ປະທານປະເທດ ແຫ່ງ ສປປ ລາວ ຢ້ຽມຢາມລັດຖະກິດທີ່ ບຣູໄນ ດາຣູຊາລາມ

ໂດຍຕອບ​ສະ​ໜອງ​ຕາມ​ຄຳເຊື້ອ​ເຊີນ​ຂອງ ສົມເດັດ ຊຸນຕານ ຮາຈິ ຮັດຊານານ ໂບນເກຍ ແຫ່ງ ບຣູໄນ ດາຣູຊາລາມ, ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ຂອງ ສປປ ລາວ ໄດ້ເດີນທາງຢ້ຽມຢາມລັດຖະກິດ ທີ່ ບຣູໄນ ດາຣູຊາລາມ ໃນວັນທີ 24-26 ຕຸລາ 2022, ເພື່ອເພີ່ມທະວີ ແລະ ຮັດແໜ້ນສາຍພົວພັນມິດຕະພາບອັນເປັນມູນເຊື້ອທີ່ດີງາມ ແລະການຮ່ວມມືທີ່ດີລະຫວ່າງ ສປປ ລາວ ແລະບຣູໄນ ດາຣູຊາລາມ ໃຫ້ໄດ້ຮັບການເພີ່ມພູນຄູນສ້າງ ແລະແໜ້ນແຟ້ນຍິ່ງໆຂຶ້ນ.

ພິທີຕ້ອນຮັບພະນະທ່ານປະທານປະເທດພ້ອມດ້ວຍພັນລະຍາ ແລະຄະນະຜູ້ແທນຂັ້ນສູງ ແຫ່ງ ສປປ ລາວ ຢ່າງເປັນທາງການໄດ້ຈັດຂຶ້ນຢ່າງສົມກຽດໃນຕອນເຊົ້າຂອງວັນທີ 25 ຕຸລາ 2022, ທີ່ ພະລາດຊະວັງ Istana Nurul Iman, ໂດຍການໃຫ້ກຽດຕ້ອນຮັບອັນອົບອຸ່ນຈາກ ສົມເດັດ ຊຸນຕານ ຮາຈິ ຮັດຊານານ ໂບນເກຍ ແຫ່ງ ບຣູໄນ ດາຣູຊາລາມ, ພ້ອມດ້ວຍພະຣາຊິນີ, ພະບໍລົມ ວົງສານຸວົງ ແລະຄະນະຜູ້ແທນຂັ້ນສູງ ແຫ່ງ ບຣູໄນ ດາຣູຊາລາມ. ຈາກນັ້ນກໍໄດ້ມີການພົບປະສອງຝ່າຍ, ເຊິ່ງ ສົມເດັດ ຊຸນຕານ ຮາຈິ ຮັດຊານານ ໂບນເກຍ ໄດ້ສະແດງຄວາມຍິນດີຕ້ອນຮັບ ແລະຕີລາຄາສູງຕໍ່ ພະນະທ່ານ ປະທານປະເທດ ທອງລຸນ ສີສຸລິດ ທີ່ໄດ້ນໍາພາຄະນະຜູ້ແທນຂັ້ນສູງຂອງ ສປປ ລາວ ຢ້ຽມຢາມ ບຣູໄນ ໃນຄັ້ງນີ້. ໃນໂອກາດດັ່ງກ່າວ, ພະນະທ່ານ ປະທານປະເທດ ທອງລຸນ ສີສຸລິດ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນພ້ອມທັງໄດ້ສະແດງຄວາມຫວັງວ່າ ການຢ້ຽມຢາມ ບຣູໄນ ໃນຄັ້ງນີ້ຈະເປັນຂີດໝາຍອັນສໍາຄັນໃນການເພີ່ມທະວີ ​ແລະຮັດ​ແໜ້ນສາຍພົວພັນມິດຕະພາບ ແລະການຮ່ວມມືອັນ​ດີງາມ ລະຫວ່າງ ລາວ-ບຣູໄນ, ທັງຍັງເປັນການຢືນຢັນຄືນເຖິງຄວາມມຸ່ງໝັ້ນຂອງປະຊາຊົນລາວໃນການສົ່ງເສີມສາຍພົວພັນມິດຕະພາບ ແລະການຮ່ວມມືທີ່ດີລະຫວ່າງສອງປະເທດໃຫ້ໄດ້ຮັບການພັດທະນາຂຶ້ນເທື່ອລະກ້າວ.

