ສ່ວຍສາອາກອນແຂວງຫລວງພະບາງ ສະຫຼຸບການຈັດເກັບອາກອນ 09 ເດືອນ

ໃນວັນທີ 21 ຕຸລາ 2022 ທີ່ຫ້ອງປະຊຸມພະແນກການເງິນ ແຂວງຫຼວງພະບາງ ສ່ວຍສາອາກອນປະຈໍາແຂວງຫຼວງພະບາງ ໄດ້ຈັດກອງປະຊຸມສະຫຼຸບວຽກງານການຈັດຕັ້ງປະຕິບັດເກັບອາກອນເຂົ້າງົບປະມານໄລຍະ 9 ເດືອນຜ່ານມາ ພ້ອມທັງວາງແຜນການໃນຕໍ່ໜ້າໂດຍການເປັນປະທານຂອງທ່ານ ພູຄໍາ ແສງດາໄລ ຮອງຫົວໜ້າພະແນກການເງິນແຂວງຫຼວງພະບາງ,ມີຄະນະນໍາຫ້ອງການສ່ວນສາອາກອນປະຈໍາແຂວງ,ນະຄອນ ແລະບັນດາເມືອງພ້ອມດ້ວຍພະນັກງານເຂົ້າຮ່ວມ.

ທ່ານ ພູຄໍາ ແສງດາໄລ ຮອງຫົວໜ້າພະແນກການເງິນແຂວງກ່າວມີຄໍາເຫັນເປີດກອງປະຊຸມຄັ້ງນີ້ເປັນການສະຫຼຸບການຈັດຕັ້ງປະຕິບັດການຈັດເກັບລາຍຮັບງົບປະມານ ໃນໄລຍະ 9 ເດືອນຜ່ານມາຂອງວຽກງານສ່ວຍສາອາກອນຢູ່ໃນພາຍແຂວງ, ເພື່ອແຈ້ງແຜນຈັດເກັບລາຍຮັບເຂົ້າງົບປະມານແຫ່ງລັດ ປະຈໍາປີ 2022 ໃຫ້ໄດ້ຕາມແຜນການ ຫຼືລື່ນແຜນການຕາມກົດໝາຍ ແລະລະບຽບການສ່ວຍສາອາກອນ ແລະພ້ອມກັນປະກອບຄວາມຄິດເຫັນໃສ່ບັນດາວຽກງານທີ່ຍັງຄົງຄ້າງເພື່ອສືບຕໍ່ການຈັດຕັ້ງປະຕິບັດໄລຍະ 03 ເດືອນທ້າຍປີ 2022 ໃຫ້ບັນລຸຕາມຄາດໝາຍທີ່ວາງໄວ້.

