ທ່ານ ນາງ ອິນແປງ ຊາມຸນຕີ ໄດ້ຮັບລາງວັນຜູ້ນຳຍິງດີເດັ່ນອາຊຽນ

ບໍລິສັດປາກຊ່ອງພັດທະນາ ຂາອອກ-ຂາເຂົ້າ ຈຳກັດຜູ້ດຽວ ເນັ້ນການບໍລິການເອົາໃຈໃສ່ວ່ອງໄວ່ທັນໃຈລູກຄ້າກາຍເປັນທີຍອມຮັບຄວາມພຶງພໍໃຈທົ່ວສັງຄົມຊຶ່ງຕະຫຼອດການດຳເນີນທຸລະກິດຜ່ານມາຖືເປັນໝາກຜົນສຳເລັດຂອງບໍລິສັດທີ່ເຫັນຄວາມເອົາໃຈໃສ່ພັດທະນາທຸລະກິດທີ່ເປັນແບບຢ່າງພົ້ນເດັ່ນຢູ່ໃນລະດັບແຖວໜ້າລາວຊຶ່ງສາມາດເບິ່ງເຫັນໝາກຜົນຈຶ່ງເຮັດໃຫ້ບໍລິສັດໄດ້ຮັບລາງວັນຜູ້ປະກອບການແມ່ຍິງດີເດັ່ນອາຊຽນປະຈຳປີ 2022.

ທ່ານ ນາງ ອິນແປງ ຊາມຸນຕີ ປະທານສະມາຄົມມັນຕົ້ນລາວປະທານສະພາການຄ້າ ແລະອຸດສາຫະກຳແຂວງສາລະວັນ ປະທານບໍລິສັດ ປາກຊ່ອງພັດທະນາ ຂາຂາອອກ-ຂາເຂົ້າ ຈໍາກັດຜູ້ດຽວ ແລະ ປະທານບໍລິສັດ ສາລະວັນພັດທະນາ ຂາຂາອອກ-ຂາເຂົ້າ ຈຳກັດຜູ້ດຽວ ໜຶ່ງໃນນັກທຸລະກິດຍິງລາວເຮົາທີ່ໄດ້ຮັບລາງວັນຜູ້ນຳຍິງທຸລະກິດດີເດັ່ນອາຊຽນ (ASEAN WOMEN LEADERS SUMMIT 2022) ຮ່ວມກັບນັກທຸລະກິດຍິງຫຼາຍປະເທດໃນອາຊຽນເຊິ່ງພິທີມອບລາງວັນຈັດຂຶ້ນວັນທີ 13 ຕຸລາ 2022 ທີ່ປະເທດກຳປູເຈຍ.

ທ່ານ ນາງ ອິນແປງ ຊາມຸນຕີ ໄດ້ໃຫ້ສໍາພາດວ່າ: ນັບແຕ່ດຳເນີນທຸລະກິດມາຮອດປັດຈຸບັນເຫັນວ່າສັງຄົມໃຫ້ຄວາມສົນໃຈຫຼາຍ ແລະຕິດຕາມຜົນງານຂອງບໍລິສັດມາຕະຫຼອດ ນັບແຕ່ສູນກາງລົງຮອດທ້ອງ ຖິ່ນເພາະວ່າລະບົບການດຳເນີນທຸລະກິດຂອງບໍລິສັດແມ່ນເນັ້ນໃສ່ການຜະລິດກະສິກຳເປັນສິນຄ້າເພື່ອສົ່ງອອກຮູບແບບລະບົບ 2 ບວກ 3 ທີ່ລັດຖະບານວາງອອກຄືປະຊາຊົນມີດິນທີ່ເຮັດການຜະລິດ ແລະມີແຮງງານສ່ວນບໍລິສັດຊ່ວຍປະຊາຊົນດ້ານເຕັກນິກວິຊາການເຝິກອົບຮົມຊ່ວຍວັດຖຸອຸປະກອນການຜະລິດ ແລະ ເງິນທຶນຈ່າຍໃຫ້ລ່ວງໜ້າ ໃນເວລາລົງມືທຳການຜະລິດ ສະເພາະເງິນທຶນແມ່ນໃຫ້ 30% ຂອງຜົນຜະລິດໃນສວນ (ພິເສດບໍ່ມີດອກເບັ້ຍ ແລະບໍ່ມີຫຼັກຊັບຄໍ້າປະກັນຄືຢືມນໍາທະນາຄານ) ໃຫ້ເອົາຜົນຜະລິດໃນສວນມາຄ້ຳປະກັນສັນຍາກູ້ຢືມ ແລະບໍລິສັດຮັບຊື້ຄືນໃນລາຄາຄ້ຳປະກັນທີ່ເໝາະສົມບໍ່ເອົາປຽບປະຊາຊົນ.

