ຕາມຂ່າວຈາກ ວິທະຍຸ ສາກົນ ຫວຽດນາມ, ທ່ານ ທາຍຍິບ ເອີໂດກັນ (Tayyip Erdogan) ປະທານາທິບໍດີ ຕວັກກີ ແລະທ່ານ ວາລາດີເມຍ ປູຕິນ (Vladimir Putin) ປະທານາທິບໍດີ ຣັດເຊຍ ໄດ້ຕົກລົງ ເຫັນດີ ເປັນເອກະພາບ ຕໍ່ເລື່ອງ ການສ້າງຕັ້ງ ສູນອາຍແກັດ ຢູ່ ປະເທດ ຕວັກກີ. ໃນຂະນະນີ້, ການນຳ 27 ປະເທດສະມາຊິກ ສະຫະພາບ ເອີຣົບ (ອີຢູ) ໄດ້ຈັດກອງປະຊຸມສຸດຍອດໃນລະຫວ່າງວັນທີ 20 ຫາ ວັນທີ 21 ຕຸລານີ້ຢູ່ ນະຄອນຫລວງ ບຣຸກແຊນ, ປະເທດ ແບນຊິກ. ນີ້ແມ່ນກອງປະຊຸມ ສືບທອດ ຈາກ ກອງປະຊຸມສຸດຍອດບໍ່ເປັນທາງການເຊິ່ງດຳເນີນໃນວັນທີ 7 ຕຸລາ ຜ່ານມາຢູ່ ປຣາຮາ(Praha), ສ.ເຊັກໂກ, ຊຶ່ງເປັນສະຖານທີ່ການນຳອີຢູໄດ້ປຶກສາຫາລືກ່ຽວກັບວິກິດການ ຣັດເຊຍ-ອູແກຣນ ກໍຄືຜົນກະທົບຕໍ່ວິກິດການພະລັງງານ ແລະພື້ນຖານເສດຖະກິດ ຢູ່ ເອີຣົບ. ນອກນັ້ນກອງປະຊຸມໃນຄັ້ງນີ້ແມ່ນເພື່ອພິຈາລະນາ ມາດຕະການຕໍ່ໄປເຊິ່ງອາດຈະຊ່ວຍຫລຸດຜ່ອນລາຄາອາຍແກັດລົງ.

ຮຽບຮຽງຂ່າວໂດຍ: ສະໄຫວ ລາດປາກດີ