ສະເຫຼີມສະຫຼອງວັນສ້າງຕັ້ງເຫຼົ່າຮົບທະຫານຊາຍແດນຄົບຮອດ 10 ປີ

ພິທີສະເຫຼີມສະຫຼອງແລະຍ້ອງຍໍເນື່ອງໃນໂອກາດວັນສ້າງຕັ້ງເຫຼົ່າຮົບທະຫານຊາຍແດນຄົບຮອດ 10 ປີ ໄດ້ຈັດຂຶ້ນໃນວັນທີ 21 ຕຸລາ 2022 ທີ່ສະໂມສອນກົມໃຫ່ຍການເມືອງກອງທັບ ເປັນກຽດເຂົ້າຮ່ວມມີ ທ່ານ ພົນໂທ ຄຳລຽງ ອຸທະໄກສອນ ກຳມະການສູນກາງພັກ ຮອງລັດຖະມົນຕີ ຫົວໜ້າກົມໃຫ່ຍເສນາທິການກອງທັບ ກະຊວງປ້ອງກັນປະເທດ ມີບັນດາແຂກທີ່ຖືກເຊີນ ມີບັນດາກົມກອງອ້ອມຂ້າງສູນກາງ ແລະ ທ້ອງຖິ່ນເຂົ້າຮ່ວມ.

ທ່ານ ພົນຈັດຕະວາ ສີພັນ ພຸດທະວົງ ຄະນະພັກກົມໃຫ່ຍເສນາທິການ ຫົວໜ້າກົມທະຫານຊາຍແດນ ກະຊວງປ້ອງກັນປະເທດ ໄດ້ຂຶ້ນຜ່ານບົດລາຍງານການຈັດຕັ້ງປະຕິບັດວຽກງານຄຸ້ມຄອງປ້ອງກັນຊາຍແດນ ໄລຍະ 10 ປີ 2012-2022 ແລະ ວິໃສທັດໃນການຄຸ້ມຄອງປ້ອງກັນຊາຍແດນແຕ່ປີ 2022-2030 ຂອງເຫຼົ່າຮົບມະຫານຊາຍແດນ ກອງທັບປະຊາຊົນລາວ ວ່າ: ພາຍຫຼັງປະກາດສ້າງຕັ້ງເປັນປະເທດ ສປປ ລາວ ໃນວັນທີ 2 ທັນວາ ປີ 1975 ຢ່າງເອກອ້າງທະນົງໃຈ ແລະ ເຮັດໃຫ້ປະເທດລາວໄດ້ກາຍເປັນປະເທດໜຶ່ງ ທີ່ມີຄວາມເປັນເອກະລາດ, ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນ ມີຊາຍແດນຕິດຈອດ ກັບ 5 ປະເທດ ແລະ ມີຄວາມຍາວເສັ້ນຊາຍແດນປະມານ 5.452.239 ກິໂລແມັດ.ທິດຕາເວັນອອກຕິດກັບ ສສ ຫວຽດນາມ ຍາວປະມານ 2.337.459 ກິໂລແມັດ.ທິດເໜືອຕິດກັບ ສປ ຈີນ ຍາວປະມານ 508.780 ກິໂລແມັດ.ທິດຕາເວັນຕົກຕິດກັບຣາຊະອານາຈັກໄທຍາວປະມານ 1.835 ກິໂລແມັດ. ໃນນັ້ນ ທາງບົກ 735 ກິໂລແມັດ. ທາງນໍ້າ 1.100 ກິໂລແມັດ.( ນໍ້າຂອງ 953 ກິໂລແມັດ., ນໍ້າເຫືອງ 147 ກິໂລແມັດ. ).ທິດຕາເວັນຕົກສຽງເໜືອຕິດກັບສາທາລະນະລັດ ສະຫະພາບມຽນມາຍາວປະມານ 236 ກິໂລແມັດ. ( ທາງນໍ້າຂອງ )ທິດໃຕ້ຕິດກັບຣາຊະອານາຈັກກໍາປູເຈຍຍາວປະມານ 535 ກິໂລແມັດ.

