ນາຍົກ ຢ້ຽມຊົມບໍລິສັດຊີໂນ-ອາກຣີ ໂປຕາສ ໃນງານມະຫາກໍາສີມືຫັດຖະກໍາລາວ

ວັນທີ 17 ຕຸລາ, ທ່ານ ທົງ ຢົງເຮີງ, ປະທານ ແລະອໍານວຍການ ບໍລິສັດ ຊີໂນ-ອາກຣີ ໂປຕາສ ຈໍາກັດ (ຕໍ່ໄປເອີ້ນຫຍໍ້ວ່າ “ຊີໂນ-ອາກຣີ ໂປຕາສ”) ໂດຍໄດ້ຮັບການເຊື້ອເຊີນຈາກ ທ່ານ ມະໄລທອງ ກົມມະສິດ, ລັດຖະມົນຕີ ກະຊວງອຸດສາຫະກໍາ ແລະການຄ້າໄດ້ເຂົ້າຮ່ວມພິທີເປີດງານມະຫາກໍາສີມືຫັດຖະກໍາລາວ ຄັ້ງທີ 21 (ຕໍ່ໄປນີ້ເອີ້ນຫຍໍ້ວ່າ “ງານວາງສະແດງ”) ທີ່ໄດ້ຈັດຂຶ້ນທີ່ສູນວາງສະແດງສິນຄ້າລາວ-ໄອເຕັກ, ພ້ອມທັງໄດ້ໃຫ້ການສະໜັບສະໜູນດ້ານງົບປະມານແກ່ສະມາຄົມຫັດຖະກໍາລາວ, ທີ່ເປັນເຈົ້າພາບຈັດງານ ເປັນຈໍານວນເງິນ 20.000.000 ກີບ. ງານດັ່ງກ່າວໄດ້ຮັບກຽດເຂົ້າຮ່ວມໂດຍທ່ານ ພັນຄໍາ ວິພາວັນ ນາຍົກລັດຖະມົນຕີ ແຫ່ງ ສປປ ລາວ, ທ່ານ ມະໄລທອງ ກົມມະສິດ, ລັດຖະມົນຕີ ກະຊວງອຸດສາຫະກໍາ ແລະການຄ້າ, ທ່ານ ນາງ ສຸວິຕາ ປະເສີດ, ປະທານສະມາຄົມ ຫັດຖະກໍາລາວ, ແລະຍັງມີບັນດາທູຕານຸທູດ ແລະເພື່ອນມິດຈາກພາກທຸລະກິດອຸດສາຫະກໍາ-ການຄ້າ ກໍໄດ້ເຂົ້າຮ່ວມ.

ງານມະຫາກໍາຄັ້ງນີ້ແມ່ນຈັດໂດຍສະມາຄົມຫັດຖະກໍາລາວ, ຊຶ່ງຈະຈັດຂື້ນປີລະຄັ້ງ, ເປັນການລວບລວມສິນຄ້າຫັດຖະກໍາຜ້າໃໝລາວ, ຜະລິດຕະພັນເຮັດດ້ວຍໄມ້, ເຄື່ອງປະດັບ, ຜະລິດຕະພັນກະສິກໍາ ແລະອື່ນໆ, ຕາມທິດທາງນະໂຍບາຍຂອງລັດຖະບານລາວ “ໜຶ່ງເມືອງໜຶ່ງຜະລິດຕະພັນ”, ເພື່ອເປັນການຊຸກຍູ້ຍົກລະດັບສີມືຫັດຖະກໍາລາວໃຫ້ມີຄຸນນະພາບຂຶ້ນເລື້ອຍໆ, ເຊິ່ງເປັນບາດກ້າວລິເລີ່ມທີ່ສໍາຄັນຂອງການພັດທະນາ. ປີນີ້ຄາດວ່າມີບັນດາໜ່ວຍງານຕ່າງໆເຂົ້າຮ່ວມງານວາງສະແດງຫຼາຍກ່ວາ 230 ຮ້ານ, ເຊິ່ງມີຈໍານວນຫຼາຍກວ່າປີຜ່ານມາ, ພ້ອມນັ້ນຄຸນນະພາບຂອງຜະລິດຕະພັນຖ້າທຽບໃສ່ປີທີ່ຜ່ານມາຖືວ່າມີການຍົກລະດັບຂຶ້ນຫຼາຍ. ໃນໄລຍະຍຸກຫລັງການລະບາດຂອງພະຍາດໂຄວິດ-19 ຢູ່ ສປປ ລາວ, ງານວາງສະແດງ ຈະສົ່ງເສີມການສົ່ງອອກຜະລິດຕະພັນສີມືຫັດຖະກໍາລາວທີ່ມີຄຸນນະພາບ, ເປັນການຂັບເຄື່ອນການພັດທະນາເສດຖະກິດພາຍໃນທ້ອງຖິ່ນ ແລະ ສົ່ງເສີມເສດຖະກິດຂອງ ສປປ ລາວ.

