ພິທີເຊັນສັນຍາໂຄງການກໍ່ສ້າງທາງປູຢາງ 2 ຊັ້ນ ເທດສະບານເມືອງລ້ອງຊານ

ພິທີເຊັນສັນຍາໂຄງການກໍ່ສ້າງທາງປູຢາງ 2 ຊັ້ນ ບ້ານຄອນວັດ ເທດສະບານເມືອງລ້ອງຊານ ແລະໂຄງການກໍ່ສ້າງເສັ້ນທາງປູແຮ່ ແລະປູຢາງ 2 ຊັ້ນທາງເລກທີ 9333 ແຕ່ ບ້ານຮົ່ມທາດ ຫາ ບ້ານຫ້ວຍຊາຍ ເມືອງຮົ່ມ ແຂວງໄຊສົມບູນ ລະຫວ່າງພະແນກ ໂຍທາທິການ ແລະ ຂົນສົ່ງ ແຂວງໄຊສົມບູນ ກັບ ບໍລິສັດຜູ້ຮັບເໝົາກໍ່ສ້າງບໍລິສັດ ດວງປະເສີດ ກໍ່ສ້າງເຄຫາ-ຂົວທາງ ແລະ ຊົນລະປະທານ ຈຳກັດຜູ້ດຽວ, ບໍລິສັດຜູ້ຮັບເໝົາກໍ່ສ້າງ ບໍລິສັດ ໄຊສົມບູນ ຂຸດຄົ້ນບໍ່ແຮ່ ຈຳກັດຜູ້ດຽວ ແລະ ບໍລິສັດທີ່ປຶກສາ ບໍລິສັດ ພໍໃຈ ອິນຈີເນຍລິງ ຈຳກັດຜູ້ດຽວ ໄດ້ຈັດຂຶ້ນໃນຕອນບ່າຍ ຂອງວັນທີ 24 ຕຸລາ 2022 ນີ້ ຢູ່ທີ່ຫ້ອງປະຊຸມຫ້ອງວ່າການ ແຂວງ ໂດຍການເຂົ້າຮ່ວມຂອງ ທ່ານ ສຸກສະຫວາດ ວົງພູມເຫຼັກ, ຮອງເຈົ້າແຂວງ, ຜູ້ຊີ້ນຳວຽກງານຂົງເຂດເສດຖະກິດ ແລະທ່ານ ຕົ່ງມົວ ຊົວໂກ້, ຮອງເຈົ້າແຂວງ, ຜູ້ຊີ້ນຳວຽກງານວັດທະນະທຳສັງຄົມ ມີບັນດາກຳມະການພັກແຂວງ, ຫົວໜ້າ, ຮອງຫົວໜ້າພະແນກການທີກ່ຽວຂ້ອງ ແລະ ຝ່າຍບໍລິສັດຜູ້ຮັບເໝົາກໍ່ສ້າງ, ບໍລິສັດທີປຶກສາ ແລະ ແຂກຖືກເຊີນເຂົ້າຮ່ວມ.

ໃນພິທີ ທ່ານ ເພັດສະຫວັດ ພັນສະດາ ຫົວໜ້າຂະແໜງຂົວທາງພະແນກໂຍກາທິການ ແລະຂົນສົ່ງແຂວງໄດ້ລາຍງານກ່ຽວກັບໂຄງການກໍ່ສ້າງເສັ້ນທາງປູຢາງ 2 ຊັ້ນ ບ້ານຄອນວັດເທດສະບານເມືອງລ້ອງຊານເສັ້ນທາງນໍ້າເບີ C3, C4, C5, C6, C21, C23, C24 ແລະ C25, ລວມຄວາມຍາວທັງໝົດ ເກືອບ 4 ກິໂລແມັດ ເຊິ່ງເສັ້ນທາງດັ່ງກ່າວນີ້ ແມ່ນເປັນເສັ້ນທາງຈຳນວນໜຶ່ງ ທີ່ນອນຢູ່ໃນລະບົບຜັງເມືອງຂອງເມືອງ ລ້ອງຊານ, ເປັນເສັ້ນທາງເທດສະບານຂອງເມືອງ, ຊິ່ງມີທັງໝົດ 25 ເສັ້ນທາງ, ໃນນັ້ນໄດ້ກໍ່ສ້າງສຳເລັດໄປແລ້ວ 3 ເສັ້ນທາງ (C1 C2 ແລະ C22), ບັນດາເສັ້ນທາງດັ່ງ ເປັນສ່ວນສຳຄັນໃນການຄົມມະນາຄົມ-ຂົນສົ່ງ, ເປັນເສັ້ນທາງທີ່ມີບົດບາດຄວາມສຳຄັນ ແລະ ເປັນປາຍແຫຼມຕໍ່ການພັດທະນາເສດຖະກິດ-ສັງຄົມ ຂອງເມືອງລ້ອງຊານ ເຊິ່ງມີຄວາມຍາວທັງໝົດເກືອບ 4 ກິໂລແມັດ, ໜ້າທາງກວ້າງ 7 ແມັດ, ໜ້າທາງປູດ້ວຍຢາງ 2 ຊັ້ນ, ຄວາມເນີນຂວາງຂອງໜ້າທາງ 3%, ທໍ່ກົມລະບາຍນໍ້າລອດທາງ ແມ່ນນໍາໃຊ້ເປັນແບບເບຕົງເສີມເຫຼັກ, ມີຮ່ອງລະບາຍນໍ້າ ເຮັດດ້ວຍເບຕົງເສີມເຫຼັກ ໜາ 7 ຊັງຕີແມັດ, ຢູ່ 2 ຟາກທາງ ລວມມູນຄ່າການກໍ່ສ້າງທັງໝົດ 11 ຕື້ກວ່າກີບ ແລະ ມູນຄ່າວ່າຈ້າງວິສະວະກອນທີ່ປຶກສາ 493 ລ້ານກີບ ແລະ ໂຄງການກໍ່ສ້າງເສັ້ນທາງປູແຮ່ ແລະ ປູຢາງ 2 ຊັ້ນ ທາງເລກທີ 9333 ແຕ່ ບ້ານຮົ່ມທາດ ຫາ ບ້ານຫ້ວຍຊາຍ ເມືອງຮົ່ມ, ຄວາມຍາວ 19 ກວ່າກິໂລແມັດ ເນື່ອງຈາກເປັນເສັ້ນທາງເທດສະບານ ຂອງເມືອງ ຈະຊ່ວຍອຳນວຍຄວາມສະດວກ ໃຫ້ການຄົມມະນາຄົມ-ຂົນສົ່ງ ແລະ ໄປມາຫາສູ ພາຍໃນເມືອງນັບມື້ນັບດີຂຶ້ນ ແລະ ເປັນການພັດທະນາ ລະບົບເສດຖະກິດ ແລະ ສັງຄົມ ພາຍໃນເມືອງ ໃຫ້ມີການພັດທະນາຢ່າງບໍ່ຢຸດຢັ້ງ ລວມທັງ ເປັນເສັ້ນທາງເຊື່ອມຕໍ່ ເຊື່ອມຈອດ ຈາກ ແຂວງໄຊສົມບູນ ໄປຫາ ແຂວງບໍລິຄຳໄຊ ໂດຍຜ່ານອ່າງເກັບນໍ້າເຂື່ອນນໍ້າງຽບ ຄວາມຍາວ 19 ກວ່າກິໂລແມັດ, ໜ້າທາງກວ້າງ 6 ແມັດ, ໜ້າທາງປູແຮ່ ຍາວ 11 ກວ່າກິໂລແມັດ, ມີໂຄງສ້າງຊັ້ນທາງດັ່ງນີ້ ທາງປູຢາງ 2 ຊັ້ນ ຍາວ 8 ກວ່າກິໂລແມັດ ເນີນຂວາງຂອງໜ້າທາງ 3%, ມີຮອງລະບາຍນໍ້າ ເຮັດດ້ວຍເບຕົງເສີມເຫຼັກ ໜາ 7 ຊັງຕີແມັດ, ຢູ່ 2 ຟາກທາງ, ມີມູນຄ່າການກໍ່ສ້າງທັງໝົດ 12 ຕື້ກວ່າກີບ.

