ເລື່ອງພິທີກອນ ຍົກນ້ອງພອນຣິສາ ຈິດຕະພົງ ຫຼືດີເຈໂນ້ນີ ຫຼາຍຄວາມສາມາດ

ຈາກຄວາມສາມາດ ແລະພອນສະຫວັນຈົນເຮັດໃຫ້ສັງກາຍເປັນທີ່ຮູ້ຈັກ ນ້ອງ ພອນຣິສາ ຈິດຕະພົງ ຫຼືດີເຈໂນ້ນີ ໄວ 13 ປີ ທີ່ເປັນພິທີກອນງານສຳຄັນຕ່າງໆ ແລະຈັດລາຍການ “ຊີວິດອິນເທຣນ” ທີ່ຄື້ນ MCK radio FM 98,8 Mhz ວິທະຍຸນະຄອນຫຼວງວຽງຈັນ.

ຫຼາຍທ່ານຄົງຈະເຄີຍໄດ້ຍິນນໍ້າສຽງຂອງນ້ອງ ພອນຣິສາ ຈິດຕະພົງ ຫຼື ດີເຈໂນ້ນີ ໄວ 13 ປີ ທີ່ຈັດລາຍການ “ຊີວິດອິນເທຣນ” ທີ່ຄື້ນ MCK radio FM 98,8 Mhz ວິທະຍຸນະຄອນຫຼວງວຽງຈັນ ເຊິ່ງນ້ອງເປັນອີກຄົນໜຶ່ງທີ່ມີນໍ້າສຽງທີ່ອ່ອນຫວານ, ໃສ ແລະມີຄວາມເປັນເອກະລັກຂອງໂຕເອງ, ເຮັດໃຫ້ຜູ້ຟັງຫຼາຍໆທ່ານຕ່າງກໍ ສະອອນໃນນໍ້າສຽງຂອງນ້ອງ.ນອກຈາກ ການເປັນນັກຈັດລາຍການວິທະຍຸແລ້ວໂນ້ນີ້ ຍັງມີຄວາມສາມາດໃນການເປັນພິທີກອນ, ການເດີນແບບ ແລະ ມີຜົນງານອື່ນໆອີກຫຼາຍຜົນງານຈົນໄດ້ຮັບສາຍາວ່າ:“ໂຄສົກນ້ອຍ ຮ້ອຍຄວາມສາມາດ” ເຊິ່ງປັດຈຸບັນນ້ອງໂນ່ນີ້ເປັນນັກຮຽນຢູ່ຊັ້ນມໍ 3 ໂຮງຮຽນ ມ.ສ ວຽງຈັນ.

ກ່ອນນ້ອງໂນ້ນີ ຈະກ້າວເຂົ້າມາເປັນນັກຈັດລາຍການວິທະຍຸເຂົາເລີ່ມເຂົ້າສູ່ເວທີການເດີນແບບຕັ້ງແຕ່ອາຍຸ 5 ປີ, ໂດຍມີແມ່ເປັນຜູ້ຮັບງານ ແລະຈັດເລື່ອງຄິວໃຫ້ທຸກຢ່າງ,ນ້ອງຂຶ້ນເວທີທຳອິດແມ່ນເວທີປະກວດຂອງໂຮງຮຽນອະນຸບານ ທະນາຄານແຫ່ງ ສປປ ລາວ, ຮູ້ສຶກມັກຮັກໃນການເດີນແບບ, ເລາະປະກວດທຸກເວທີທີ່ຈັດການເດີນແບບ, ເກືອບທຸກເວທີທີ່ໄດ້ຮັບລາງວັນ, ເຖິງຈະບໍ່ໄດ້ເປັນທີ່ 1 ກໍຕາມ, ສຳລັບຈຸດເດັ່ນຂອງນ້ອງແລ້ວເປັນຄົນທີ່ມີພອນສະຫວັນທາງດ້ານນໍ້າສຽງ, ບຸກຄະລິກທ່າທາງ,ການວາງຕົວເປັນແບບຜູ້ໃຫຍ່. ກໍໄດ້ເລີ່ມປະກວດໃນງານທີ່ໃຫຍ່ຂຶ້ນເຊັ່ນ: Lao super model ໄດ້ເຂົ້າຮອບ 6 ຄົນສຸດທ້າຍ, ຕໍ່ມາໄດ້ເຂົ້າປະກວດ kids and young model contes 2019 ໄດ້ຮັບລາງວັນຂວັນໃຈມະຫາຊົນ ແລະ ໄດ້ປະກວດ miss beauty power Laos 2022 ໄດ້ຮັບຕຳແໜ່ງ miss singing star ມາຄອບຄອງ, ນອກຈາກນີ້ຍັງມີງານພິທີກອນທີ່ໄອເຕັກ, ງານອີເວັ້ນຫຼາຍໆງານ, ງານຖ່າຍໂປຣໂໝດໂຄສະນາສິນຄ້າ ແລະໄດ້ສະແດງຊີລີ້ “ຍາແມ່ ໄກ່” ຂອງໄກ່ໂອເວີແດນເຊິ່ງຮັບບົດເປັນນາງເອກຕອນນ້ອຍ.

