ສຳມະນາກ່ຽວກັບແຜນພັດທະນາເສດຖະກິດດີຈີຕ໋ອນ ຂອງ ສປປ ລາວ

ກອງປະຊຸມສຳມະນາກ່ຽວກັບແຜນພັດທະນາເສດຖະກິດດີຈີຕ໋ອນ ຂອງ ສປປລາວ ໃຫ້ພະນັກງານຫຼັກແຫຼ່ງຢູ່ແຂວງອຸດົມໄຊ ຈັດຂຶ້ນໃນວັນທີ່ 25 ຕຸລາ 2022 ທີ່ຫ້ອງປະຊຸມພະແນກແຜນການ ແລະການລົງທຶນແຂວງ ໂດຍການເຂົ້າຮ່ວມຂອງທ່ານ ສົມຈິດ ປັນຍາສັກ ຮອງເຈົ້າແຂວງອຸດົມໄຊ, ມີທ່ານ ສັນຕິສຸກ ສິມມາລາວົງ, ຮອງລັດຖະມົນຕີກະຊວງເຕັກໂຍໂລຊີ ແລະການສື່ສານພ້ອມດ້ວຍຂະແໜງການທີ່ກ່ຽວຂ້ອງຕະຫຼອດຮອດພະນັກງານຫຼັກແຫຼ່ງຈາກພະແນກການອ້ອມຂ້າງເຂົ້າຮ່ວມ.

ຈຸດປະສົງກໍເພື່ອເປັນການຍົກລະດັບຄວາມຮູ້ຄວາມສາມາດຂອງພະນັກງານໃນຂົງເຂດຕ່າງໆໃຫ້ຮັບຮູ້ ແລະເຂົ້າໃຈກ່ຽວກັບແຜນພັດທະນາເສດຖະກິດດີຈີຕ໋ອນ ຂອງ ສປປລາວ. ໃນໂອກາດກ່າວເປີດພິທີທ່ານ ສົມຈິດ ປັນຍາສັກ ໄດ້ຍົກໃຫ້ເຫັນຄວາມໝາຍຄວາມສຳຄັນຂອງວຽກງານແຜນພັດທະນາເສດຖະກິດດີຈີຕ໋ອນ ຂອງ ສປປລາວ ເວົ້າລວມ,ເວົ້າສະເພາະກໍຄືຢູ່ແຂວງອຸດົມໄຊຊຶ່ງການນຳແຂວງແມ່ນໄດ້ຖືສຳຄັນວຽກງານດັ່ງກ່າວ ແລະໄດ້ມີແຜນພັດທະນາບຸກຄະລາກອນໃຫ້ມີຄວາມຊຳນິຊຳນານ ແລະ ມີແຜນການທີ່ຈະນຳໃຊ້ລະບົບດີຈີຕອນເຂົ້າໃນທຸກໜ້າວຽກເພື່ອໃຫ້ມີຄວາມສະດວກສະບາຍ ແລະວ່ອງໄວທັນສະໄໝຍິ່ງໆຂຶ້ນ, ກອງປະຊຸມສຳມະນາຄັ້ງນີ້ ຜູ້ເຂົ້າຮ່ວມແມ່ນຈະໄດ້ຮັບຟັງການເຜີຍແຜ່ເອກະສານກ່ຽວກັບຍຸກອຸດສາຫະກຳ 4.0, ການພັດທະນາເສດຖະກິດ ດີຈີຕ໋ອນ ຢູ່ ສປປ ລາວ ໝາຍເຖິງເສດຖະກິດຮູບແບບໃໝ່ບົນພື້ນຖານນຳໃຊ້ເຕັກໂນໂລຊີເປັນເຄື່ອງມືໃນການຂັບເຄື່ອນ ເພີ່ມປະສິດທິພາບ ແລະ ປະສິດທິຜົນ ຂອງວຽກງານທັງພາກລັດ ແລະເອກະຊົນສ້າງມູນຄ່າເພີ່ມໃຫ້ແກ່ການຜະລິດ, ການຄ້າ ແລະການບໍລິການຕ່າງໆ ແນໃສ່ຍົກລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນ. ການຫັນເປັນລັດຖະບານທັນສະໄໝ (ດີຈີຕ໋ອນ) ກໍເພື່ອເຊື່ອມໂຍງເຕັກໂນໂລຊີດີຈີຕອນເຂົ້າໃນທຸກຂະແໜງການລັດນຳໄປສູ່ການປະຕິຮູບພື້ນຖານຂອງການບໍລິຫານ ແລະບໍລິການລັດໃຫ້ທັນສະໄໝ, ວ່ອງໄວ ແລະໂປ່ງໃສເປັນຕົ້ນແມ່ນການປະຊຸມທາງໄກ, ການບໍລິຫານເອກະສານ, ການສື່ສານດີຈີຕ໋ອນ ແລະອື່ນໆ.
(ຂ່າວ: ແສງອາທິດ)

แชร์