ນັກເຕະບານເຍົາວະຊົນລາວ U8 ປີ ແລະ U10 ປີ ທີ່ຄວ້າອັນດັບ 1 ແລະອັນດັບ 3 ເຕະບານ 7 ຄົນ ລາຍການແຊ້ມຊົນແຊ້ມທີ່ປະເທດໄທເດີນທາງເຖິງ ສປປ ລາວ

ຄະນະນັກນັກກິລາເຕະບານເຍົາວະຊົນລາວ ຮຸ່ນອາຍຸບໍ່ເກີນ 8 ປີ (U8) ໃນນາມທີມມາຊດ້າ ຈີບີ ເອັຟຊີ (Mazda GB FC) ແລະ U10 ປີ ໃນນາມທີມ WIG NAGA ທີ່ສາມາດຄວ້າອັນດັບ 1 ແລະ ອັນດັບ 3 ເຕະບານເຍົາວະຊົນ 7 ຄົນ ລາຍການ SAT FOOTBALL THAILAND CHAMPIONSHIP 2022 ຫລື ແຊ້ມຊົນແຊ້ມ ທີ່ແຂວງຊຽງຣາຍປະເທດໄທ ໃນວັນທີ 22-23 ຕຸລາ 2022 ໄດ້ເດີນທາງເຖິງປິຕິພູມ ສປປ ລາວ ໃນຕອນແລງວັນທີ 24 ຕຸລາຜ່ານມາ ເຊິ່ງໄດ້ຮັບການຕ້ອນຮັບຢ່າງອົບອຸ່ນໂດຍທ່ານ ກົງສະດາ ແກ້ວມະນິວົງ ປະທານກິດຕິມະສັກ ສະໂມສອນ ລາວ ມາຊດ້າ ຈີບີ ເອັຟຊີ ພ້ອມດ້ວຍພໍ່ແມ່ພີ່ນ້ອງຜູ້ປົກຄອງນັກກິລາ ແລະ ແຟນບານ ດ້ວຍບັນຍາກາດແຫ່ງຄວາມພາກພູມໃຈ ແລະປຶ້ມປິຕິຍິນດີກັບຫລານນ້ອຍນັກກິລາທີ່ສ້າງຜົນງານໄດ້ຢ່າງປະທັບໃຈ.

ການແຂ່ງຂັນເທື່ອນີ້ ມີ 48 ພາກສ່ວນເຂົ້າຮ່ວມຊຶ່ງເປັນບັນດາສະໂມສອນທີ່ສາມາດຄອງແຊ້ມລາຍການຕ່າງໆໃນທົ່ວປະເທດໄທ ແລະຈາກ ສປປ ລາວ 2 ທີມຄື: Mazda GB FC ແຊ້ມ LaLiga Youth Tournament 2022 ທີ່ເກາະເປນັງ ປະເທດມາເລເຊຍ ໃນທ້າຍເດືອນກໍລະກົດປີນີ້ ແລະ ທີມ WIG NAGA ເຊິ່ງທີມ WIG NAGA ສົ່ງເຂົ້າຮ່ວມ 3 ຮຸ່ນອາຍຸຄື: 9 ປີ, 10 ປີ ແລະ 11 ປີ, ຂະນະທີ່ Mazda GB FC ສົ່ງເຂົ້າຮ່ວມ 2 ຮຸ່ນຄື: ອາຍຸບໍ່ເກີນ 8 ປີ ແລະ 13 ປີ.

ຜ່ານການແຂ່ງຂັນຂຸນພົນນັກເຕະໝາກເຜັດຂີ້ໝູລາວ ຂອງສະໂມສອນ Mazda GB FC ຮຸ່ນອາຍຸບໍ່ເກີນ 8 ປີ ສ້າງຜົນງານໄດ້ຢ່າງໂດດເດັ່ນລົງສະໜາມ 3 ນັດໃນຮອບຄັດເລືອກ ຊະນະ 2 ແລະ ສະເໝີ 1 ຜ່ານເຂົ້າຮອບ 4 ທີມສຸດທ້າຍ ໃນຖານະທີໜຶ່ງຂອງກຸ່ມ, ເຊິ່ງຮອບ 4 ທີມ ເອົາຊະນະ ເຈົ້າພາບ ຊຽງຣາຍ 7-2 ແລະ ຮອບຊີງຊະນະເລີດ ດວນຈຸດໂທດເອົາຊະນະ ສະຫວັດບໍວອນ ອະຄາເດມີ້ ຈາກສົງຂາ 4-3 ຫລັງເວລາປົກກະຕິສະເໝີກັນ 2-2 ຄວ້າແຊັມໄປຄອງຮັບຂັນລາງວັນ, ຫລຽນລາງວັນ ແລະ ເງິນລາງວັນ 20.000 ບາດ ພ້ອມທັງກວາດສອງລາງວັນຄື: ລາງວັນຄູຝຶກດີເດັ່ນທ່ານ ບຸນມາ ປະຖຳມະວົງ ແລະອານຸສັກ ວິໄລກຸນ ໄດ້ລາງວັນນັກເຕະດີເດັ່ນ (MVP) ຈາກຜົນງານຍິງ 11 ປະຕູ.​ ສ່ວນຮຸ່ນອາຍຸບໍ່ເກີນ 13 ປີ ຂອງ Mazda GB FC ແມ່ນບໍ່ຜ່ານຮອບຄັດເລືອກ.