ສອງຝ່າຍ ໄດ້ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມືທີ່ດີຂອງສອງປະເທດທີ່ໄດ້ຮັບການພັດທະນາ ແລະຂະຫຍາຍຕົວດີຂຶ້ນເລື້ອຍໆໃນຫຼາຍຂົງເຂດ, ເປັນຕົ້ນແມ່ນທາງດ້ານການເມືອງ, ການພັດທະນາຊັບພະຍາກອນມະນຸດ, ເສດຖະກິດ ແລະ ວັດທະນະທໍາ-ສັງຄົມ. ພ້ອມກັນນັ້ນ, ສອງຝ່າຍ ຍັງໄດ້ປຶກສາຫາລືທິດທາງແຜນການຮ່ວມມືຕໍ່ໜ້າໃນດ້ານຕ່າງໆ ເພື່ອສືບຕໍ່ສົ່ງເສີມສາຍພົວພັນມິດຕະພາບອັນເປັນມູນເຊື້ອທີ່ດີງາມ ແລະ ການຮ່ວມມືທີ່ດີ ລະຫວ່າງສອງປະເທດໃຫ້ໄດ້ຮັບການເສີມຂະຫຍາຍກວ້າງຂວາງຍິ່ງໆຂຶ້ນ, ພິເສດໃນປີ 2023 ທີ່ຈະມາເຖິງນີ້ ສອງຝ່າຍຈະຮ່ວມກັນຈັດບັນດາກິດຈະກໍາຕ່າງໆ ເພື່ອສະເຫຼີມສະຫຼອງເນື່ອງໃນໂອກາດຄົບຮອບ 30 ປີ ແຫ່ງການສ້າງຕັ້ງສາຍພົວພັນການທູດ ລາວ-ບຣູໄນ (27 ກໍລະກົດ 1993 – 27 ກໍລະກົດ 2023) ໃຫ້ເປັນຂະບວນຟົດຟື້ນ ແລະມີເນື້ອໃນຄວາມໝາຍຄວາມສໍາຄັນ, ເຊິ່ງພະນະທ່ານປະທານປະເທດ ທອງລຸນ ສີສຸລິດ ກໍ່ໄດ້ເຊື້ອເຊີນ ສົມເດັດ ຊຸນຕານ ຮາຈິ ຮັດຊານານ ໂບນເກຍ ເດີນທາງມາຢ້ຽມຢາມ ສປປ ລາວ ໃນໂອກາດດັ່ງກ່າວ.

ສອງຝ່າຍໄດ້ສະແດງຄວາມຊົມເຊີຍຕໍ່ສະພາການຄ້າ ແລະອຸດສາຫາກໍາ ແຫ່ງຊາດລາວ ແລະສະພາການຄ້າ ແລະອຸດສາຫະກໍາ ແຫ່ງ ບຣູໄນ ດາຣູຊາລາມ ທີ່ໄດ້ຮ່ວມກັນຈັດກອງປະຊຸມພົບປະທຸລະກິດຂຶ້ນ ໃນໂອກາດຢ້ຽມຢາມຄັ້ງນີ້ ເພື່ອເປັນການເປີດໂອກາດໃຫ້ມີການປຶກສາຫາລືຮ່ວມກັນ ໃນການຮ່ວມມື ແລະ ຈັບຄູ່ທຸລະກິດທີ່ທັງສອງຝ່າຍມີຄວາມສົນໃຈ ແລະ ມີທ່າແຮງ ໂດຍສະເພາະແມ່ນສຸມໃສ່ການຊຸກຍູ້ການຄ້າ ແລະ ການລົງທຶນ ລະຫວ່າງສອງປະເທດ ໃຫ້ຂະຫຍາຍຕົວ ແລະມີປະສິດທິຜົນດີຍິ່ງໆຂຶ້ນ, ເຊິ່ງ ພະນະທ່ານ ປະທານປະເທດ ທອງລຸນ ສີສຸລິດ ໄດ້ສະເໜີຕໍ່  ສົມເດັດ ຊຸນຕານ ຮາຈິ ຮັດຊານານ ໂບນເກຍ ແລະ ເຊີນຊວນນັກທຸລະກິດ ບຣູໄນ ເຂົ້າມາລົງທຶນໃນຂະແໜງການຕ່າງໆທີ່ ສປປ ລາວ ມີທ່າແຮງ ໂດຍສະເພາະ ດ້ານກະສິກໍາ, ພະລັງງານ ແລະ ທ່ອງທ່ຽວ ຫຼື ຂະແໜງການອື່ນທີ່ຝ່າຍບຣູໄນມີຄວາມສົນໃຈ. ນອກຈາກນັ້ນ, ສອງຝ່າຍຍັງໄດ້ແຈ້ງໃຫ້ກັນຊາບໂດຍຫຍໍ້ກ່ຽວກັບສະພາບການພາຍໃນປະເທດຂອງຕົນ, ພ້ອມທັງໄດ້ປຶກສາຫາລື ແລະແລກປ່ຽນຄໍາຄິດເຫັນ ກ່ຽວກັບ ສະພາບການພົ້ນເດັ່ນໃນພາກພື້ນ ແລະສາກົນ ທີ່ມີຄວາມສົນໃຈຮ່ວມກັນ.