ພິທີເປີດໄດ້ເລີ່ມຕົ້ນດ້ວຍການສະແດງຂອງກອງດຸລິຍາງຈາກຄະນະຊາວໜຸ່ມ ແລະການສະແດງສິນລະປະຈາກສະມາຄົມຫັດຖະກຳລາວ, ບັນດາແຂກທີ່ມີກຽດໄດ້ເຂົ້າຮ່ວມກັນຕັດແຖບຜ້າ ແລະທ່ານນາຍົກ ພັນຄໍາ ວິພາວັນ ໄດ້ລັ່ນຄ້ອງ 9 ບາດ ເພື່ອເປັນສີລິມຸງຄຸນການປະກາດເປີດງານມະຫາກໍາສີມືຫັດຖະກຳລາວ ຄັ້ງທີ 21 ຢ່າງເປັນທາງການ.

ຕໍ່ຈາກນັ້ນປະທານສະມາຄົມຫັດຖະກຳລາວກໍໄດ້ນຳພາທ່ານນາຍົກພັນຄຳ ວິພາວັນ ເດີນໄປຢ້ຽມຊົມສະຖານທີ່ວາງສະແດງຕ່າງໆ. ໃນແຕ່ລະຫ້ອງວາງສະແດງທີ່ທ່ານ ນາຍົກ ໄດ້ເຂົ້າຢ້ຽມຊົມທ່ານກໍໄດ້ໃຫ້ຄວາມສົນໃຈລາຍລະອຽດກ່ຽວກັບຜະລິດຕະພັນ, ທັງໄດ້ສຳພັດ ແລະກວດເບີ່ງຄຸນນະພາບຂອງຜະລິດຕະພັນ, ໄດ້ສອບຖາມກ່ຽວກັບຂັ້ນຕອນການຜະລິດແປຮູບແລະການຈຳໜ່າຍ, ເຊິ່ງສະແດງໃຫ້ເຫັນເຖິງຄວາມເອົາໃຈໃສ່ແລະສະໜັບສະໜູນຂອງທ່ານນາຍົກລັດຖະມົນຕີທີ່ມີຕໍ່ການພັດທະນາຫັດຖະກຳລາວ.

ໃນລະຫວ່າງການຢ້ຽມຊົມງານວາງສະແດງຂອງທ່ານນາຍົກລັດຖະມົນຕີ, ທ່ານ ທົງຢົງເຮີງ ກໍໄດ້ລາຍງານໂດຍຫຍໍ້ສະພາບຄວາມຄືບໜ້າຂອງໂຄງການຂອງບໍລິສັດ ຊີໂນ-ອາກຣີ ໂປຕາສ ຕໍ່ທ່ານນາຍົກ. ເມື່ອທ່ານນາຍົກໄດ້ຮັບຊາບວ່າ ບໍລິສັດ ຊີໂນ-ອາກຣີ ໂປຕາສ ໄດ້ເຕີບໂຕກາຍເປັນວິສາຫະກິດຜະລິດຝຸ່ນໂປຕາສທີ່ໃຫຍ່ທີ່ສຸດຢູ່ ສປປ ລາວ ແລະໃນພາກພື້ນອາຊີຕາເວັນອອກສຽງໃຕ້, ທ່ານນາຍົກກໍໄດ້ງຶກຫົວສະແດງຄວາມພາກພູມໃຈເປັນຢ່າງຍິ່ງ, ພ້ອມທັງເນັ້ນໜັກວ່າບໍລິສັດຕ້ອງສືບຕໍ່ຮັກສາຄວາມໄວຂອງການພັດທະນາ ແລະເຮັດການພັດທະນາໂຄງການເກືອໂປຕາສຂອງລາວໃຫ້ດີຂື້ນຕື່ມອີກກ້າວໜຶ່ງ. ທ່ານ ທົງ ຢົງເຮີງ ໄດ້ສະແດງຄວາມຂອບໃຈທ່ານນາຍົກ ທີ່ໄດ້ໃຫ້ການເອົາໃຈໃສ່ແລະສະໜັບສະໜູນໂຄງການຝຸ່ນໂປຕາສຂອງບໍລິສັດ ຊີໂນ-ອາກຣີ, ແລະໄດ້ກ່າວວ່າ ຊີໂນ-ອາກຣີ ໂປຕາສ ຈະໃຊ້ທຸກຄວາມພະຍາຍາມ, ເພື່ອສ້າງໃຫ້ກາຍເປັນວິສາຫະກິດຜະລິດຝຸ່ນໂປຕາສທີ່ໃຫຍ່ທີ່ສຸດໃນອາຊີ.

