ຄຳມ່ວນຕັ້ງເປົ້າລາຍຮັບບັນລຸ 707,2 ຕື້ກີບ ປີແລ້ວເກັບໄດ້ລື່ນແຜນ

   ຄຳມ່ວນນັບເປັນອີກແຂວງທີ່ມີຄວາມເອົາໃຈໃສ່ຕໍ່ການຈັດຕັ້ງປະຕິບັດຈັດເກັບລາຍຮັບເຂົ້າງົບປະມານໂດຍໃນປີແລ້ວເກັບໄດ້ລື່ນແຜນ 0,97% ຈາກຕົວເລກຕັ້ງໄວ້ 709,9 ຕື້ກີບ ຂະນະທີ່ໃນປີ 2019 ນີ້ທາງແຂວງວາງແຜນລາຍຮັບໝົດປີໃຫ້ໄດ້ 707,2 ຕື້ກີບ ທຽບໃສ່ປີກ່ອນຫຼຸດລົງ 0,38%.

  ໃນວັນທີ 28 ມີນາຜ່ານມາທີ່ພະແນກການເງິນແຂວງຄຳມ່ວນໄດ້ດຳເນີນກອງປະຊຸມສະຫຼຸບວຽກງານປະຈຳປີ 2018 ຂຶ້ນໂດຍເປັນປະທານຂອງ ທ່ານ ບຸນເລັ່ງ ກຸນອາວົງ ຫົວໜ້າພະແນກການເງິນແຂວງ,ໃຫ້ກຽດເຂົ້າຮ່ວມຂອງ ທ່ານ ບຸນມີ ພິມມະສອນ ຮອງເຈົ້າແຂວງໆຄໍາມ່ວນຜູ້ຊີ້ນຳວຽກງານເສດຖະກິດ, ມີບັນດາທ່ານຮອງເຈົ້າເມືອງຈາກ 10 ຕົວເມືອງ, ຕາງໜ້າພະແນກການທີ່ໄດ້ມອບພັນທະເຂົ້າງົບປະມານ, ຕາງໜ້າບັນດາຫ້ອງການການເງິນເມືອງ ແລະພະ ນັກງານວິຊາການທີ່ກ່ຽວຂ້ອງເຂົ້າຮ່ວມ .

 ທ່ານ ບຸນເລັ່ງ ກຸນອາວົງ ກ່າວວ່າ: ປີ 2018 ແຜນງົບປະມານລາຍຮັບຂອງແຂວງຄໍາມ່ວນທີ່ໄດ້ຮັບມອບໝາຍທັງລາຍຮັບສູນກາງ ແລະລາຍຮັບທ້ອງຖິ່ນມີທັງໝົດຈໍານວນ 709,9 ຕື້ກີບ ໃນນັ້ນລາຍຮັບສູນກາງປະຕິບັດຢູ່ແຂວງ 387,4 ຕື້ກີບ ຊຶ່ງກວມເອົາຄ່າທໍານຽມວີຊາອາກອນ, ລາຍຮັບສູນກາງ (ພາ ສີ) ປະກອບມີດ່ານພາສີສາກົນຂົວມິດຕະພາບ 3, ດ່ານພາສີສາກົນນາເພົ້າ, ກອງກວດກາພາສີເຄື່ອນທີ່, ດ່ານທ້ອງຖິ່ນທ່າແຂກ, ດ່ານປະເພນີສ່ວນລາຍຮັບທ້ອງຖິ່ນ 322,5 ຕື້ກີບ ໃນນັ້ນກວມເອົາວຽກງານສ່ວຍສາອາກອນ, ຄຸ້ມຄອງຊັບສິນ ແລະ ຄຸ້ມຄອງລັດວິສາຫະກິດດ້ານລາຍຈ່າຍ.

 ແນວໃດກໍດີທ່ານຫົວໜ້າພະແນກການເງິນກ່າວຕື່ມວ່າ: ຜ່ານການຈັດຕັ້ງປະຕິບັດຕົວຈິງໝົດປີສາມາດ 716,8 ຕື້ກີບ ເທົ່າກັບ 100,97% ຂອງແຜນ ການປີຖ້າທຽບໃສ່ປີກ່ອນແມ່ນເພີ່ມຂຶ້ນ 11,60% ໃນນັ້ນລາຍຮັບສູນກາງ (ພາສີ) ປະຕິບັດໄດ້ 377,4 ຕື້ກີບ ອັນທີ່ພົ້ນເດັ່ນແມ່ນລາຍຮັບຈາກກອງກວ ດກາສາມາດປະຕິບັດໄດ້ 19,2 ຕື້ກີບ ຊຶ່ງລາຍຮັບດັ່ງກ່າວໄດ້ມາຈາກການແກ້ໄຂຄະດີພາຫະນະລົດລັກລອບນຳເຂົ້າໜີພາສີ,ລາຍຮັບທ້ອງຖິ່ນ 333,06 ຕື້ກີບ ເທົ່າກັບ 103,27% ຂອງແຜນການປີຖ້າທຽບໃສ່ໄລຍະດຽວຂອງປີກ່ອນແມ່ນເພີ່ມຂຶ້ນ 29,82%.