ພ້ອມດຽວກັນນີ້, ພະນະທ່ານປະທານປະເທດ ທອງລຸນ ສີສຸລິດ ຍັງໄດ້ແຈ້ງໃຫ້ຊາບຕື່ມວ່າ ສປປ ລາວ ກຽມພ້ອມທີ່ຈະຮ່ວມມືກັບ ບຣູໄນ ແລະ ປະເທດສະມາຊິກອາຊຽນອື່ນໆ ເພື່ອສືບຕໍ່ຮັດແໜ້ນປະຊາຄົມອາຊຽນ ໃຫ້ເຂັ້ມແຂງ ໂດຍສະເພາະການເປັນປະທານອາຊຽນ ໃນປີ 2024 ຂອງ ສປປ ລາວ, ແລະ ເຫັນວ່າ ຂໍ້ລິເລີ່ມ ສ້າງຕັ້ງສູນອາຊຽນ ວ່າດ້ວຍ ການປ່ຽນແປງດິນຟ້າອາກາດ (ASEAN Center for Climate Change) ຢູ່ ບຣູໄນ ດາຣູຊາລາມ ຈະມີບົດບາດສໍາຄັນໃນຖານະເປັນແຫຼ່ງຂໍ້ມູນ ແລະ ເປັນບ່ອນແລກປ່ຽນບົດຮຽນທີ່ດີລະຫວ່າງປະເທດສະມາຊິກອາຊຽນ ແລະຄູ່ຮ່ວມມືຕ່າງໆ ເພື່ອສົ່ງເສີມຄວາມເຂັ້ມແຂງໃຫ້ແກ່ປະເທດສະມາຊິກ ກໍຄືພາກພື້ນ ໃນການຮັບມືກັບການປ່ຽນແປງຂອງສະພາບດິນຟ້າອາກາດ ແລະ ໄພພິບັດທາງທໍາມາຊາດໃນຕໍ່ໜ້າ, ພ້ອມກັນນີ້ກໍ່ໄດ້ສະແດງຄວາມຂອບໃຈຕໍ່ ບຣູໄນ ທີ່ໄດ້ໃຫ້ການຮ່ວມມື ແລະຊ່ວຍເຫຼືອ ສປປ ລາວ ໃນຂອບວຽກອາຊຽນໃນໄລຍະຜ່ານມາ.

ພາຍຫຼັງສໍາເລັດການພົບປະສອງຝ່າຍ, ພະນະທ່ານ ປະທານປະເທດ ທອງລຸນ ສີສຸລິດ ແລະ ສົມເດັດ ຊຸນຕານ ຮາຈິ ຮັດຊານານ ໂບນເກຍ ໄດ້ເຂົ້າຮ່ວມເປັນສັກຂີພິຍານການລົງນາມບົດບັນທຶກຄວາມເຂົ້າໃຈ 2 ສະບັບ ຄື: 1) ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານກະສິກໍາ ລະຫວ່າງ ກະຊວງກະສິກໍາ ແລະ ປ່າໄມ້ ຂອງ ສປປ ລາວ ແລະກະຊວງຊັບພະຍາກອນ ແລະ ການທ່ອງທ່ຽວ ຂອງບຣູໄນ; ແລະ 2) ບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານພະລັງງານລະຫວ່າງກະຊວງພະລັງງານ ແລະ ບໍ່ແຮ່ ຂອງ ສປປ ລາວ ແລະກົມພະລັງງານ, ຫ້ອງວ່າການສໍານັກງານນາຍົກລັດຖະມົນຕີ ຂອງບຣູໄນ.

ການພົບປະສອງຝ່າຍໃນຄັ້ງນີ້ໄດ້ດໍາເນີນໄປດ້ວຍບັນຍາກາດອັນສະໜິດສະໜົມ, ອົບອຸ່ນ ແລະໄດ້ຮັບຜົນສໍາເລັດຢ່າງຈົບງາມ.

ໃນວັນດຽວກັນ, ພະນະທ່ານ ປະທານປະເທດ ທອງລຸນ ສີສຸລິດ ພ້ອມດ້ວຍຄະນະຍັງໄດ້ໄປຢ້ຽມຊົມບ່ອນຂຸດເຈາະນໍ້າມັນ ແລະອາຍແກັດ ຂອງ ບຣູໄນ (Brunei Shell Petroleum and Brunei Liquefied Natural Gas) ຕື່ມອີກ, ເຊິ່ງເປັນກຽດຕ້ອນຮັບໂດຍ ທ່ານ Dato Dr Amin Abdullah, ລັດຖະມົນປະຈໍາ ສໍານັກງານນາຍົກລັດຖະມົນຕີ ແລະລັດຖະມົນຕີກະຊວງການເງິນ-ເສດຖະກິດ II.

ໃນຕອນຄໍ່າຂອງວັນດຽວກັນ, ໄດ້ມີງານລ້ຽງຮັບຮອງເປັນກຽດຈັດໂດຍສົມເດັດ ຊຸນຕານ ຮາຈິ ຮັດຊານານ ໂບນເກຍ ພ້ອມດ້ວຍພະຣາຊິນີ ເພື່ອເປັນກຽດໃຫ້ແກ່ພະນະທ່ານ ປະທານປະເທດ ທອງລຸນ ສີສຸລິດ ພ້ອມດ້ວຍພັນລະຍາ ແລະຄະນະຜູ້ແທນຂັ້ນສູງຂອງ ສປປ ລາວ.

ເນື້ອໃນຂ່າວໂດຍ: ກົມການຂ່າວ, ກະຊວງການຕ່າງປະເທດ

ຮູບພາບໂດຍ: ສໍານັກຂ່າວສານປະເທດລາວ

แชร์