ຮອງປະທານກຳມາທິການເສດຖະກິດ, ເຕັກໂນໂລຊີ ແລະສິ່ງແວດລ້ອມພົບປະເຈົ້າແຂວງຄໍາມ່ວນ

ໃນວັນທີ 19 ຕຸລາ 2022 ທ່ານ ສົມສະອາດ ອຸ່ນສີດາ ຮອງເຈົ້າແຂວງຄຳມ່ວນໄດ້ຕ້ອນຮັບການເຂົ້າພົບປະຂອງທ່ານ ເກດແກ້ວ ສີຫາລາດ ຮອງປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມສະພາແຫ່ງຊາດໃນໂອກາດລົງເຄື່ອນໄຫວຢູ່ແຂວງຄຳມ່ວນເພື່ອຕິດຕາມ, ຊຸກຍູ້ວຽກງານການພັດທະນາເສດຖະກິດ-ສັງຄົມ ຂອງແຂວງຄຳມ່ວນ, ວຽກງານການເຮັດທົດລອງຂຸດຄົ້ນແຮ່ເຫຼັກເພື່ອສົ່ງອອກຢູ່ແຂວງຄຳມ່ວນມາຮອດປັດຈຸບັນ ໄດ້ຈັດຕັ້ງປະຕິບັດຄືແນວໃດ ແລະມີຂໍ້ສະດວກ, ຂໍ້ຫຍຸ້ງຍາກຄືແນວໃດ, ບັນຫາການອອກໃບຕາດິນ, ການຄຸ້ມຄອງ, ນໍາໃຊ້ທີ່ດິນ ລວມເຖິງການທົດລອງຈັດຕັ້ງປະຕິບັດ 3 ປະເພດປ່າ ຢູ່ພາຍໃນແຂວງ ແລະບັນຫາການພັດທະນາໂຄງການທ່າບົກ ໄດ້ດຳເນີນໄປຄືແນວໃດໄດ້ມີການວາງໂຄງສ້າງ, ການອອກແບບ, ການກຳນົດທີ່ຕັ້ງ ແລະ ອື່ນໆຄືແນວໃດ.

ທ່ານຮອງເຈົ້າແຂວງຄຳມ່ວນໄດ້ກ່າວສະແດງຄວາມຕ້ອນຮັບ ແລະຂອບໃຈມາຍັງທ່ານຮອງປະທານຄະນະກຳມາທິການເສດຖະກິດ, ເຕັກໂນໂລຊີ ແລະສິ່ງແວດລ້ອມ ສະພາແຫ່ງຊາດທີ່ໄດ້ລົງມາຊຸກຍູ້, ຕິດຕາມການພັດທະນາເສດຖະກິດ-ສັງຄົມຂອງແຂວງ, ພ້ອມທັງໄດ້ລາຍງານກ່ຽວກັບສະພາບໃນການເຄື່ອນໄຫວຈັດຕັ້ງປະຕິບັດການອອກໃບຕາດິນຖາວອນ, ການນຳໃຊ້ທີ່ດິນທີ່ບໍ່ຖືຕ້ອງຢູ່ພາຍໃນແຂວງ, ຊຶ່ງເຫັນວ່າປະຊາຊົນຈຳນວນໜຶ່ງຍັງມີການບຸກລຸກ ແລະເຂົ້າໄປຈັບຈອງເຂດເນື້ອທີ່ດິນຂອງລັດ ເຊິ່ງການລົງຕິດຕາມ, ກວດກາ ເພື່ອຄຸ້ມຄອງວຽກງານດັ່ງກ່າວໃນໄລຍະຜ່ານມາແມ່ນຕິດພັນກັບທາງດ້ານງົບປະມານ ແລະອຸປະກອນຮັບໃຊ້ຈຶ່ງເຮັດໃຫ້ມີຄວາມຫຍຸ້ງຍາກ.

ສຳລັບການຄຸ້ມຄອງ, ຕິດຕາມ, ກວດກາບັນດາບໍລິສັດທີ່ເຮັດທົດລອງຂຸດຄົ້ນແຮ່ເຫລັກຊຶ່ງປັດຈຸບັນມີຫລາຍບໍລິສັດທີ່ໄດ້ເລີ່ມຂຸດຄົ້ນ, ບົດແຮ່ ແລະມີແຜນທີ່ຈະສົ່ງອອກແຮ່ ແຕ່ທ້າຍປີ 2021 ແຕ່ມາຮອດປັດຈຸບັນຍັງບໍ່ສາມາດສົ່ງອອກໄດ້ໂດຍໄດ້ຂໍສະເໜີຕໍ່ທ່ານຮອງປະທານກຳມາທິການເສດຖະກິດສະພາແຫ່ງຊາດເພື່ອສະເໜີຕໍ່ສະພາແຫ່ງຊາດກໍຄືລັດຖະບານເພື່ອຊ່ວຍຄົ້ນຄວ້າ ແລະແກ້ໄຂກ່ຽວກັບບັນຫາດັ່ງກ່າວ.
ຂ່າວ-ພາບ: ກອງຄຳ

แชร์