ສໍາລັບລາງວັນທີ່ໄດ້ມານັ້ນແມ່ນມາຈາກຜົນງານທີ່ດໍາເນີນທຸລະກິດໂປ່ງໃສເວລາສົ່ງສິນຄ້າໄປຕ່າງປະເທດສາມາດກວດກາເສັ້ນທາງການເງິນໄດ້ມີເງິນຕາຜ່ານທະນາຄານແຫ່ງ ສປປ ລາວ ເວລາບໍລິສັດຖອນອອກໄປຊື້ສິນຄ້າຈາກປະຊາຊົນແມ່ນຖອນເປັນເງິນກີບຕາມອັດຕາແລກປ່ຽນຂອງທະນາຄານແຫ່ງ ສປປ ລາວ ລະບົບນີ້ບໍລິສັດນຳໃຊ້ມາແຕ່ປີ 2010 ຈົນເຖິງປັດຈຸບັນນີ້ ສ່ວນລາງວັນທີ່ໄດ້ຮັບມີຫຼາຍລາງວັນທັງພາຍໃນ ແລະ ຕ່າງປະເທດໃນຜ່ານມາຄື: ຄັ້ງທີ 1 ລາງວັນຜູ້ສົ່ງອອກດີເດັ່ນປະຈໍາປີ 2012 ຄັ້ງທີ 2 ປີ 2019 ໄດ້ 2 ລາງວັນຄື: ລາງວັນທຸລະກິດຍິງດີເດັ່ນ ແລະລາງວັນທຸລະກິດກະສິກຳສີຂຽວ ຄັ້ງທີ 3 ປີ 2020 ລາງວັນດາວເດັ່ນແຫ່ງອາຊຽນ ຄັ້ງທີ 4 ປີ 2021 ໄດ້ 2 ລາງວັນຄື: ລາງວັນບູລິມະສິດກະສິກໍາ ແລະລາງວັນທຸລະກິດດີເດັ່ນໃນຍຸກໂຄວິດ ແລະ ຄັ້ງທີ 5 ປີ 2022 ລາງວັນຜູ້ນຳຍິງທຸລະກິດດີເດັ່ນອາຊຽນນອກຈາກນີ້ແລ້ວໃນປັດຈຸບັນຂ້າພະເຈົ້າຍັງກຳລັງລຸ້ນອີກ 2 ລາງວັນຈາກອາຊຽນຕື່ມອີກ.

ໂອກາດນີ້ ທ່ານ ນາງ ອິນແປງ ຊາມຸນຕີ ຍັງໄດ້ຝາກໃຫ້ນັກທຸລະກິດຮຸ່ນນ້ອງທີ່ກໍາລັງດໍາເນີນທຸກິດ ແລະ ຍັງບໍ່ປະສົບຜົນສຳເລັດຂໍໃຫ້ສູ້ຊົນອົດທົນມີຄວາມຕັ້ງໃຈ ເຊື່ອໝັ້ນໃນຕົວເອງສິ່ງສຳຄັນຄືຕັ້ງໃຈດຳເນີນທຸລະກິດດ້ວຍຄວາມໂປ່ງໃສມີຄຸນນະທຳຊື່ສັດຕໍ່ອາຊີບຂອງຕົນເອງມີຄວາມເມດຕາຈິດໃຈໂອບອ້ອມອາລີຮັກລູກນ້ອງໃຕ້ບັງຄັບບັນຊາປຽບເໝືອນຄົນໃນຄອບຄົວໝັ້ນສຶກສາຫາຄວາມຮູ້ໃໝ່ໆຈາກສັງຄົມປັດຈຸບັນທັງພາຍໃນ ແລະຕ່າງປະເທດມາປັບໃຊ້ເຂົ້າໃນທຸລະກິດຕົນເອງມັນຈຶ່ງຈະເຮັດໃຫ້ທຸລະກິດຂອງເຮົາປະສົບຜົນສຳເລັດໃນວັນໜຶ່ງຂ້າງໜ້າຢ່າງແນ່ນອນ.

แชร์