ຫຼັງຈາກນັ້ນ, ທ່ານ ທົງ ຢົງເຮີງ ຍັງໄດ້ໂອ້ລົມຮ່ວມກັບລັດຖະມົນຕີ, ຮອງລັດຖະມົນຕີກະຊວງອຸດສະຫະກຳແລະການຄ້າ, ທ່ານປະທານ ແລະຮອງປະທານສະມາຄົມຫັດຖະກຳ ຢ່າງໄມຕີຈິດມິດຕະພາບ. ທ່ານ ມະໄລທອງ ກົມມະສິດ ໄດ້ສະແດງຄວາມຂອບໃຈ ບໍລິສັດ ຊີໂນ-ອາກຣີ ທີ່ເຂົ້າຮ່ວມໃນພິທີເປີດງານມະຫາກໍາສີມືຫັດຖະກໍາລາວຄັ້ງນີ້. ນອກນີ້,ທ່ານ ທົງ ຢົງເຮີງ ໄດ້ກ່າວຕື່ມອີກວ່າ ບໍລິສັດຕັ້ງໝັ້ນທີ່ຈະພັດທະນາເປັນເວລາຍາວນານຢູ່ລາວກໍຕ້ອງປະຕິບັດໜ້າທີ່ຮັບຜິດຊອບທາງສັງຄົມ; ບໍລິສັດ ຊີໂນ-ອາກຣີ ບໍ່ພຽງແຕ່ຈະຊຸກຍູ້ການພັດທະນາເສດຖະກິດພາຍໃນທ້ອງຖິ່ນຂອງແຂວງຄຳມ່ວນ ເທົ່ານັ້ນ, ແຕ່ຍັງຫວັງທີ່ຈະປະກອບສ່ວນກຳລັງແຮງເຂົ້າໃນການພັດທະນາຂະແໜງອຸດສາຫະກໍາຕ່າງໆ ເຊິ່ງລວມທັງ ຂະແໜງຫັດຖະກຳ; ບໍລິສັດ ຈະປະຕິບັດຕາມທິດຊີ້ນຳຂອງລັດຖະມົນຕີ ກະຊວງອຸດສະຫະກຳແລະການຄ້າ, ປະສານສົມທົບກັບ ສະມາຄົມ ຫັດຖະກຳລາວ ເພື່ອພະຍາຍາມຊ່ວຍກັນໃຫ້ຜະລິດຕະພັນຫັດຖະກຳທີ່ມີຄຸນນະພາບຂອງລາວ ໄດ້ໄປຈຳໜ່າຍຢູ່ ສປ ຈີນ, ບັນດາປະເທດອາຊີອາຄະເນ ແລະ ປະເທດອື່ນໆໃນຂອບເຂດທົ່ວໂລກ,ເພື່ອໃຫ້ຫຼາຍໆຄົນແລະຫຼາຍໆປະເທດໄດ້ເຂົ້າໃຈ ແລະ ຮູ້ຈັກປະເທດລາວຫຼາຍຂຶ້ນໂດຍຜ່ານສີນຄ້າຫັດຖະກຳ, ຈາກສິ່ງດັ່ງກ່າວກໍຈະດຶງດູດນັກລົງທຶນເຂົ້າມາລົງທຶນແລະພັດທະນາໃນຂະແໜງການຕ່າງໆຢູ່ລາວໄດ້ຫຼາຍຍີ່ງຂຶ້ນ, ເຊີ່ງຈະຊ່ວຍຂັບເຄື່ອນການພັດທະນາເສດຖະກິດຂອງ ສປປ ລາວ.

แชร์