ສໍາລັບການຈັດເກັບອາກອນໄລຍະ 9 ເດືອນຜ່ານມາທ່ານ ຄໍາເພັດ ສີລາທອງນິດ ຮອງຫົວໜ້າສ່ວຍສາອາກອນປະຈໍາແຂວງ ກໍໄດ້ໃຫ້ຮູ້ວ່າ: ສ່ວຍສາອາກອນປະຈຳແຂວງຫລວງພະບາງ ໄດ້ເຮັດໜ້າທີ່ໃນການ ຄຸ້ມຄອງເກັບລາຍຮັບສ່ວຍສາອາກອນ, ລາຍຮັບທີ່ດິນ, ຄ່າທຳນຽມຕ່າງໆ ແລະ ຄ່າບໍລິການຈາກບັນດາຂະແໜງການລັດບໍລິຫານເຂົ້າງົບປະມານແຫ່ງລັດຕາມກົດໝາຍ ແລະລະບຽບການກຳນົດ,ທົ່ວແຂວງມີສະຖິຕີຫົວໜ່ວຍທຸລະກິດທັງໝົດ 7.193ຫົວໜ່ວຍ,ເພີ່ມຂຶ້ນ 1.400 ຫົວໜ່ວຍ ເທົ່າ 19% ເປັນ 8.594 ຫົວໜ່ວຍ.ໃນນີ້ຫົວໜ່ວຍ 50 ລ້ານກີບລົງມາ 1.894 ຫົວໜ່ວຍ, ກວດກາຄືນມີ 1.702 ຫົວໜ່ວຍ, ລຸດລົງ 192 ຫົວໜ່ວຍ;ຫົວໜ່ວຍ 50 ລ້ານ ຫາ 400 ລ້ານກີບມີ 5.024 ຫົວໜ່ວຍ, ກວດກາຄືນມີ 4.586 ຫົວໜ່ວຍ ແລະຫົວໜ່ວຍເກີນ 400 ລ້ານກີບ ມີ 1.676 ລຸດລົງ 604 ຫົວໜ່ວຍ,ຈາກອົງການຈັດຕັ້ງລັດ 468 ຫົວໜ່ວຍ,ຄ່າເຊົ່າ 1.234ຫົວໜ່ວຍ,ທົ່ວແຂວງມີດີນ 257.742 ຕອນ,ອອກໃບຕາດິນ 125.197 ຕອນ ເທົ່າກັບ 48,57% ຂອງຕອນດິນທັງໝົດ,ບໍ່ທັນອອກໃບຕາດິນ 132.545 ຕອນ,ເທົ່າກັບ 51,42%.ທົ່ວແຂວງມີສະຖິຕິພາຫະນະທັງໝົດ 144.032 ຄັນ,ໃນນີ້: ປະເພດລົດໃຫຍ່ 21.607 ຄັນ ແລະ ລົດຈັກລົດສາມລໍ້ 122.402 ຄັນ, ລົດໄຟຟ້າ 23 ຄັນ.ການເກັບລາຍຮັບປີ 2022 ແຜນເບື້ອງຕົ້ນ 351,99 ຕື້ກີບ,ແຜນດັດແກ້ 366,57 ຕື້ກີບ,ເຊິ່ງ 09 ເດືອນຕົ້ນປີ ປະຕິບັດໄດ້ 242,10 ຕື້ກີບ ເທົ່າກັບ 68,75 % ຂອງແຜນເບື້ອງຕົ້ນ ແລະເທົ່າກັບ 66,05 % ຂອງແຜນດັດແກ້, ຖ້າທຽບໃສ່ໄລຍະດຽວກັນຂອງປີຜ່ານມາ ເພີ້ມຂື້ນ 19,96% ເປັນເງິນ 40,27 ຕື້ກີບ.ໃນນີ້ຂັ້ນແຂວງ ປະຕິບັດໄດ້ 206,58 ຕື້ກີບ ເທົ່າກັບ 67,91% ຂອງແຜນການປີ,ສະເພາະນະຄອນຫລວງພະບາງ ປະຕິບັດໄດ້ 15,32 ຕື້ກີບ ເທົ່າກັບ 57,67% ຂອງແຜນການປີ ແລະບັນດາ 11 ເມືອງ ປະຕິບັດໄດ້ 20,20 ຕື້ກີບ ເທົ່າກັບ 56,48% ຂອງ ແຜນການປີ,ໃນນີ້ຈາກອາກອນປົກກະຕິ ປະຕິບັດໄດ້ 189,29 ຕື້ກີບ ເທົ່າກັບ 67,10% ຂອງແຜນການປີ,ຄ່າທຳນຽມທາງ ປະຕິບັດໄດ້ 2,90 ຕື້ກີບ ເທົ່າກັບ 96,80% ຂອງແຜນການປີ,ຄ່າທຳນຽມຕ່າງໆ ປະຕິບັດໄດ້ 4,58 ຕື້ກີບ ເທົ່າກັບ 85,74% ຂອງແຜນການປີ,ຄ່າບໍລິການລາຍ ປະຕິບັດໄດ້ 19,52 ຕື້ກີບ ເທົ່າກັບ 52,92 %ຂອງແຜນການປີ,ພາສີທີ່ດິນ 4,91 ຕື້ກີບ ເທົ່າກັບ 32,48% ຂອງແຜນການປີ ແລະລາຍຮັບຊັບສິນ ປະຕິບັດໄດ້20,78 ຕື້ກີບ ເທົ່າກັບ 86,25% ຂອງແຜນການປີ.ລາຍຮັບສູນກາງວິຊາເເຜນ 1 ຕື້ກີບ ປະຕິບັດໄດ້ 369 ລ້ານກີບ ແລະ 60.756 ໂດລາ ລວມທັງໝົດ1.341.096.000ກີບ ເທົ່າກັບ134%ຂອງແຜນປີ.

ກອງປະຊຸມຄັ້ງນີ້ກໍໄດ້ຮັບຟັງການລາຍງານການຈັດເກັບອາກອນເຂົ້າງົບປະມານຢູ່ນະຄອນ ແລະບັນດາເມືອງ ພ້ອມກັນນັ້ນຜູ້ແທນເຂົ້າຮ່ວມກໍໄດ້ສຸມໃສ່ປະກອບຄວາມຄິດເຫັນຕໍ່ບັນດາຂອດຄົງຄ້າງ ແລະວຽກງານທີ່ຕ້ອງສືບຕໍ່ຈັດຕັ້ງປະຕິບັດໄລຍະ 3 ເດືອນທ້າຍປີ 2022ຕື່ມອີກ.
ຂ່າວ: ເພັດສາຄອນ ສິມມະວົງ

แชร์