ຂະນະທີ່ WIG NAGA ອີກໜຶ່ງທີມຈາກລາວທີ່ສົ່ງເຂົ້າຮ່ວມລາຍການໃນຕ່າງປະເທດເປັນຄັ້ງທໍາອິດຜົນງານຂອງຮຸ່ນອາຍຸບໍ່ເກີນ 10 ປີ ສາມາດຍາດໄດ້ອັນດັບທີ 3 ເຊິ່ງຜົນງານ 3 ນັດໃນຮອບຄັດເລືອກຊະນະລວດ, ຮອບ 4 ທີມ ເສຍໃຫ້ ບາງກອກ ທົນບູຣີ 0-1 ແລະ ຊີງອັນດັບ 3 ຊະນະ ເບຊິກ 1-0 ຄວ້າອັນດັບ 3 ມາຄອງ ຮັບຂັນລາງວັນ, ຫລຽນລາງວັນ ແລະເງິນລາງວັນ 5.000 ບາດ, ສ່ວນ ອີກ 2 ຮຸ່ນອາຍຸຂອງ WIG NAGA ຄື: 9 ປີ ແລະ 11 ປີ ແມ່ນບໍ່ຜ່ານຮອບຄັດເລືອກ.

ໂອກາດດັ່ງກ່າວ ທ່ານ ທິບພະເນດ ແກ້ວມະນິວົງ ປະທານສະໂມສອນລາວ ມາຊດ້າ ຈີບີ ເອັຟຊີ ທັງເປັນປະທານ ບໍລິສັດ ແກ້ວ ໂອໂຕກຣຸບ ຕົວແທນຈຳໜ່າຍລົດຫຍີ່ຫໍ້ Mazda ພຽງຜູ້ດຽວໃນ ສປປ ລາວ ໄດ້ໃຫ້ສຳພາດວ່າ: ພູມໃຈຢ່າງຍິ່ງທີ່ເຫັນເຖິງຄວາມຕັ້ງໃຈ ຄວາມານະອົດທົນ ແລະ ຈິດໃຈສູ້ຊົນຂອງເດັກນ້ອຍລາວ ຈົນສາມາດພິຊິດໄຊ ແລະ ຄວ້າແຊ້ມລາຍການນີ້ມາຄອງ, ໃນຕໍ່ໜ້າຈະສືບຕໍ່ຊຸກຍູ້ສົ່ງເສີມ ແລະສ້າງໂອກາດໃຫ້ເຂົາເຈົ້າໄດ້ເຄື່ອນໄຫວຝຶກແອບ ແລະແຂ່ງຂັນຢ່າງຕໍ່ເນື່ອງເພື່ອສ້າງຜົນງານອັນໃໝ່ ຕໍ່ຍອດສູ່ການຮັບໃຊ້ທີມຊາດໃນອະນາຄົດ.

ຂະນະທີ່ ອານຸສັກ ວິໄລກຸນ ເຈົ້າຂອງລາງວັນນັກເຕະດີເດັ່ນ (MVP) ຮຸ່ນອາຍຸບໍ່ເກີນ 8 ປີ ຈາກຜົນງານຍິງ 11 ປະຕູໃນລາຍການນີ້ກ່າວດີໃຈທີ່ໄດ້ຮັບລາງວັນນີ້ ແລະ ສາມາດຊ່ວຍທີມຄວ້າແຊ້ມມາຄອງ.

ການແຂ່ງຂັນລາຍການນີ້ຊິງທັງໝົດ 6 ຮຸ່ນອາຍຸຄື: 8 ປີ, 9 ປີ, 10 ປີ, 11 ປີ, 12 ປີ ແລະ 13 ປີ ເປັນລາຍການທີ່ໄດ້ຮັບຄວາມນິຍົມສູງ ແລະມີຜົນຕອບຮັບທີ່ດີ ໂດຍໄດ້ຮັບການສະໜັບສະໜູນຈາກການກິລາແຫ່ງປະເທດໄທຕາມການລາຍງານຂອງເຈົ້າພາບໃຫ້ຮູ້ວ່າ: ຕະຫລອດການແຂ່ງຂັນປີນີ້ມີມູນຄ່າທາງເສດຖະກິດ 100 ກວ່າລ້ານບາດ ໂດຍສະເພາະຊ່ວຍກະຕຸ້ນການທ່ອງທ່ຽວ ແລະເສດຖະກິດຂອງແຂວງ.

แชร์