ງານນັດພົບແຮງງານ ຄັ້ງທີ 9

ຄະນະເສດຖະສາດ ແລະ ບໍລິຫານທຸລະກິດ (ຄສບ) ແລະ ມະຫາວິທະຍາໄລແຫ່ງຊາດ (ມຊ) ໄດ້ຮ່ວມກັນຈັດງານວັນນັດພົບແຮງງານຄັ້ງທີ 9 ຂຶ້ນໃນລະຫວ່າງ ວັນທີ 20 – 22 ຕຸລາ ທີ່ ສະໂມສອນໃຫຍ່ຂອງ ມຊ ໂດຍການໃຫ້ກຽດເປັນປະທານເປີດງານຂອງ ທ່ານ ໂພສີ ທິບດາວັນ ຮອງອະທິການບໍດີ ມຊ, ມີທ່ານ ພູເພັດ ກ້ຽວພິລາວົງ ຄະນະບໍດີຄະນະ ຄສບ, ຫົວໜ້າຫ້ອງການແຜນງານອົງການ USAID ປະຈໍາ ສປປ ລາວ ພ້ອມດ້ວຍຄູ-ອາຈານ, ນັກສຶກສາ ແລະແຂກຖືກເຊີນເຂົ້າຮ່ວມ.

ຈຸດປະສົງຂອງງານດັ່ງກ່າວເພື່ອໃຫ້ນັກສຶກສາ ມຊ ກໍຄືນັກສຶກສາທີ່ກຳລັງຈົບການສຶກສາ ແລະຜູ້ສົນໃຈຊອກຫາວຽກເຮັດງານທຳໄດ້ເຂົ້າຫາແຫຼງຂໍ້ມູນກ່ຽວກັບບໍລິສັດ, ຂໍ້ມູນອາຊີບ ແລະ ຂໍ້ມູນສະໝັກວຽກ, ທັງເປັນການໃກ້ຊິດກັບບັນດາບໍລິສັດຕ່າງໆ, ພ້ອມທັງມີການແລກປ່ຽນຄວາມຮູ້ຢ່າງກວ້າງຂວາງລະຫວ່າງບັນດານັກວິຊາການ ແລະ ບຸກຄະລາກອນຈາກພາກເອກະຊົນ, ພ້ອມນີ້ເພື່ອໃຫ້ບັນດາຫົວໜ່ວຍທຸລະກິດໄດ້ໃຫ້ຂໍ້ມູນກ່ຽວກັບບໍລິສັດ, ຂໍ້ມູນການຝຶກງານ ແລະຕໍາແໜ່ງວ່າງທີ່ຕ້ອງການເພື່ອຄັດເລືອກບຸກຄະລາກອນທີ່ໄດ້ຄຸນນະພາບບັນຈຸເຂົ້າໃນອົງກອນຕ່າງໆ.

ໂອກາດນີ້, ທ່ານ ໂພສີ ທິບດາວັນ ໄດ້ມີຄຳເຫັນວ່າ: ງານດັ່ງກ່າວເປັນງານຕະຫຼາດນັດແຮງງານທີ່ໃຫຍ່ທີ່ສຸດເທົ່າທີ່ເຄີຍຈັດຕັ້ງມາ ແລະເປັນໜຶ່ງໃນເວທີທີ່ຖືກອອກແບບມາເພື່ອສ້າງພື້ນທີ່ໃຫ້ນາຍຈ້າງໄດ້ພົບປະກັບພະນັກງານໃນອະນາຄົດຢ່າງມີປະສິດທິພາບ ແລະປະສິດຕິຜົນກວ່າ,ຈະຊ່ວຍໃຫ້ນັກສຶກສາໄດ້ຮຽນຮູ້ກ່ຽວກັບເສັ້ນທາງສາຍອາຊີບ ແລະທ່າອ່ຽງຂອງວຽກທີ່ຕະຫຼາດຕ້ອງການ, ຊຶ່ງເປັນການຊ່ວຍປັບປຸງວຸດທິການສຶກສາ ແລະ ຫຼັກສູດຕ່າງໆທີ່ໄດ້ຈັດຂຶ້ນຢູ່ມະຫາວິທະຍາໄລ ເພື່ອຕອບສະໜອງຄວາມຮຽກຮ້ອງຕ້ອງການ ແລະກະກຽມນັກສຶກສາໃນອະນາຄົດ.” ພາຍໃນງານຄັ້ງນີ້, ມີທັງໝົດ 28 ຫ້າງຮ້ານ ແລະບໍລິສັດເຂົ້າຮ່ວມ. ໂດຍພາຍໃຕ້ທຶນສະໜັບສະໜູນຈາກ: ອົງການພັດທະນາສາກົນຂອງສະຫະລັດອາເມລິກາ (USAID).
(ຂ່າວ-ພາບ: ວັນເພັງ)

• 20/10/2022