ສະພາບການຊາຍແດນໂດຍພື້ນຖານຍັງມີຄວາມສະຫງົບ, ມີສະຖຽນລະພາບທາງດ້ານການເມືອງ,ອົງການປົກຄອງທ້ອງຖິ່ນ ແລະ ປະຊາຊົນບັນດາເຜົ່າຢູ່ບໍລິເວນຕາມຊາຍແດນ ຍັງມີຄວາມເຊື່ອໝັ້ນ ແລະ ຈົ່ງຮັກພັກດີ, ໃຫ້ການຮ່ວມມືຢ່າງຕັ້ງໜ້າເຂົ້າໃນການປົກປັກຮັກສາ ແລະຄຸ້ມຄອງເສັ້ນຊາຍແດນ, ຫຼັກໝາຍຊາຍແດນ, ຮັກສາຄວາມສະຫງົບຮຽບຮ້ອຍຢູ່ບໍລິເວນຊາຍແດນ, ມີການພົວພັນໄປມາຊື້ຂາຍຮ່ວມກັນຕາມລະບຽບການຊາຍແດນທີ່ໄດ້ກໍານົດ, ການພັດທະນາເສດຖະກິດຊາຍແດນໄດ້ຮັບການຈັດຕັ້ງປະຕິບັດເປັນຮູບປະທໍາຫຼ້າຍຂຶ້ນ. ແຕ່ຄຽງຄູ່ກັນນັ້ນກໍ່ຍັງມີບາງສະພາບການ, ປະກົດການຫຍໍ້ທໍ້ ແລະຄວາມບໍ່ສະຫງົບເກີດຂຶ້ນຢ່າງຕໍ່ເນື່ອງ ແລະເປັນປະຈໍາ
ຕະຫຼອດໄລຍະ 10 ປີຜ່ານມາ ເຫັນວ່າເຫຼົ່າຮົບທະຫານຊາຍແດນໄດ້ມີວິວັດທະນະການ ແລະເຕີບໃຫຍ່ທາງດ້ານປະລິມານ ແລະ ຄຸນນະພາບຢ່າງບໍ່ຢຸດຢັ້ງ. ດ້ວຍຄວາມເອົາໃຈໃສ່ຂອງ ຄະນະນໍາກະຊວງປ້ອງກັນປະເທດ ກໍ່ຄືຄະນະນໍາກົມໃຫຍ່ເສນາທິການ ກໍາລັງທະຫານຊາຍແດນ ໄດ້ປັບປຸງຕົນເອງໃຫ້ມີຄວາມສະຫງົບທາງດ້ານການເມືອງ, ມີຄວາມເຂັ້ມແຂງທາງດ້ານການຈັດຕັ້ງ ແລະ ມີຄວາມຮູ້-ຄວາມສາມາດ ໃນການປະຕິບັດຕາມພະລາບົດບາດ ແລະ ໜ້າທີ່ການເມືອງ ທີ່ໄດ້ຮັບມອບໝາຍຂອງຕົນເປັນຢ່າງດີ.ມີຫຼາຍກົມກອງທະຫານຊາຍແດນໄດ້ຮັບນາມມະຍົດເປັນກົມກອງວັດທະນາທໍາ, ກົມກອງປອດໃສ, ປອດໄພ, ປອດຄະດີ, ໄດ້ຮັບການຍ້ອງຍໍກົມກອງລວມໝູ່ມີ: ຫຼຽນໄຊອິດສະຫຼະຊັ້ນ II; ຊັ້ນ III; ຫຼຽນໄຊພິລະອາດຫານ ຊັ້ນ I, ຊັ້ນ II, ຊັ້ນ III: ຫຼຽນໄຊແຮງງານຊັ້ນ II: ຊັ້ນ III, ຫຼຽນກາແຮງ, ຫຼຽນກຽດຕິຄຸນກອງທັບ,ຫຼຽນໄຊມິດຕະພາບ ລາວ-ຫວຽດນາມ, ຫຼຽນກາມິດຕະພາບ ລາວ-ຈີນ ແລະ ໃບຍ້ອງຍໍປະເພດຕ່າງໆຈໍານວນຫຼວງຫຼາຍ.

