ຮອງ ລມຕ ກະຊວງ ຜທ ຫາລືກັບຮອງເຈົ້າແຂວງກ່ຽວກັບໂພຊະນາການ

ທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດໄດ້ຕ້ອນຮັບການເຂົ້າພົບຂອງທ່ານ ສະຖາບັນດິດ ອິນສີຊຽງໃໝ່ ຮອງລັດຖະມົນຕີກະຊວງແຜນການ ແລະ ການລົງທຶນ ພ້ອມ ຄະນະ ເມື່ອບໍ່ດົນຜ່ານມານີ້, ທີ່ຫ້ອງຮັບແຂກຂອງຫ້ອງວ່າການປົກຄອງແຂວງສະຫວັນນະເຂດ.

ໃນໂອກາດນີ້, ທ່ານຮອງລັດຖະມົນຕີໄດ້ສະເໜີຈຸດປະສົງໃນການເຂົ້າພົບກັບການນຳຂອງແຂວງສະຫວັນນະເຂດໃນຄັ້ງນີ້ຊຶ່ງມີຈຸດປະສົງຫຼັກເພື່ອຂໍການຊີ້ນຳຈາກການນຳຂອງແຂວງໃນການສ້າງຕັ້ງຄະນະຊີ້ນຳເກັບກຳຂໍ້ມູນກ່ຽວກັບດ້ານໂພຊະນາການພາຍໃນແຂວງສະຫວັນນະເຂດຊຶ່ງລວມມີຫຼາຍພະແນກການເຮັດວຽກຮ່ວມກັນ ຄື: ພະແນກແຜນການ ແລະການລົງທຶນ, ພະແນກກະສິກຳ-ປ່າໄມ້, ພະແນກສຶກສາທິການ ແລະກິລາ ແລະພະແນກສາທາລະນະສຸກແຂວງໂດຍຖານຂໍ້ມູນສຳລັບໂພຊະນາການທີ່ເກັບກຳໄດ້ຈະຖືກເກັບກຳຢ່າງລະອຽດເພື່ອສົ່ງໃຫ້ທາງສູນກາງເປັນຜູ້ລວບລວມເພື່ອຈະເປັນສະຖິຕິລວມຂອງປະເທດໃນດ້ານໂພຊະນາການ ແລະຈະໄດ້ນຳສະເໜີໃຫ້ກັບສະຫະພາບເອີຣົບ(EU) ເພື່ອຂໍການສະໜັບສະໜູນດ້ານງົບປະມານໃນການຈັດຕັ້ງປະຕິບັດໂຄງການປັບປຸງສົ່ງເສີມດ້ານໂພຊະນາການຢູ່ບັນດາແຂວງເປົ້າໝາຍຕ່າງໆພາຍໃນປະເທດ.

ຈາກນັ້ນ, ທ່ານຮອງເຈົ້າແຂວງກໍໄດ້ມີຄຳເຫັນຊຶ່ງທ່ານຈະນຳເອົາການຫາລືດັ່ງກ່າວນີ້ນຳສະເໜີທ່ານເຈົ້າແຂວງເພື່ອພິຈາລະນາແຕ່ງຕັ້ງຄະນະກຳມະການລະດັບແຂວງ ເພື່ອເກັບກຳສະຖິຕິໃນດ້ານໂພຊະນາການໃຫ້ແກ່ຂັ້ນສູນກາງໃຫ້ເປັນສະຖິຕິທີ່ເຊື່ອຖືໄດ້ໂດຍໃຫ້ພະແນກການກ່ຽວຂ້ອງເປັນຜູ້ຮ່ວມເຮັດວຽກໃນຄັ້ງນີ້.

(ຂ່າວ: ສະຫວັນນະເຂດ)

• 21/10/2022