ຈາກນັ້ນ ໄດ້ມີພິທີເຊັນສັນຍາຮ່ວມກັນ ລະຫວ່າງ ພະແນກໂຍທາທິການ ແລະຂົນສົ່ງແຂວງ, ໃນນາມຕາງໜ້າອົງການຄຸ້ມຄອງ-ຈັດຕັ້ງປະຕິບັດໂຄງການຊຶ່ງຕາງໜ້າເຊັນໂດຍທ່ານ ໄຊສົມພັນ ລີເຕັງເບຼ່ຍຈື, ຫົວໜ້າພະແນກໂຍທາທິການ ແລະຂົນສົ່ງແຂວງ ແລະຝ່າຍບໍລິສັດ ດວງປະເສີດ ກໍ່ສ້າງເຄຫາ-ຂົວທາງ ແລະຊົນລະປະທານ ຈຳກັດຜູ້ດຽວ ເຊັນໂດຍທ່ານ ຂັນທອງ ດວງປະເສີດ ປະທານບໍລິສັດ ດວງປະເສີດ ກໍ່ສ້າງເຄຫາ-ຂົວທາງ ແລະຊົນລະປະທານ ຈຳກັດຜູ້ດຽວ ໃນນາມບໍລິສັດຜູ້ຮັບເໝົາກໍ່ສ້າງ, ຝ່າຍບໍລິສັດໄຊສົມບູນ ຂຸດຄົ້ນແຮ່ ຈຳກັດຜູ້ດຽວ ເຊັນໂດຍທ່ານ ຄຳຮູ້ ສຸລິວົງ ຜູ້ຕາງໜ້າບໍລິສັດ ໄຊສົມບູນ ຂຸດຄົ້ນແຮ່ ຈຳກັດຜູ້ດຽວ ໃນນາມບໍລິສັດຜູ້ຮັບເໝົາກໍ່ສ້າງ, ຝ່າຍບໍລິສັດພໍໃຈ ອິນຈິເນຍລີງ ຈຳກັດຜູ້ດຽວ ເຊັນໂດຍ ທ່ານ ຄຳພໍໃຈ ບຸດທະລາດ ປະທານ ບໍລິສັດ ພໍໃຈ ອິນຈິເນຍລີງ ຈຳກັດຜູ້ດຽວ, ໃນນາມບໍລິສັດທີ່ປຶກສາ ໂດຍຊ່ອງໜ້າທ່ານ ສຸກສະຫວາດ ວົງພູມເຫຼັກ, ຮອງເຈົ້າແຂວງ, ຜູ້ຊີ້ນຳວຽກງານຂົງເຂດເສດຖະກິດ, ທ່ານ ຕົ່ງມົວ ຊົວໂກ້, ຮອງເຈົ້າແຂວງ,ຜູ້ຊີ້ນຳວຽກງານວັດທະນະທຳສັງຄົມ ແລະບັນດາທ່ານຄະນະປະຈຳພັກແຂວງ, ຫົວໜ້າ, ຮອງຫົວໜ້າພະແນກ, ເຈົ້າເມືອງ ແລະຝ່າຍບໍລິສັດ ເຂົ້າຮ່ວມເປັນສັກຂີພະຍານ.
Media Laos

แชร์