທຸກຍາກໃນປັດຈຸບັນ, ບໍລິສັດໄດ້ບໍລິຈາກເຂົ້າໜຽວ, ໝີ່, ປາກະປ໋ອງ, ໄຂ່, ເກືອ ແລະ ວັດຖຸອຸປະກອນການດຳລົງຊີວິດສຸກເສີນອື່ນໆ ເພື່ອຮັບປະກັນຊີວິດການເປັນຢູ່ຂອງປະຊາຊົນຜູ້ທຸກຍາກໂດຍພື້ນຖານ. ໃນຂັ້ນຕອນຕໍ່ໄປ, ບໍລິສັດຈະໃຊ້ມາດຕະການຕ່າງໆເຊັ່ນ: ກໍ່ສ້າງເສັ້ນທາງ, ຂົວ, ປັບປຸງຊົນລະປະທານ, ບໍລິຈາກເຄື່ອງຈັກກະສິກຳ, ຂຸດໜອງລ້ຽງປາ, ການປູກພືດທົດແທນ, ການກໍ່ສ້າງເຮືອນແກ້ວ, ລວມທັງການກໍ່ສ້າງໂຮງງານແປຮູບມັນຕົ້ນ, ໂຮງງານຂ້າສັດແປຮູບ ແລະອື່ນໆ.
(ຂ່າວ: ບໍລິສັດຊີໂນ-ອາກຣີໂປຕາສ ຈໍາກັດ)
| ສະກຸນເງີນ | ອັດຕາຊື້ | ອັດຕາຂາຍ | |
|
EUR | 21.356 | 21.571 |
|
USD | 21.996 | 22.140 |
|
THB | 683 | 690 |
|
CNY | 2.713 | 2.740 |