ຮອງລັດຖະມົນຕີກະຊວງ ຜທ ຕ້ອນຮັບຜູ້ອໍານວຍການອົງການອຸຍນີເຊັບເພື່ອປຶກສາຫາລືການພັດທະນາທຶນມະນຸດຂອງ ສປປ ລາວ

ຜູ້ອໍານວຍການອົງການອຸຍນີເຊັບປະຈໍາພາກພື້ນອາຊີຕາເວັນອອກ ແລະ ປາຊີຟິກ, ທ່ານນາງ ເດໂບຣາ ໂຄມິນີ (Debora Comini), ໄດ້ເຂົ້າຢ້ຽມຂໍ່ານັບທ່ານນາງ ພອນວັນ ອຸທະວົງ, ຮອງລັດຖະມົນຕີ ກະຊວງແຜນການ ແລະການລົງທຶນ (ຜທ) ໃນວັນທີ 24 ຕຸລາ 2022, ໂດຍເປັນການຢ້ຽມຢາມ ສປປ ລາວ ຄັ້ງທໍາອິດຂອງ ທ່ານນາງ ເດໂບຣາ ໂຄມິນີ ໃນຖານະຜູ້ອໍານວຍການອົງການອຸຍນີເຊັບປະຈໍາພາກພື້ນ.

ທ່ານ ນາງ ເດໂບຣາ ໂຄມິນີ ໄດ້ມາຢ້ຽມຢາມ ສປປ ລາວ ເພື່ອເຂົ້າຮ່ວມກອງປະຊຸມລະດັບພາກພື້ນຂອງອົງການອຸຍນີເຊັບ, ຊຶ່ງເປັນກອງປະຊຸມລະດັບສູງລະຫວ່າງບັນດາຜູ້ນຳພາກພື້ນເພື່ອປຶກສາຫາລືກ່ຽວກັບສະພາບການຂອງເດັກໃນພາກພື້ນ ແລະວິທີແກ້ໄຂບັນຫາທີ່ພວກເຂົາກຳລັງປະເຊີນຢູ່ໃນປັດຈຸບັນ. ປີນີ້ ສປປ ລາວ ໄດ້ຮັບກຽດເປັນເຈົ້າພາບກອງປະຊຸມດັ່ງກ່າວ.

ໃນໂອກາດດັ່ງກ່າວນີ້,ທ່ານ ນາງ ພອນວັນ ອຸທະວົງ ໄດ້ກ່າວຕ້ອນຮັບທ່ານ ນາງ ເດໂບຣາ ໂຄມິນີ ມາຍັງ ສປປ ລາວ ຢ່າງເປັນທາງການ ເເລະໄດ້ສະເເດງຄວາມຂອບໃຈຕໍ່ ອົງການອຸຍນີເຊັບສຳລັບການສະໜັບສະໜູນໃນການພັດທະນາທຶນມະນຸດຂອງ ສປປ ລາວ, ພ້ອມຍັງໄດ້ເນັ້ນໜັກເຖິງຄວາມສໍາຄັນຂອງການພັດທະນາທຶນມະນຸດຕໍ່ການກະກຽມ ສປປ ລາວ ສຳລັບການຫຼຸດພົ້ນອອກຈາກສະຖານະພາບປະເທດດ້ອຍພັດທະນາພາຍໃນປີ 2026.

ທ່ານ ນາງ ພອນວັນ ອຸທະວົງ ໄດ້ກ່າວວ່າ: “ການປັບປຸງຊີວິດການເປັນຢູ່ຂອງເດັກນ້ອຍຍັງມີຄວາມສຳຄັນທີ່ສຸດຕໍ່ກັບພັດທະນາທຶນມະນຸດຂອງ ສປປ ລາວ. ພວກເຮົາຂໍຂອບໃຈ ອົງການອຸຍນີເຊັບສໍາລັບການສະໜັບສະໜູນໃນການແກ້ໄຂບັນຫາທີ່ຮີບດ່ວນທີ່ສຸດທີ່ເດັກນ້ອຍກຳລັງປະເຊີນຢູ່, ບໍ່ວ່າຈະເເມ່ນວິກິດດ້ານການຮຽນຮູ້ທີ່ເກີດຂຶ້ນຈາກການລະບາດຂອງພະຍາດໂຄວິດ-19 ຈົນເຖິງສິ່ງທ້າທາຍອື່ນໆທີ່ກ່ຽວຂ້ອງກັບສຸຂະພາບ ແລະໂພຊະນາການທີ່ສໍາຄັນຕໍ່ການຈະເລີນເຕີບໂຕຂອງເດັກ.”

ທ່ານ ນາງ ເດໂບຣາ ໂຄມິນີ ກໍໄດ້ສະແດງຄວາມຂອບໃຈຕໍ່ທ່ານຮອງລັດຖະມົນຕີທີ່ໄດ້ໃຫ້ການຕ້ອນຮັບຢ່າງອົບອຸ່ນພ້ອມທັງໄດ້ຂອບໃຈກະຊວງແຜນການ ແລະການລົງທຶນ ທີ່ໄດ້ໃຫ້ການຮ່ວມມືຢ່າງໃກ້ຊິດກັບອົງການອຸຍນີເຊັບໃນການພັດທະນາແຜນງານການຮ່ວມມືລະຫວ່າງ ລັດຖະບານ ແຫ່ງ ສປປ ລາວ ແລະອົງການຢູນິເຊັບ ສົກປີ 2022-2026, ຊຶ່ງກໍານົດຂອບເຂດວຽກງານບູລິມະສິດລະຫວ່າງທັງສອງພາກສ່ວນສໍາລັບຫ້າປີຂ້າງຫນ້າ.
ຂ່າວ: ອຸຍນີເຊັບ

แชร์