  ດ້ານການຄຸ້ມຄອງລາຍຈ່າຍງົບປະມານປະຈໍາປີ 2018 ປະຕິບັດໄດ້ 550.474 ລ້ານກີບ ເທົ່າກັບ 97,21% ຂອງແຜນການປີທີ່ວາງໄວ້ 550,4 ຕື້ກີບ , ການເບີກຈ່າຍໄປຕາມແຜນການທີ່ສະພາອະນຸມັດຮັບຮອງຫຼີກເວັ້ນການຈ່າຍບໍ່ຖືກເປົ້າໝາຍຕາມການອະນຸມັດ, ໄດ້ຈັດລຽງບຸລິມະສິດໃນການເບີກຈ່າຍ ໂດຍຖືເອົາການເບີກຈ່າຍເງິນເດືອນ ແລະເງິນນະໂຍບາຍເປັນບຸລິມະສິດໜຶ່ງ, ການເບີກຈ່າຍເງິນເດືອນ, ເງິນອຸດໜູນຕ່າງໆ ແລະເງິນບໍລິຫານອື່ນໆແມ່ນໄດ້ປະຕິບັດສໍາເລັດທຸກຮ່ວງລາຍຈ່າຍ, ບໍ່ມີຄ້າງຈ່າຍຕາມການອະນຸມັດຂອງງົບປະມານ.

  ສ່ວນປີ 2019 ແຜນງົບປະມານລາຍຮັບຂອງແຂວງຄໍາມ່ວນທີ່ໄດ້ຮັບມອບໝາຍທັງລາຍຮັບສູນກາງ ແລະ ລາຍຮັບທ້ອງຖິ່ນມີທັງໝົດຈໍານວນ 707,2 ຕື້ກີບທຽບໃສ່ປີ 2018 ຫຼຸດລົງ 0,38% ໃນນັ້ນລາຍຮັບສູນກາງປະຕິບັດຢູ່ແຂວງ 398,6 ຕື້ກີບ ຊຶ່ງກວມເອົາຄ່າທໍານຽມວີຊາອາກອນ 900 ລ້ານກີບ ແລະລາຍຮັບສູນກາງ (ພາສີ ) 397,7 ຕື້ກີບ ສັງລວມແລ້ວລາຍຮັບ 397,7 ຕື້ກີບ ຈາກພາສີທົ່ວແຂວງໄດ້ມາຈາກຄ່າຊັກພິເສດສົ່ງອອກ, ພາສີຂາເຂົ້າ, ສິນຄ້ານໍາເຂົ້າເພື່ອສົ່ງອອກຮ້ານປອດພາສີ , ຄ່າປັບໃໝ+ຂາຍເຄື່ອງຍືດ, ຄ່າທໍານຽມຕ່າງໆ.

  ດ້ານລາຍຮັບທ້ອງຖິ່ນ 308,6 ຕື້ກີບ ທຽບໃສ່ປີ 2018 ແມ່ນຫຼຸດລົງ 4,30 % ໃນນັ້ນສ່ວຍສາອາກອນ 287,4 ຕື້ກີບ, ຄຸ້ມຄອງຊັບສິນ 20,9 ຕື້ກີບ ແລະ ຄຸ້ມຄອງວິສາຫະກິດລັດລົງທຶນ ແລະ ປະກັນໄພ .

  ດ້ານລາຍຈ່າຍແຜນການລາຍຈ່າຍງົບປະມານປີ 2019 ມີ 571,5 ຕື້ກີບ ທຽບໃສ່ປີ 2018 ແມ່ນເພີ່ມຂຶ້ນ 1,43 %, ດຸ່ນດ່ຽງງົບປະມານລາຍຮັບຂອງແຂວງ 308,6 ຕື້ກີບ, ລາຍຈ່າຍຂອງແຂວງ 571,5 ຕື້ກີບ, ຂາດດຸ່ນ 262,8 ຕື້ກີບ.  

ຂ່າວ: ແດງສະຫວັດ

แชร์