ສຳລັບນ້ອງ ໂນ້ນີ ແລ້ວ ການເປັນພິທີກອນຢາກກວ່າການເດີນແບບເພາະມັນເປັນທັກສະໃນການເວົ້າໂດຍທີ່ເຮົາຈະຈັດລຽງຄໍາເວົ້າອອກມາແນວໃດໃຫ້ຜູ້ຟັງມີຄວາມສົນໃຈໃນສີ່ງທີ່ເຮົາເວົ້າ, ສິ່ງໃດທີ່ເຮົາຄວນເວົ້າ ແລະບໍ່ຄວນເວົ້າອອກໄປ, ແຕ່ນ້ອງກໍມີຄວາມພູມໃຈໃນຄວາມສາມາດຂອງຕົນເອງທີ່ເຮັດອອກມາໄດ້ ແລະໄດ້ຮັບຄວາມຊົມເຊີຍຈາກຫຼາຍໆຄົນທີ່ມັກໃນນໍ້າສຽງການຈັດລາຍການຂອງນ້ອງ.

ນ້ອງໂນ້ນີ ຍັງເວົ້າອີກວ່າ: ການຮັບງານຫຼາຍໆງານພ້ອມກັນບໍ່ໄດ້ສົ່ງຜົນກະທົບຕໍ່ການຮຽນເລີຍເພາະນ້ອງຈະຮັບງານແຕ່ຕອນເລີກຮຽນ ຫຼືວັນພັກເທົ່ານັ້ນໂດຍໄດ້ຖືເອົາການຮຽນເປັນຫຼັກ ແລະງານຕ່າງໆເປັນການຮຽນຮູ້ເພື່ອເກັບກ່ຽວປະສົບການ, ນ້ອງຄິດວ່າຈະຮັບງານແບບນີ້ໄປຕະຫຼອດ ແລະພ້ອມເຝິກຜົນໂຕເອງໃຫ້ດີທີ່ສຸດ ເທົ່າທີ່ເດັກນ້ອຍຜູ້ໜຶ່ງຈະເຮັດໄດ້ ແລະຄວາມຝັນຂອງນ້ອງແມ່ນຢາກເປັນໝໍປິ່ນປົວຄົນເຈັບເພາະຈະໄດ້ຊ່ວຍເຫຼືອເພື່ອນມະນຸດດ້ວຍກັນ.

ທ້າຍນີ້ກໍຢາກຝາກເຖິງໝູ່ເຟືອນທີ່ກຳລັງຮຽນຢູ່ຕອນນີ້ຈົ່ງຕັ້ງໃຈຮຽນເພາະການຮຽນບໍ່ມີວັນສິ້ນສຸດຈະຢູ່ເປັນຄວາມຮູ້ຄູ່ໂຕເຮົາໄປຕະຫຼອດ, ຈົ່ງຮັກໃນສິ່ງທີ່ໂຕເອງມັກ ແລະຢ່າຢຸດຝັນຂອງຕົນເອງບໍ່ວ່າຊິເກີດບັນຫາຫຍັງຂຶ້ນເຮົາຈະຕ້ອງກ້າວຜ່ານມັນໄປໃຫ້ໄດ້ເພື່ອອະນາຄົດທີ່ດີຂອງເຮົາເອງ.

แชร์