ໃນໂອກາດນີ້: ທ່ານ ພົນໂທ ຄຳລຽງ ອຸທະໄກສອນ ໄດ້ໃຫ້ກຽດຂຶ້ນປະດັບຫຼຽນໄຊພິລະອາດຫານຊັ້ນ I ໃຫ້ກົມກອງທະຫານຊາຍແດນ ກົມໃຫ່ຍເສນາທິການກອງທັບ ແລະ ປະດັບຫຼຽນໄຊພິລະອາດຫານຊັ້ນ III ໃຫ້ບັນດາກົມກອງ ຈຳນວນ 141 ກົມກອງ ນອກຈາກນີ້: ທ່ານ ຍັງໄດ້ໂອ້ລົມເພື່ອເປັນເຂັ້ມທິດເຍື່ອງທາງ ຕະຫຼອດໄລຍະ 10 ປີ ຜ່ານມາເຫຼົ່າລົບທະຫານຊາຍແດນ ໄດ້ປະກອບສ່ວນເຮັດໜ້າທີ່ສຳຄັນຂອງຕົນຮ່ວມກັບເຫຼົ່າຮົບອື່ນໃນການປົກປັກຮັກສາ ເອກະລາດ ອະທິປະໄຕ ແລະ ພື້ນແຜ່ນດິນອັນຄົບຖ້ວນຂອງປະເທດຊາດໄວ້ໄດ້ຢ່າງໝັ້ນຄົງ. ເຫຼົ່າຮົບທະຫານຊາຍແດນ ມີອາຍຸ ພຽງແຕ່ 10 ປີ ຍັງໜຸ່ມນ້ອຍ ເມື່ອທຽບໃສ່ເຫຼົ່າຮົບອື່ນໆ ແຕ່ທຸກຄົນ ໄດ້ມີຄວາມຮັບຜິດຊອບສູງໃນການປະຕິບັດໜ້າທີ່, ມີຄວາມເອົາໃຈໃສ່ປັບປຸງກໍ່ສ້າງກົມກອງໃນທຸກດ້ານ, ສາມາດປະຕິບັດບົດບາດ, ໜ້າທີ່ຂອງທະຫານຊາຍແດນໄດ້ໃນລະດັບອັນແນ່ນອນ, ປະກອບສ່ວນເຮັດໃຫ້ຊາຍແດນແຫ່ງຊາດໃນຂອບເຂດທົ່ວປະເທດມີສະຖຽນລະພາບທາງດ້ານການເມືອງ, ມີຄວາມສະຫງົບປອດໄພໂດຍພື້ນຖານ, ສາມາດເວົ້າໄດ້ວ່າເຫຼົ່າຮົບທະຫານຊາຍແດນໃນໄລຍະ 10 ປີ ຜ່ານມາໄດ້ມີການເຕີບໃຫຍ່ຂະຫຍາຍຕົວທາງດ້ານ ປະລິມານ ແລະ ຄຸນນະພາບຢ່າງແທ້ຈິງ, ເຊິ່ງທັງໝົດນີ້ແມ່ນ ຕິດພັນແໜ້ນກັບໜ້າທີ່ການເມືອງ, ຄວາມຮັບຜິດຊອບຂອງກົມທະຫານຊາຍແດນ,ຄວາມຮັບຜິດຊອບຂອງຄະນະພັກ-ຄະນະບັນຊາການທະຫານແຂວງ,ນະຄອນຫຼວງ ໃນການປັບປຸງກໍສ້າງກຳລັງທະຫານຊາຍແດນໃຫ້ມີຄວາມເຕີບໃຫ່ຍເຂັ້ມແຂງ,ເປັນກຳລັງແຮງ ແລະໄວ້ເນື້ອເຊື່ອໃຈຈາກພັກ-ລັດ ແລະປະຊາຊົນບັນດາເຜົ່າ.

ຂ່າວ ບຸນຕອມ,ຮູບ ບຸນອຸ້ມ

แชร์