ຮອງນາຍົກ ຕ້ອນຮັບຜູ້ອໍານວຍການອົງການອຸຍນີເຊັບ

ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ໄດ້ຕ້ອນຮັບ ທ່ານ ນາງ ເດໂບຣາ ໂຄມິນີ (Debora Comini) ຜູ້ອໍານວຍການ ອົງການອຸຍນີເຊັບ ປະຈໍາພາກພື້ນອາຊີຕາເວັນອອກ ແລະປາຊີຟິກເຂົ້າຢ້ຽມຂໍ່ານັບໃນວັນທີ 24 ຕຸລາ 2022 ທີ່ສຳນັກງານນາຍົກລັດຖະມົນຕີ.

ນີ້ເປັນຄັ້ງທຳອິດທີ່ ທ່ານ ນາງ ເດໂບຣາ ໂຄມິນີ ໄດ້ມາຢ້ຽມຢາມ ສປປ ລາວ ໃນຖານະຜູ້ອໍານວຍການອົງການອຸຍນີເຊັບປະຈໍາພາກພື້ນເພື່ອເຂົ້າຮ່ວມກອງປະຊຸມລະດັບພາກພື້ນຂອງອົງການອຸຍນີເຊັບ,ຊຶ່ງເປັນກອງປະຊຸມລະດັບຂັ້ນສູງລະຫວ່າງບັນດາຜູ້ນຳພາກພື້ນເພື່ອປຶກສາຫາລືກ່ຽວກັບສະພາບການຂອງເດັກນ້ອຍໃນພາກພື້ນ ແລະວິທີແກ້ໄຂບັນຫາທີ່ພວກເຂົາກຳລັງປະເຊີນຢູ່ໃນປັດຈຸບັນ.

ໃນໂອກາດດັ່ງກ່າວນີ້ສອງຝ່າຍໄດ້ປຶກສາຫາລືກ່ຽວກັບການຮ່ວມມືອັນຍາວນານລະຫວ່າງລັດຖະບານເເຫ່ງ ສປປ ລາວ ແລະອົງການອຸຍນີເຊັບ, ພ້ອມທັງວິທີການທີ່ອົງການອຸຍນີເຊັບຈະສາມາດຜັນຂະຫຍາຍການສະໜັບສະໜູນໃຫ້ເເກ່ແມ່ຍິງ ແລະເດັກນ້ອຍໃນລາວຕື່ມອີກ,ໂດຍສະເພາະໃນໄລຍະການລະບາດຂອງພະຍາດໂຄວິດ-19 ແລະຜົນກະທົບຕໍ່ກັບການເຂົ້າເຖິງສະບຽງອາຫານ ແລະດ້ານການເງິນ.

ທ່ານຮອງນາຍົກລັດຖະມົນຕີ ໄດ້ກ່າວວ່າ: “ລັດຖະບານ ແຫ່ງ ສປປ ລາວ ຕີລາຄາສູງຕໍ່ການຮ່ວມມືອັນຍາວນານກັບອົງການອຸຍນີເຊັບ ເຊິ່ງໄດ້ປະກອບສ່ວນເຂົ້າໃນການປັບປຸງຊີວິດຂອງເດັກນ້ອຍໃນລາວ, ບໍ່ວ່າຈະໃນດ້ານສຸຂະອະນາໄມ, ສຸຂະພາບ ແລະໂພຊະນາການ, ຫຼືວ່າການຮັບປະກັນການເຂົ້າເຖິງການສຶກສາທີ່ມີຄຸນນະພາບ ແລະການປົກປ້ອງສັງຄົມຢ່າງພຽງພໍໃຫ້ແກ່ທຸກຄອບຄົວ.”

ທ່ານ ກິແກ້ວ ໄຂຄໍາພິທູນ ຍັງໄດ້ສະເເດງຄວາມຂອບໃຈຕໍ່ອົງການອຸຍນີເຊັບສຳລັບການສະໜັບສະໜູນວຽກງານການຮັບມືກັບການລະບາດຂອງພະຍາດ ໂຄວິດ-19 ໃນ ສປປ ລາວ, ລວມເຖິງການຈັດສົ່ງ ແລະຮັບປະກັນການເຂົ້າເຖິງວັກຊີນກັນພະຍາດດັ່ງກ່າວ, ຄຽງຄູ່ກັບການປົກປ້ອງສຸຂະພາບ ແລະການສຶກສາຂອງເດັກນ້ອຍ ໂດຍການຮັບປະກັນການເປີດໂຮງຮຽນຄືນໃໝ່ຢ່າງປອດໄພ.

ທ່ານ ນາງ ເດໂບຣາ ໂຄມິນີ ຍັງໄດ້ສະເເດງຄວາມຊົມເຊີຍຕໍ່ການນຳພາອັນເຂັ້ມແຂງຂອງລັດຖະບານເເຫ່ງ ສປປ ລາວ ໃນການຮັບມືກັບພະຍາດ ໂຄວິດ-19. ນອກນັ້ນ, ທ່ານ ນາງ ເດໂບຣາ ໂຄມິນີ ຍັງໄດ້ສະເເດງຄວາມຂອບໃຈຕໍ່ທ່ານຮອງນາຍົກລັດຖະມົນຕີທີ່ຊີ້ນຳຂົງເຂດວຽກງານໂພຊະນາການ ເເລະວຽກງານສົ່ງເສີມສຸຂະພາບ ແລະສິດເດັກຂອງແມ່ຍິງ, ເດັກ ແລະ ເເມ່ ເຊັ່ນດຽວກັນກັບໃນຖານະປະທານຄະນະກໍາມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ (NCAWMC).

ທ່ານນາງ ເດໂບຣາ ໂຄມິນີ ໄດ້ກ່າວວ່າ: “ອົງການອຸຍນີເຊັບ ຫວັງເປັນຢ່າງຍິ່ງວ່າຈະສາມາດເພີ່ມທະວີການຮ່ວມມືຂອງພວກເຮົາກັບລັດຖະບານເເຫ່ງ ສປປ ລາວ ເພື່ອໃຫ້ການສະໜັບສະໜູນທີ່ເໝາະສົມໃນຂອບເຂດທີ່ສຳຄັນທີ່ສຸດສຳລັບເດັກນ້ອຍ ແລະໄວໜຸ່ມທຸກຄົນໃນ ສປປ ລາວ.”
ຂ່າວ: ອຸຍນີເຊັບ

แชร์